Washington Times yaguye mu mutego wa Ingabire Victoire

Yanditswe na Grace Kamugisha
Kuya 15 Ugushyingo 2019 saa 11:15
Yasuwe :
0 0

Ikinyamakuru cyo muri Leta Zunze Ubumwe za Amerika, The Washington Times, tariki 30 Ukwakira cyatangaje inkuru igira iti “Ukundi kuburirwa irengero k’utavuga rumwe na Leta kwazamuye ibibazo bishya kuri Perezida w’u Rwanda”.

Ku babashije gusoma inkuru nk’izo mbere, iyi nayo nta tandukaniro, imiterere ni imwe. Iki kinyamakuru cyavuze ko uwo mugabo yaburiwe irengero kubera ko ari umuyoboke wa FDU Inkingi.

Mu gushaka kwerekana ukuri kw’inkuru yabo, Washington Times bifashishije Victoire Ingabire Umuyobozi wa FDU Inkingi. Ubusanzwe uko byagenda kose, uyu mugore nta ruvugiro yari akwiriye hashingiwe ku byaha yahamijwe n’inkiko.

Ingabire Victoire yamaze imyaka umunani muri gereza ashinjwa kwica amategeko. Urukiko rwamuhamije gukwirakwiza ibihuha agamije guteza imvururu muri rubanda, kubangamira umutekano w’igihugu no gupfobya Jenoside yakorewe Abatutsi mu 1994, akatirwa imyaka 15 y’igifungo.

Nyamara, Perezida yifashishije imbabazi yemerewe n’amategeko yaramubabariye hamwe n’izindi mfungwa zisaga 2000 zari zifungiwe ibyaha binyuranye.

Dusubiye mu Buholandi aho yari atuye mbere yo kuza mu Rwanda, ubuyobozi bwo muri icyo gihugu bwabonye inyandiko zemeza ko Ingabire yajyaga yohereza amafaranga kuri Vital Uwumuremyi, umusirikare mukuru muri FDLR. Ingabire na FDU Inkingi ye, bari babanye neza n’uwo mutwe w’iterabwoba, ufitanye isano n’Interahamwe zasize zikoze Jenoside yakorewe Abatutsi.

Na nyuma yo kuva muri gereza muri Nzeri umwaka ushize, Ingabire yasubiye muri bya bikorwa bye byo gukorana n’imitwe y’iterabwoba.

Iyo Washington Times iba yari ishishikajwe no kumenya ukuri, bakabaye baramenye ko na Loni ubwayo yagaragaje ko FDU Inkingi ari umwe mu mitwe igize Ihuriro P5 ihuriyemo RNC ya Kayumba Nyamwasa na FDLR bagamije gutegura ibitero by’iterabwoba ku Rwanda. Raporo y’impuguke za Loni kuri Repubulika Iharanira Demokarasi ya Congo yasohotse mu Ukuboza 2018, ikubiyemo amakuru yose ku bikorwa by’iterabwoba bya P5.

Mu minsi ishize Ingabire yakunze kugaragara kenshi yagiye gukurikirana imanza mu Rukiko Rukuru rwa Nyanza, ziregwamo abantu 11 bo mu ishyaka rye bashinjwa gukorana n’imitwe yitwaje intwaro bagamije guhirika ubutegetsi buriho. Abo 11 bafashwe ubwo bari bagiye mu nkambi zitorezwamo inyeshyamba mu Burasirazuba bwa Congo.

Barafunzwe kandi bashinjwa ibyaha bifitiwe ibimenyetso. Ingabire amaze igihe yitabira amaburanishwa yabo nk’ushishikajwe nabo no mu rwego rwo kubaha akanyabugabo, kubabwira ko ari kumwe nabo. Binashobora kuba uburyo bwo kubabwira ati ‘ntimugire amakuru akomeye muvuga’.

Ibimenyetso byose byerekana ko Ingabire atigeze ahinduka. Iterabwoba, amakimbirane ashingiye ku ntambara, guhindura ubutegetsi mu buryo bw’imvururu…biracyari intego ze n’inzozi ze.

Uwo ni we muntu Washington Times ishaka gushingiraho ishinja ubuyobozi bw’u Rwanda ibyaha.

Nta na kimwe icyo kinyamakuru kivuga ku bikorwa bye by’iterabwoba cyangwa ibyaha yahamijwe n’inkiko cyangwa se ibyo Loni yavuze ku Ishyaka rye FDU Inkingi.

Ibyo avuga ko Ndereyimana Eugène yashimuswe nta kuri na guke bifite. Si ubwa mbere Ingabire n’abandi nkawe bavuga ngo kanaka yarabuze ariko nyuma y’igihe runaka uwo muntu akaboneka yibereye ahantu runaka.

Umunyamakuru ufite icyo ashaka kugeraho, yakabaye yaramubajije ati “Ni iki cyatuma u Rwanda rwangiza isura yarwo ngo rurashimuta umuntu?’’

Nkuko byagendekeye Ingabire, iyo Ndereyimana aba afite ibyo akekwaho yari kugezwa mu rukiko, yahamwa nabyo agafungwa nkuko byagendekeye Ingabire cyangwa abayoboke 11 b’ishyaka rye bari mu rubanza mu rukiko rukuru rwa Nyanza. N’abakekwaho iterabwoba mu bikorwa byo gutera gerenade zahitanye ubuzima bw’inzirakarengane bagejejwe mu rukiko ubutabera bukora akazi kabwo.

Ingabire na Washington Times ntibarasobanura impamvu babona Ndereyimana we yakorerwa ibitandukanye n’iby’abandi niba koko bakeka ko hari ibyaha yakoze.

Ingabire ntarasobanura impamvu abona Ndereyimana yakorerwa ibitandukanye n’iby’abandi niba koko akeka ko hari ibyaha yakoze

Ibikubiye muri iyi nyandiko ni ibitekerezo bwite bya Grace Kamugisha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza