00:00:00 IGIHE NETWORK KN KINYARWANDA EN ENGLISH FR FRANCAIS

Kuki uko amadini arushaho kwiyongera ari nako ibyaha byiyongera?

Yanditswe na Urinzwenimana Mike
Kuya 4 Ukuboza 2020 saa 08:20
Yasuwe :
0 0

Iyo usomye Bibiliya igaragaza ko icyazanye Yesu ari ukugira ngo abazamwizera, bakamukurikira bazabone ubugingo kandi bwinshi.

“Umujura ntazanwa n’ikindi keretse kwiba no kwica no kurimbura, ariko jyeweho nazanywe no kugira ngo zibone ubugingo ndetse ngo zibone bwinshi." (Yohana 10:10); ubugingo bwinshi bisobanuye: umwuka, ubugingo n’umubiri biguwe neza kandi bitariho umugayo.

Intumwa Pawulo yandikira Itorero ry’i Tesalonike yasobanuriye abarigize ibice by’ingenzi biranga umukirisitu ukuze utabonekaho umugayo kugeza igihe Yesu azagarukira. Ibi bivuze ko n’abakuru b’itorero ry’i Tesalonike bagombaga kurera abakirisitu bakitwararika ku kumenya ko bakuze mu mwuka, ubugingo n’umubiri.
Umukirisitu udakuze muri ibi byiciro aba ariho umugayo mu maso y’Imana kandi umuyobozi w’itorero udakuza abo ayoboye mu mwuka, mu bugingo no mu mubiri ntabwo aba asohoje umugambi w’Imana ku bo ayoboye.

"Imana y’amahoro ibeze rwose, kandi mwebwe ubwanyu n’umwuka wanyu, n’ubugingo n’umubiri byose birarindwe, bitazabaho umugayo ubwo Umwami wacu Yesu Kristo azaza." (1 Abatesalonike 5:23).

Dushingiye ku byo dusoma muri Bibiliya bivuze ko uko abantu bemera Yesu Kirisitu, bamukurikira n’imibereho yabo yakagombye kuba ihinduka kandi neza.

Bamwe mu bayobozi b’amatorero n’amadini atandukanye , mu butumwa babwira abayoboke bayo ni uko bazajya mu Ijuru, babaha amasezerano yo kubaho neza, gutunga amafaranga menshi, kubona abagore n’abagabo, kwiga amashuri menshi, kuzamurwa mu ntera n’ibindi.

Mu gihe itorero rifite inshingano zo kwigisha no guhindura abantu haba mu mico no mu myifatire, benshi bibaza impamvu ki ubwiyongere bw’amadini n’amatorero bitajyana n’impinduka mu buzima bw’abayagana?

Uko amadini n’amatorero yiyongera niko n’ibyaha byiyongera

Imibare y’Urwego rw’Igihugu rw’Imiyoborere, RGB, yo kuva u Rwanda rwabona ubwigenge mu mwaka wa 1962 kugeza mu 2012, yerekana ko mu gihugu habarurwaga amatorero n’amadini atarenga 180. Naho kuva mu 2012 kugeza mu 2018, amadini n’amatorero yageze ku 1500.

Aya si yo gusa ari mu Rwanda ahubwo niyo yiyandikishije muri RGB kandi itegeko riteganya ko n’utariyandikishije ashobora gusaba icyangombwa mu murenge agakora, bivuze ko ashobora kurenga.

Mu mibare itangazwa na Minisiteri y’Ubuzima y’abana basambanyijwe bagaterwa inda z’imburagihe bakabyarira kwa muganga igenda yiyongera. Mu 2016, abo bangavu bari 17,849; mu 2017 baba 17,337, umwaka wa 2018 bageze ku 19,832, mu gihe imibare y’abasambanyijwe bagaterwa inda hagati y’ukwezi kwa Mutarama na Kanama 2019 bari 15,656.

Imibare itangazwa n’Ubushinjacyaha igaragaza ko muri rusange mu Rwanda, kuva muri Nyakanga 2017 kugera mu Ukuboza kwa 2019, amadosiye y’abasambanyije abana yashyikirijwe Ubushinjacyaha yari 8,212, ayoherejwe mu nkiko yari 5,305, naho imanza zasomwe kugeza icyo gihe zari 4,026, muri zo Ubushinjacyaha bwatsinze izigera ku 3,043.

Muri raporo y’ikigo cy’ibarurishamibare yiswe ‘Rwanda Vital Statistics Report 2019’ hagaragajwe ko muri gatanya zatanzwe n’inkiko zo mu Rwanda mu mwaka ushize, mu Mujyi wa Kigali hatanzwe 2400, mu Majyepfo ni 1989, mu Burengerazuba ni 1820, mu Burasirazuba hatanzwe 1482 naho mu Majyaruguru ziba 1250.

Ufashe gatanya zatanzwe mu 2019 ukagereranya n’imiryango yashyingiwe mu buryo bwemewe n’amategeko uwo mwaka, wavuga ko nibura mu 100, imiryango 18.4 yatandukanye Kuko imibare yakusanyijwe mu ikoranabuhanga rikoreshwa n’inzego z’ibanze igaragaza ko uwo mwaka hashyingiwe imiryango 48526 mu buryo bwemewe n’amategeko.

Ubushakashatsi bushya bwa NISR ku baturage n’imibereho yabo bwa 2020 bugaragaza ko mu Rwanda abana bari munsi y’imyaka itanu y’amavuko bagwingiye kubera imirire mibi ari 33%.

Dushingiye ku kigereranyo kivuga ko byibura 94% by’Abanyarwanda ari abayoboke bafite amadini n’amatorero babarizwamo, kandi kuva 2012 kugeza mu 2018 aya madini n’amatorero akaba yariyongereye ku kigero cya 833%, uwavuga ko abenshi mu bana basambanyijwe bagaterwa inda z’imburagihe n’ababasambanjije, abenshi bahamwe n’ibyaha mu nkiko, abenshi mu bashakanye batandukanye, abana bagwingiye ari ababarizwa mu madini n’amatorero atandukanye ntiyaba agiye kure y’ukuri.

Ibi bigaragaza ko abayobozi b’amadini n’amatorero n’abayoboke babo batageze ku ntego yazanye Yesu yo kugira ngo intama zibone ubugingo ndetse ubugingo bwinshi kandi ntibashoboye kubahiriza impuguro za Pawulo zo kwezwa no kurindwa mu mwuka, mu bugingo no mu mubiri.

Abayobozi b’amadini n’amatorero bakwiye guhindura inyigisho, abayoboke nabo bagahindura imyumvire n’imyitwarire

Yesu yabwiye Abayuda bamwemeye ko bakwiye kumenya ukuri kandi uko kuri kukababatura. “Nuko Yesu abwira Abayuda bamwemeye ati "Nimuguma mu ijambo ryanjye muzaba abigishwa banjye nyakuri, namwe muzamenya ukuri kandi ukuri ni ko kuzababatura." (Yohana 8:31;32).

Abayobozi b’amadini n’amatorero bakwiye guhindura inyigisho bakabwira abayoboke babo ukuri kuko umukirisitu muzima ari ufite ibikwiye byose mu mwuka, mu bugingo no mu mubiri.

Bakwiye kubatoza gusabana n’Imana mu mwuka, bagasenga, bakiga ijambo ryayo kandi bakayoborwa n’Umwuka Wera, bakabatoza kubana n’abandi neza, bakirinda ibikomeretsa ibyiyumviro, amarangamutima n’ibisongamubiri byabo kuko nibwo bazaba bazima mu mwuka.

Abanyamadini bakwiye kwigisha abayoboke babo gukora cyane, guhuza ibyo bizera nk’amasezerano n’amahame yo gukora cyane azatuma babona ibyo kurya no kunywa, kwambara n’ibindi bibahagije.

Abayobozi b’amadini n’amatorero bakwiye guhagarika kwigisha abayoboke babo ko hari icyo bashobora kubona mu bifatika by’uyu munsi batakoze ndetse n’abumvise ubwo butumwa na bo bakabushungura ntibabumire bunguri.

Ubuhanuzi bwizeza abantu ibitangaza bubusanye n’ijambo ry’Imana kuko ritubwira ko abakiranutsi bazagubwa neza kuko bazatungwa n’imirimo y’amaboko yabo.
Muri Yesaya 3:10 hagira hati “Muvuge ko abakiranutsi bazagubwa neza, kuko bazatungwa n’imirimo y’amaboko yabo.’’

Abayoboke b’amadini nabo, bakwiye gushishoza mu kwakira no gukurikira ibyo bigishwa kuko niba umuntu akubwira ibintu bidahindura ubuzima bwawe umwaka umwe, ibiri cyangwa itatu, ukwiye kubona ko uwo muntu udakwiye gukomeza kumutega amatwi kandi bakwiye kureka imyumvire ibashyira mu bubata bwo kumva ko hari icyo bageraho badakoze.

Bakwiye gutera umugongo ubuhanuzi bw’ibitangaza, inyigisho zibasaba gutanga ibitambo n’ibindi ngo nibwo Imana izabakorera ibi nibi bakazihunza. Ikintu kimwe cyonyine kizakubwira ko idini cyangwa itorero urimo ari iry’ikinyoma kandi ukwiye kurivamo ni uko uzamaramo igihe runaka nta mpinduka ugira mu mwuka, mu bugingo no mu mubiri.

Ubwo Yesu yaganiraga n’umusamariyakazi yasanze ku iriba akamusaba amazi yo kunywa, yagerageje kubwira Yesu amateka y’imihango yabo itarashoboraga gutuma babana neza ariko Yesu amubwira ko igihe kigeze kandi gisohoye ko abantu bakwiye kuva mu mitekerereze ya kera itagira icyo ibahinduraho yaba mu mwuka, mu bugingo no mu mubiri ahubwo bagahindura uburyo bagasengera mu kuri no mu Mwuka.

Birakwiye ko abayobozi b’amadini n’amatorero n’abayoboke babo bareka gukomeza kugendera ku myizerere, imitekerereze itagira icyo ibahinduraho ahubwo ikintu cyose bakagikora mu mwanya wacyo.

Mu myaka mike ishize, amadini yariyongereye cyane mu Rwanda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .