Umuzi w’ibibazo by’imyandikire y’amateka y’u Rwanda

Yanditswe na Murashi Isaïe
Kuya 7 Ugushyingo 2020 saa 04:46
Yasuwe :
0 0

Iyi nyandiko igamije kumenyekanisha ko Amateka y’u Rwanda yamizwe n’Iyigamokomahimbano, kumenyekanisha uburyo abakoloni banditse Iyigamokomahimbano aho kwandika Amateka; ibibazo byatewe no guhindura Amateka ukundi (Conséquences de la fausse Ethnographie).

Mu bindi iyi nyandiko igamije harimo kumvikanisha akamaro k’Amateka y’Isi, n’Amateka y’u Rwanda by’umwihariko kumenyekanisha Amateka mu ruhando rw’ubundi bumenyi no kugaragaza uko Amateka yandikwa.

Mu nyandiko y’ubushize twanditse ku ntango-muzi y’ibibazo by’imyandikire y’Amateka y’u Rwanda. Twagagaraje ukuntu ibihugu by’I Burayi byabaye ibihangange kubera ibyago. Ak’awa mugani w’Ikinyarwanda ngo ibyago byigisha ubwenge. Twabonye kandi ko amahirwe yatumye bava muri ako kaga, ariko baturiye Inyanja ya Mediteraniya. Iyi Nyanja yabahaye uburyo bwo kuzamuka kubera ubucuruzi n’intambara.

Ubucuruzi n’Intambara byabahaye ibintu bine byatumye bigarurura isi. Ibyo bine by’ibanze harimo ubumenyi buhahano bwubakiye ku bushishozi-Filozofiya n’ubuhanga mu bintu karemano; idini ry’abayuda bahinduye idini rya Kristu ; Wino yo kwandika (encre) n’impapuro bavanye ku Bashinwa n’ubumara bukora amasasu y’imbunda bakuye ku Bashinwa (poudre à canon).

Ibi bintu bine nibyo byahaye abanyababurayi imbaraga zo kuza muri Afurika kudufata nk’abaja b’ingaruzwamuheto, aribyo byitwa ubukolon.

Bakoresheje imbaraga baratwinjirana, baradupfukamisha kandi ari nako batubwira ngo baje kutwigisha ijambo ry’Imana no kutwigisha amajyambere. Babanje kutwibagiza ko bacuruje abanyafurika babatwara bunyango muri Amerika guhinga ibisheke, ipamba, n’itabi bari bakeneye gucuruza iwabo i Burayi.

Kugira ngo batwumvishe ko ari abantu beza, ubucakara babwitiriye abarabu, n’ibibyarirane by’abarabu n’abirabura ba Zanzibar. Abayobozi babo bitwaga Rumaliza na Tipo Tipo. Nyamara abo barabu n’abo baswahili ba Zanzibar, bose bakoreraga abo banyaburayi, ariko kubera ko abanyaburayi ari ba kabuhariwe mu kuvuga indimi ebyiri, ubwo bucakara babuhirikiye ku barabu, kandi birafata. Nyamara sibyo kuko abo barabu bari abakozi babo. Bari ibyo dukunze kwita abakomisiyoneri.

Ni muri ubwo buryo kandi bw’indimi ebyiri, abapadiri bera baje bambaye nk’abarabu. Abakuru muri twe baribuka neza uko abapadiri bera bambaraga amakanzu n’ingefero zitukura ku mutwe, n’ishapule ndende mu gituza, n’ubwanwa burebure bugera ku gituza. N’abakiri bato bashobora kubibona ku mafoto kuri Google.Mushake amazina ya Cardinal Lavigerie, Mgr Joseph Hirth, Mgr Léon Classe, Père Brard ariwe Abanyarwanda bise Telebura, Barthémy Abanyarwanda bise Bayitelemi, na Loupias uriya wishwe na Rukara rwa Bishingwe.

Bose baje bambaye nk’abarabu bashaka kwiyoberanya, kandi bitwa ko baje kwigisha ijambo ry’Imana. Barangije kuza biyoberanyije, batwigisha ko kubeshya ari icyaha. Bivuze ko icyaha kireba abandi, bo kitabareba. Bongeraho ngo tujye twumva ibyo bavuga, ntitukarebe ibyo bakora. Muri make bivuze ko bazanywe n’ikindi kitari ukwigisha ibyiza by’Imana. Kuko Imana twari dusanzwe tuzi iwacu, ni ibyiza gusa, kandi udakora neza ntaba azi Imana.

Baje barwanya abarabu kandi banabigana mu myambarire, mu myubakire, mu bikoresho byo gusenga. Iriya shapule yitwa Rozali ni Tas bi y’abarabu. Za Misiyoni arizo paruwasi z’ubu, muzitegereze zisa na harem z’abarabu ( ibyo dukunze kwita ibipangu). Amakanzu y’abapadiri n’ababikira ni imyambaro y’abarabu n’abayisilamu. Baje batwereka ko idini ya Islamu ari mbi kandi bigana ibyayo byose, bo batagira icyabo na kimwe, uretse ikinyoma.

Ibi byose n’ibindi byinshi bisa nabyo, tuzagenda turebera hamwe biratwereka ko ubukoloni bwubakiye ku kinyoma. Tuzarebera hamwe uko idini twigishijwe, ryaba gatolika ryaba igiporoso, ryubakiye ku kinyoma. Ryitwa ngo ni idini rya gikristu nyamara ntaho rihuriye na Yezu cyangwa Yesu. Uretse izina gusa nta bukristo twigishijwe. Ni icyitiriro gusa cyatumye biyoberanya kugira ngo badutware ibyacu. Niyo mpamvu hariho icyo bise “Amayobera matagatifu yo kwemera” kuko nabo ubwabo byarabayobeye.

Ni nayo mpamvu Musinga Yuhi V yabise “Ibipfamutima bitagira ubwenge.” Bivuze ka umwami w’u Rwanda yari yaravumbuye ko uretse imbunda gusa nta bwenge, nta mutima, nta buntu, nta rukundo. Umwami Musinga yarababajije ati ‘ariko harya ngo umuntu baramuhamba hanyuma akazuka akajya mu ijuru?’ Noneho abwira abantu ati ‘muzandebera ko iyo bapfushije barira.’ Nyuma ingenza zaje kumubwira ko iyo bapfushije barira.Umwami ati ‘Nkibivuga! Ba bandi koko ni ibipfamutima. Batubwire ngo iyo umuntu apfuye ajya mi ijuru, babirengeho bamuririre?’.

Rero abasokuruza bacu bari barabatahuye ko abapadiri bagenzwa n’ikindi. Kuko basogokuru na basogokuruza bari abanyabwenge. Batekerezaga neza n’ubwenge butavangavanze nk’ubwacu. Bari batarafatwa n’ikinyoma nkatwe twemera ibintu bitumvikana. Buri munsi tukaririmba mu misa ngo ni amayobera matagatifu yo kwemera, twarangiza tugataha dutuje, tukumva ko byose ari mahwi.

Tugatuza kandi nyamara batwigishije ibyabayobeye, bagendereye kudutwara ibyacu. Muti ibyacu badutwaye ni ibiki? Badutwaye byose bahereye ku Mana yacu no ku bwenge bwacu. Badutwaye kandi igihugu cyacu n’ibirimo byose. Badutwaye Amateka yacu, umuco wacu, n’ururimi rwacu. Badutwaye umubano mwiza, batwigisha umwiryane n’ubugome bwambaye umugoma. Badutwariye urukundo batwigisha urwango.

Icya mbere badutwaye Imana n’ubwenge batugira ibicucu, babishaka kandi babigendereye kugira ngo batugire impumyi bahora barandase muri byose. Kugira ngo icyo bavuze cyose twikirize, noneho nibamara kugenda tuzasigare ari twe tubyigishanya. Abakuru babe ba bwenge buke, baburage abana, bibe bityo uruhererekane ku buryo bazakomeza kutuyobora igihe cyose barigendeye cyera.

Baje tuzi Imana y’i Rwanda ariyo Gasani k’i Rwanda yaremye byose byiza biri mu Rwanda umu. Imana y’i Rwanda yaduhaye inka n’ingoma; yaduhaye kubyara, guheka no gusubiza ingobyi imugongo. Imana y’i Rwanda yaduhaye ibintu n’ubuntu bwo kubitanga. Imana yaduhaye amata n’abo kuyaha. Iyo Mana itagira ikiyisumba, irara ahandi igataha i Rwanda. Iyo Mana ihoraho kandi idatera ubwoba, itaha i Rwanda kugir ngo iturinde dusinziriye.

Iyo Mana itagira ikiyisumba, yaduhaye aheza ho kuba, hatagira uko hasa hitwa iwacu honyine. Iwacu tuvukira tukahakurira, tukahasazira, igihe cyagera tugasezera nta bwoba, tugasigira abo twabyaye umurage mwiza. Tukabasiga batekanye kandi bumvikana. Nta mwiryane nta rutoto, nta Shitani nta dayimoni, nta muriro utazima, nta purugatori, nta juru uretse irya Kamonyi.

Iyo Mana itagira ikiyisumba barayitunyaze batwigisha Mungu, Imungu yamunze u Rwanda Rugali rwa Gasabo. Kubera ko badutwaye ubwenge ntitujya twibaza ukuntu imungu iyi tuzi imunga ibigega n’ibitereko yakwitwa Imana, imyaka igashira indi igataha. Kubera ko badutwaye ubwenge, ntitubona ko ari ishyano ryagwiriye u Rwanda. Ni ishyano mu Rwanda kwemera Shitani n’abadiyimoni, Umuriro utazima, Purugatori, n’ijuru ritari irya Kamonyi kandi tuzi neza ko twabibwiwe n’abantu baje biyoberanya bambaye imyenda y’ikinamico. Abantu beruye bakatubwira ko ari abayobe kuko byose byabayobeye. Natwe tukaririmba ko turi abayobe kuko byatuyobeye. Ubundi uwayobye arayoboza kandi uko bisanzwe ntawe uyoba ku manywa.

Abakurambera bacu barabyitegereje barabinenga ndetse baranabyanga, barabyamagana mu bwenge, mu bushishozi n’ubuhanga buranga ab’iwacu. Nyamara kubera ko badutwaye ubwenge ntitujya dukurikiza umurage nyakuri w’abo bakurambere.

Yarabyanze Musinga wa Rwabugili, bamuta ishyanga. Yarabyanze Nkubito y’Imanzi mu buhanga buhanitse tutarumva n’ubu. Bamubeshye ko bamukunze kurusha, kandi banze se umubyara, na we abereka ko atabizi. Bamwokeje igitutu ngo yemere kumugaragaro ko atanze u Rwanda. Kuko yitwaga Nyagasani ngo nareke iryo zina ariharire undi ariko baca umugani mu kinyarwanda ngo uko byagenze ibara umupfu.

Nyuma yo kwiyerurutsa yabwiye abantu ko u Rwanda yaruhungishije ababisha, akarushyira hejuru cyane aho ruzavanwa n’umugabo hasiba undi. Uwa niwo murage wa Rukabu. Kandi ibyakurikiyeho turabizi. Tuzi neza ko bamwiyunguje, na n’ubu bakaba bakitubwira ngo nabyo ni amayobera. Kandi tuzi neza ko umuganga Julien Vinck yamuteye urw’ingusho, ku mategeko ya Jean Paul Harroy na Myr André Perode. Uko bamwiyunguje nabikozeho ubushakaskatsi ku buryo mu gihe kitarambiranye, ibyamayobera ku itanga rya Rukabu bizavira ruhande rimwe.

Yarabyanze Musenyeri Bigirumwami mwene Rukamba, na we mu buhanga buhanitse. Yabipfuye na mugenzi we Musenyeri André Perraudin n’abapadiri bera bose, biratinda. Na we ntibyamuguye neza. Uko yabyanze n’uko André Perode yamuguye nabi tuzabirebera hamwe twitonze.

Umwami Mutara Rudahigwa ari kumwe n'abapadiri bera, nyuma yo kwivugana se Yuhi Musinga
Yuhi Musinga yashwanywe n'abapadiri bera ku ikubitiro nyuma yo kuvumbura ko bafite ikindi kibagenza kitari iyobokamana

Biracyaza….


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .