Uko Noel Zibahamwe yabeshye kugeza ubwo ibinyoma bye binyujijwe mu kinyamakuru cya Leta ya Australia

Yanditswe na Albert Rudatsimburwa
Kuya 28 Ukwakira 2020 saa 09:36
Yasuwe :
0 0

Ku rubuga rwa internet rwa televiziyo ya Australia, ABC News hariho inkuru y’umunyarwanda Noel Zibahamwe, wageze muri icyo gihugu mu 2000 nyuma akaza kuhabona ubuhungiro, ubu akaba ‘yemeza ko abavandimwe be babiri basigaye mu Rwanda bishwe’.

Muri iyo nkuru yasohotse ku cyumweru gishize, ABC News yanditse ko ‘bamwe mu bagize umuryango w’abanyarwanda baba muri Australia bafite ubwoba bw’abo mu miryango yabo bicirwa mu Rwanda bitewe n’uburyo ubutegetsi bukoresha bucecekesha ababunenga baba mu mahanga’. Iyo nkuru ikomeza ihereza umwanya Zibahamwe akavuga ibirego bye.

Iyo ABC iba ishishikajwe no kumenya ukuri, yari kuba yakoze ubushakashatsi ikamenya impamvu u Rwanda atari ahantu hashobora gukorerwa ibyaha nk’ibyo. Ikintu cya mbere abanyamakuru ba ABC bagombaga gukoraho ubushakashatsi, ni uko mu Rwanda n’abakekwaho iterabwoba iyo bafashwe nyuma yo kwica abaturage, bafungwa bakagezwa mu butabera nk’uko biteganywa n’amategeko.

Uhereye ku bakekwaho ibyaha bahoze muri FLN, kuri ubu 19 muri bo baburanira mu nkiko zo mu Rwanda nyuma yo gufatwa bamaze kugaba ibitero bitandukanye mu 2018.

Uhereye ku wari umuyobozi wabo Callixte Nsabimana, ukageza ku musirikari wo hasi bose bagize uruhare mu bitero byagabwe i Nyabimata muri Nyaruguru bigahitana abantu icyenda, abandi bagakomereka, imodoka zigatwikwa imitungo igasahurwa, bose bari kuburanishwa mu nkiko. Ni nako bimeze ku mukoresha wabo Paul Rusesabagina wafashwe muri Kanama uyu mwaka.

Abakekwaho ibyaha bakomeye bahoze mu mutwe w’iterabwoba wa FDLR barafashwe bagezwa mu rukiko. Ni nako byagenze ku barwanyi bahoze muri RNC boherejwe mu Rwanda nyuma yo gufatirwa mu burasirazuba bwa Congo, ubu bari kuburanishwa.

None kuki nk’uko ABC ibivuga, u Rwanda ‘rwakwica abavandimwe’ b’abandi banyarwanda baba muri Australia? Ntabwo aribyo na busa.

Ibyo ABC yatangaje ibibwiwe na Zibahamwe nta kindi bimaze uretse icengezamatwara risa, risanzwe rikwirakwizwa n’imitwe cyangwa abantu ku nyungu zabo za politiki bagamije guharabika ubuyobozi bw’u Rwanda. Kenshi abantu nk’abo baba bari mu mahanga.

Abo bagizwe ahanini n’abahunze ubutabera bagize uruhare muri Jenoside yakorewe Abatutsi, cyangwa se ababakomokaho bakwirakwiza ingengabitekerezo ya Jenoside cyangwa abandi bafite inyota y’ubutegetsi bumva ko bazabugezwaho n’iterabwoba n’ibindi bikorwa bya kinyamaswa. Noel Zihabamwe ari muri icyo cyiciro cya nyuma.

Ntabwo ari impunzi nk’uko abivuga. Yavuye i Kigali mu 2000 agiye kwiga muri Australia kuri buruse ya Guverinoma y’u Rwanda.

Yagiye ku mazina ye bwite yitwa Noel Yandamutso, nyamara ubwo igihe cyo kwiga cyarangiraga, aho kugaruka yagumyeyo.

Ku mpamvu ze bwite, yahinduye amazina yiyita Noel Zibahamwe. Ubwo nibwo yatangiye ibikorwa byo gushakisha no gutera inkunga imitwe irwanya u Rwanda nka RNC n’indi. Aho aba muri Australia, yagiye akora ibishoboka byose ngo atize umurindi ibikorwa byose bigamije kubuza u Rwanda umutekano.

Ubu ageze aho abeshya ko abavandimwe be bashimuswe, ngo kuko yanze gukorana na Guverinoma y’u Rwanda. Ikizwi ni uko abo bavandimwe bashobora kuba barabaye nka we bakayoboka imitwe yitwaje intwaro.

Iperereza twakoze rigaragaza ko Zibahamwe afite abavandimwe benshi mu Rwanda. Baba abari i Kigali cyangwa Huye n’ahandi, nta kibazo cy’umutekano bafite.

Umwe muri bo ni mubyara we Jean Pierre Nkurikiyinka utuye i Muhanga, akaba ari umukozi wa banki. Ni umuturage ubayeho nk’abandi banyarwanda bubahiriza amategeko.

Nyina wabo wa Zibahamwe, Antonia Nyirabega abayeho mu mahoro ku Kimironko mu Mujyi wa Kigali. Abana be barindwi bose babayeho ubuzima busanzwe, ntawe ubasagarira.

Hari na mubyara wa Zibahamwe utuye Kanombe ukorera Leta. Zibahamwe afite n’abandi bo mu muryango we benshi batuye mu Rwanda.

Ukuri ni uko Zibahamwe ari gukoresha ikinyoma cy’uko abavandimwe be baburiwe irengero, agamije icengezamatwara ngo agere ku migambi ye ya politiki.

Ni ikinyoma kigaragarira buri wese kuvuga ko abavandimwe ba Zibahamwe cyangwa undi wese yishwe kubera ko hari mwene wabo utavuga rumwe na Leta y’u Rwanda uri mu mahanga.

Ahubwo hari ibihamya ko Zibahamwe amaze kugera muri Australia, yihinduye impirimbanyi y’uburenganzira bwa muntu, ngo ahishe intego ze nyamukuru zo gutera inkunga no gukorana n’imitwe igamije guhungabanya u Rwanda.

Uwo mwambaro wo kwigira impirimbanyi y’uburenganzira bwa muntu wari ufite ikindi uhatse: Gushakisha inkunga mu matsinda y’abantu baba muri Australia n’abantu ku giti cyabo, ubundi inkunga ahawe akazoherereza RNC n’indi mitwe yitwaje intwaro ngo bazikoreshe mu bikorwa bibi. Icyakora niba atekereza ko hari icyo bizatanga, ashobora kuba yarayobye inzira.

Niba yarahisemo kuba urwanya Leya, kuki ashaka kuyobya abantu cyangwa akabeshyera abavandimwe be aho baba bari hose? Abamuzi bamutubarize.

Zibahamwe amenyereweho kujijisha muri Australia agamije kubona amafaranga yo koherereza imitwe y’iterabwoba. Ntari wenyine kandi kuko afatanyije n’abandi baba mu Bubiligi, Leta Zunze Ubumwe za Amerika, Canada n’ahandi bamaze igihe babikora.

Icyakora, hari abandi benshi bagenzi babo baba mu mahanga bakora ibishoboka byose boherereza imiryango yabo amafaranga babonye, bagamije kubaka igihugu cyabo.

Imibare ya BNR igaragaza ko kugeza muri Werurwe uyu mwaka, amafaranga yoherezwa n’abanyarwanda baba mu mahanga bayoherereza imiryango yabo yari ageze kuri miliyoni 18.9 z’amadolari. Iyi mibare kandi byitezwe ko iziyongera mu gihe coronavirus izaba icogoye.

Iyi mibare ni ikimenyetso cy’uburyo abantu bayobye nka Zibahamwe bari kure yo kubaka u Rwanda ahubwo bagamije kurusenya.

Aba banyarwanda boherereza amafaranga imiryango yabo ngo ayifashe kujya mbere, batandukanye na Zibahamwe na bagenzi be bayapfusha ubusa bayahereza imitwe ihugabanya u Rwanda. Ubu se byabagejeje kuki? Nta na kimwe.

Abantu bose bamaze igihe bitanga amafaranga, bagakwirakwiza icengezamatwara, bakajya gushakira abayoboke RNC ya Kayumba Nyamwasa, bageze kuki? Nta na kimwe. Bamwe bashiriye mu mashyamba ya RDC, baguye mu ntambara, abandi barafatwa bazanwa kuburanishwa.

Reba abantu n’amatsinda yakoranye na ALIR mu mashyamba ya Congo aribo babyaye FDU Inkingi ya Victoire Umuhoza, ubu bageze kuki? Habe na mba! Babuze epfo na ruguru byarabashobeye.

Ubu se ibihugu bitera inkunga iyi mitwe nka RNC, FDLR, RUD Urunana, byungutse iki urebye amafaranga bimaze kuyishoramo? Nta na kimwe.

Na Zibahamwe ararushywa n’ubusa nk’abandi bose.

Zibahamwe yahimbye ikinyoma cy'uko abavandimwe be bashimuswe agamije inyungu ze za politiki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .