IFOTO (Igice cya 9): Uburyo ifoto yabahuje kugeza ubwo urukundo rwabo rumenywe n’Isi

Yanditswe na

Nshimyimana Leonidas

Kuya 17 Nyakanga 2015 saa 12:29
Yasuwe :
0 0

Mu gice cya mbere cy’inkuru ndende “IFOTO” twabagejejeho uburyo Kalisa yahuye n’umwari utagira uko asa, uburyo yagize ikibazo akamuramiza ibiganza akamujyana kwa muganga, mu bice byakurikiyeho dukomeza kubagezaho ibyakurikiye, ndetse tuzakomeza kubibagezaho kugeza ubwo muzamenya uburyo ifoto yahuje umukobwa n’umuhungu kugeza ubwo urukundo rwabo rumenywe n’Isi.

Mu gice kibanziriza iki, twasozaga Gaju arimo abwira Yvette ibyamubayeho amugaragariza ko abyibuka, aho yarimo amubwira ko yakataje mu muhanda nta n’inyoni itamba, ariko akongeraho ati "...uuh ariko se, nageze ku kiliziya se ? Ko ntabyibuka ra ? None se, ifoto narayimuhaye se ? Uuh, kwa muganga se, no Yvette simbyibuka".

Icyo gihe Gaju yahise ahaguruka yiruka yerekeza mu cyumba cye, Yvette na we amusanga yo yihuta ngo atongera kugira ikibazo nyamara yasanze Yvette ya...(Byaje).

Igice cya cyenda

Gaju yahise ahaguruka yiruka yerekeza mu cyumba cye, Yvette na we amusanga yo yihuta ngo atongera kugira ikibazo nyamara yasanze Yvette yamaze gusandaguza ibintu byose kuko yumvaga mu byo yatekereje atumva iherezo ry’aho ifoto iri.

Yvette yamufashe ku rutugu amusaba gutuza bakaganira neza. Gaju yamubajije niba ari bumubwire aho ifoto iri, amubwira ko atuza byose akabimubwira. Bicaye ku gitanda Yvette asaba Gaju kumutega amatwi neza akamusobanurira inzira ye uko yagenze.

Gaju yatangiye kumwumva, hanyuma Yvette araterura ati: "Gaju unyumve neza. Ibyo utekereza wakoze si ko wabikoze wowe wabikoze mu nzozi. Byose warabikoze ugera n’aho usohoka ugenda mu muhanda werekeza ku kiliziya, ariko wahuye na Kalisa akwikangamo ikindi kintu kuko hari nko mu ma saa sita z’ijoro. Yaragukanze uhita ukanguka ariko kubera wikanze cyane uhita uta ubwenge, ni ko kugutabariza kwa muganga bazana imbangukiragutabara ikugeza kwa muganga. Wabaye umunyamahirwe cyane kuko babashije kugufasha ukagaruka, n’aho ubundi wakagombye no kuba warapfuye. Naho kuba warageze aho wagombaga gutegerereza Muganza ntiwagezeyo. Ifoto rero wari ujyanye ni Kalisa uyifite kuko abaganga bayimuhaye bakeka ko ari iye, kugeza ubu aracyayibitse kandi mu byo azira na cyo kirimo kuko Muganza yarayimubonanye undi arayimwima”.

Gaju yahise yubika umutwe yibaza ukuntu yabyutse akamanura ifoto akarinda agera ubwo ahura n’umuntu mu muhanda asinziriye yumva arayobewe. Gusa yariyakiye ariko abaza Yvette niba azakira ibintu nk’ibyo. Yamushubije ko muganga yababwiye ko bishoboka, anabasaba kumuba hafi.

Yiyemeje kujya kureba Kalisa ku bitaro ariko agenda wenyine. Ahageze yasanze Kalisa akimeze nabi, amukubise amaso amarira azenga mu maso, ariyumanganya ngo murumuna wa Kalisa atabibona, nyamara byaramwangiye araturika ararira.

Murumuna wa Kalisa utari uzi uwo mukobwa yamubajije uwo ari we amusobanurira ko ari we Kalisa yazanye mu bitaro. Uwo muhungu yamubwiye ko yari yaramwumvise, baramenyana. Gaju yamubajije niba hari ifoto Kalisa yaba afite mu rugo, murumuna we amwemerera ko ayifite. Gaju yamusabye kumusigarira kuri Kalisa akajya kuyimuha, undi na we arabyemera ajya kuyimuzanira.

Mu kugaruka yahageze asanga umuyobozi wa banki Kalisa akoramo yaje kumureba, asanga amerewe nabi ahita asaba abaganga iyimurwa rye bakamujyana mu bitaro bikuru byitiriwe umwami Fayisali i Kigali.

Byafashe iminsi ibiri ngo ibyangombwa byo kwimurwa biboneke, ni uko murumuna wa Kalisa abanza gusubira mu rugo gufata imyenda no kubwira abaturanyi uko bimeze, abasaba kuzabamenyera urugo barabimwemerera, agaruka ku bitaro bitegura kugenda.

Gaju yasabye muganga kuba yihanganye gato ngo babe baretse kujyana Kalisa. Barabimwemereye gato ariko babanza kumubaza impamvu. Ntiyarushye abasubiza ahubwo yahise afata ya foto asohoka yiruka bamubona arenga basigara bamanjiriwe.

Muri uko kwiruka Gaju ya... (Biracyaza).

Ntuzacikwe n’igice cya cumi cy’iyi nkuru ngo umenye aho Gaju yarenganye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .