00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yaduhaye urugero rwiza, dusure ingoro ndangamurage

Yanditswe na Mutangana Steven
Kuya 17 August 2022 saa 08:58
Yasuwe :

Ubwanditsi: Ibikubiye muri iyi nyandiko ni ibitekerezo bwite by’umusomyi wa IGIHE, Mutangana Steven.

Nta rwitwazo dufite rwo kutahagera. Nubwo bamwe bavuga ko gusura ingoro ndangamurage ari iby’abazungu, si byo. Ni izacu, zirimo amateka yacu. Tuzisure aho turi mu miryango.

Perezida wa Repubulika y’u Rwanda Paul Kagame yaduhaye urugero rwiza, turukurikize tuzunguka byinshi abato n’abakuru. Uko mbibona, nshingiye ku rugero rwiza yaduhaye mu myaka 15 ishize ndetse n’uko ahandi mu mahanga bikorwa:

Muri 2007 Perezida Kagame yasuye Ingoro ndangamurage n’umuryango we

Muri 2007, Perezida wa Repubulika Paul Kagame, ari kumwe n’umuryango we, basuye Ingoro ndangamurage i Huye n’i Nyanza mu Ntara y’Amajyepfo.

Uru ruzinduko ntirwari mu rwego rw’akazi, nk’uko twabisomye mu kanyamakuru i Kambere N0 005, 2007, cyandikirwaga mu Kigo cy’Igihugu cy’Ingoro Ndangamurage z’u Rwanda.

Mu mwaka wakurikiyeho, 2008, uwayoboraga iki kigo, Prof Kanimba Misago Celestin, afatanyije na Van Pee Lode, yasohoye igitabo kinini kiri mu ndimi eshatu kiranga ubwiza bw’umurage ndangamuco cyitwa "Rwanda: Its cultural heritage. Past and Present".

Iki gitabo gifite agaciro ko ku rwego rwo hejuru dore ko kirimo ijambo ry’ibanze rya Perezida Paul Kagame.

Muri iryo jambo ry’ibanze, Perezida Kagame asaba Abanyarwanda guhugukira umurage w’u Rwanda, kuwuha agaciro ukwiye no kumenya umwihariko ubaranga mu ruhando rw’amahanga.

Ati "Icyo dukomeyeho ni uguhagurukira kurinda ubusugire bw’umwihariko w’abenegihugu, kuko tutarebye neza ushobora no kuzima rwose." Akomeza agaragaza ko "umuco wose aho uva ukagera ugomba gukomera ku busugire bwawo."

Icyo gitabo cyandikwa, hari hagamijwe gusobanurira abantu iby’ingenzi bimuritse mu ngoro ndangamurage iri i Huye, byibanda ku byaranze imibereho y’Abanyarwanda.

Kuba Umukuru w’Igihugu yarasuye ingoro ndangamurage ari kumwe n’umuryango we, biduha urugero rwiza rw’uko buri munyarwanda na we akwiye kubikora.

Ubu ntawakwitwaza ko mu Rwanda nta ngoro ndangamurage zihari. Zimaze kuba nyinshi: Hari iyo mu karere ka Huye, izo mu karere ka Nyanza, iyo mu karere ka Karongi, izo mu Mujyi wa Kigali n’iyo mu karere ka Gicumbi zakira abantu b’ingeri zose, abakuru n’abato, iminsi yose.

Nta n’uwakwitwaza ko atabona umwanya cyangwa ubushobozi bwo kuzisura, kuko bidahenze, kandi umwanya wo kunguka ubumenyi no kwidagadura utabura, ukurikije igihe abantu batakaza rimwe na rimwe mu bitabafitiye akamaro.

Muri ibi bihe by’ibiruhuko, ababyeyi baba bakwiye kwibwiriza bakajyana abana mu ngoro ndangamurage, dore ko hari ibyo abana biga mu mashuri basobanukirwa kurushaho, iyo bazisuye.

Mu babyeyi tuzi ko hari abagira imirimo ibaha amafaranga aborohereza kugera ahantu nk’aha, iyo bari mu kiruhuko.

Ayo mafaranga hari inzego za Leta n’iz’abikorera ziyaha abakozi buri mwaka uko bagiye muri kiruhuko cy’umwaka (pecule de vacances). Hari kandi uburyo bugenda bushyirwaho n’ibigo by’amashuri, bikageza abana ku ngoro ndangamurage.

Mu turere naho hari abayobozi batangiye gutera intambwe nziza yo kuhageza abakozi batwo.

Bizarushaho kuba byiza ibikorwa nk’ibi nibishyirwa mu igenamigambi rya buri mwaka, mu nzego za Leta n’iz’abikorera.

Ntibizaba ari ugutembera gusa. Bizaba ari ugufasha Abanyarwanda kumenya amateka yabo kugira ngo barusheho kuyabungabunga no kwimakaza Ndi Umunyarwanda, kuko nibamenya umurage basangiye, bazubaha ubumwe bwabo baburinde icyabubangamira.

Abenegihugu bakorere ubukerarugendo iwabo

Ubu buryo nasanze bukoreshwa cyane mu bihugu bya Aziya nko mu Bushinwa, aho nageze nkibonera uko ku ngoro ndangamurage n’ahandi hantu ndangamateka haba ari urujya n’uruza rw’abenegihugu basura ahari amateka y’iki gihugu, kandi ukabona babyishimiye.

Mu bihugu by’Abarabu nko mu Misiri, naho nasanze ari uko.

Gusura ingoro ndangamurage cyangwa ahandi hantu ndangamateka ntibitegereza abava kure. Ni ibintu abenegihugu bamenyereye. Ababyeyi usanga bajyana n’abana babo.

Mu burengerazuba bwa Afurika, mperutse guhurira n’abaturage benshi ba Sénégal ku kirwa cya Gorée (hamwe hanyuzwaga abacakara b’Abanyafurika bajyanwa muri Amerika).

Uko nabibonye, ubwo bukerarugendo ntibukorwa n’abavamahanga, ni ibintu bimenyerewe, aho abakuze, ababyiruka n’abana baba ari benshi kandi bikagenda neza cyane.

Nabonye n’abanyeshuri by’umwihariko bazana n’abarezi babo inshuro nyinshi ku ngoro ndangamurage yitwa Musée Théodore Monod d’art africain, iherereye mu mujyi wa Dakar.

Iyo ibikorwa nk’ibi bishyigikiwe, abaturage bakabimenyera, bikajya mu buzima bwa buri munsi, bigira akamaro mu buryo bwinshi harimo no guteza imbere ubukerarugendo bukozwe n’abenegihugu imbere mu gihugu (tourisme domestique).

Ibi kandi bizwi nka kimwe mu byafashije ibihugu kuzahura ubukungu mu bihe byatewe n’icyorezo cya COVID-19.

Raporo y’Ishami ry’Umuryango w’Abibumbye ryita ku burezi, ubumenyi n’umuco (UNESCCO) yo muri 2020, igaragaza ko Ingoro ndangamurage ku Isi zafunze imiryango ku gipimo cya 90% mu bihe bya COVI-19.

Aho bari bamenyereye ubukerarugendo bukozwe n’abenegihugu, ntibatinze kuzahura ubukungu bushingiye ku bukerarugendo.

Ariko aho bahora bategereje ba mukerarugendo bava mu mahanga kurusha uko babumenyereza abaturage babo, byarabagoye kuko ingendo mpuzamahanga zagize imbogamizi.

Dukunde ingoro ndangamurage z’iwacu, tuzisure, tujyaneyo n’abagize umuryango.

Perezida Kagame mu mwaka wa 2017 ubwo yafunguraga ku mugaragaro inzu ndangamurage y’amateka y’urugamba rwo guhagarika Jenoside

Mutangana Steven
Umusomyi wa IGIHE.COM


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .