00:00:00 IGIHE NETWORK KN KINYARWANDA EN ENGLISH FR FRANCAIS

Niyitegeka Félicité, intwari na Kiliziya ikwiriye gushyira mu batagatifu

Yanditswe na Mutangana Steven
Kuya 24 Mutarama 2021 saa 08:01
Yasuwe :
0 0

Ubutwari bwa Niyitegeka Félicité bwahawe agaciro na Leta y’u Rwanda. Inama y’Abaminisitiri yo ku wa 12 Nzeri 2001 yemeje ko Niyitegeka Félicité ari mu Ntwari z’Igihugu, mu cyiciro cy’Imena. Iki cyemezo cyashimangiwe n’Iteka rya Perezida Nº 18/01 ryo kuwa 26 Gashyantare 2013 ryemeza abagizwe Intwari z’Igihugu.

Nk’uko tubisoma mu Igazeti ya Leta Nº 12 yo ku wa 25 Werurwe 2013, Niyitegeka Félicité ari mu cyiciro cy’Imena hamwe n’izindi Ntwari: Umwami Mutara III Rudahigwa Chearles Léon Pierre, Uwiringiyimana Agathe, Rwagasana Michel n’Abanyeshuri b’i Nyange bigaga mu mwaka wa gatanu bagera kuri makumyabiri n’icyenda (29) n’abigaga mu wa gatandatu bagera kuri cumi n’umunani (18).

Iyo ugeze mu Ngoro y’amateka yo guhagarika Jenoside yakorewe Abatutsi iri ku Ngoro y’Inteko Ishinga Amategeko, Kimihurura mu Mujyi wa Kigali, usangamo n’icyumba kigaragaramo amateka yo gushimira abasivili b’abenegihugu n’abanyamahanga bitanze bakagira uruhare mu guhisha Abatutsi bahigwaga. Na Niyitegeka Félicité arimo.

African Rights, umuryango uharanira uburenganzira bwa muntu ku rwego mpuzamahanga, nawo wasohoye igitabo gikubiyemo amazina n’ubuhamya ku bantu baranzwe n’ubwitange mu gukiza abahigwaga muri jenoside yakorewe Abatutsi. ku rutonde rwasohowe nyuma y’imyaka umunani jenoside yakorewe Abatutsi ibaye, harimo abagore n’abagabo, abihayimana n’abaturage basanzwe by’umwihariko na Niyitegeka Félicité.

Ku gicumbi cy’Intwari i Remera mu Mujyi wa Kigali, hari ikimenyetso cy’iyi Ntwari hamwe n’icy’izindi zose zemejwe. Aho yabaga, mu mujyi wa Gisenyi ho mu karere ka Rubavu, ahitwaga Centre St Pierre, ubu haratunganyijwe, harabungabungwa, mu rwego rwo gusigasira amateka yaranze iyi Ntwari y’Igihugu.

Kiliziya yo mu Rwanda ifite umushinga wo kumushyira mu bahire

Mu gitabo « Félicité Niyitegeka, une lumiere dans la nuit rwandaise, agir face à l’inacceptable », cyanditswe na Padiri Jean d’Amour Dusengumuremyi mu 2019 ; harimo ubuhamya bwinshi bw’abamenye Niyitegeka Félicité kuva akiri muto kugeza atabarutse. Abo yareze, abo yahishe muri jenoside yakorewe Abatutsi, abanyamahanga bamenye ubutwari bwamuranze, n’abandi.

Mgr Servilien Nzakamwita, Umushumba wa Diyosezi ya Byumba akaba na Perezida wa Komisiyo y’Abepisikopi ishinzwe iyogezabutumwa ry’abalayiki mu Rwanda, mu ijambo ry’ibanze yanditse muri iki gitabo, yemeje ko iyi Komisiyo ifite umushinga ugamije gushyira Niyitegeka Felicite mu rwego rw’abahire nk’uwahowe Imana. Uwo mushinga ukazashyikirizwa inzego zibishinzwe muri Kiliziya Gatulika.

Mgr Nzakamwita, muri iki gitabo, avuga ko abantu bashobora gutangira kwiyambaza Niyitegeka Félicité, hagira ubona igitangaza akazakimenyekanisha.

Mu nkuru yanditswe muri La Nouvelle Releve N0 437 yo ku wa 15 Ukuboza 2001 (Urup. 1, 21-23) naho hari ubuhamya burebure bwo ku musozi akomokaho i Vumbi ho mu Ntara y’Amajyepfo, ku Nyundo no mu Mujyi wa Gisenyi ndetse no mu bice bitandukanye byo mu Mujyi wa Kigali. Abaganiriye n’iki kinyamakuru banejejwe n’uko Niyitegeka ari mu Ntwari z’Igihugu ariko abenshi bongeragaho icyifuzo cy’uko Kiliziya yazamushyira mu rwego rw’abatagatifu.

Iyo umuntu wagize neza azirikanwe ku mugaragaro, bibera abakiriho urugero rwiza, bakagerageza gutera ikirenge mu cye, bimakaza indangagaciro zamuranze.

Twibutse ko Félicité Niyitegeka yavutse mu 1934, i Vumbi mu cyahoze ari Sheferi ya Nyaruguru, ubu ni mu karere ka Huye, mu Ntara y’Amajyepfo. Yishwe ku wa 21 Mata 1994, mu gihe cya Jenoside yakorewe Abatutsi kubera ko yanze kwitandukanya n’abo yari yahaye ubuhungiro hamwe na bagenzi be, mu muryango wa Auxiliaires de l’Apostolat, bari mu kigo cya Centre St Pierre, i Gisenyi.

Ibikorwa by'ubwitange bya Niyitegeka Félicité byatumye ashyirwa mu ntwari z'u Rwanda

Mutangana Steven, Umusomyi wa IGIHE.COM


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .