Bitwaye iki tugize Gura cyangwa Gendana igitabo Munyarwanda?

Yanditswe na Hategekimana Richard
Kuya 11 Kamena 2020 saa 04:05
Yasuwe :
0 0

Gusoma igitabo, ni ukurambura urupapuro ku rundi, ukagisogongera, ukaryoherwa,ukacyuza kikinjira mu bwonko, kigafumbira ubumenyi, kikagura ibitekerezo kikirukana agahinda mu mutima, kikavura umubabaro kandi kikaruhura umubiri.

Umuntu usoma ibitabo ahorana indangagaciro zirimo iyo kugisha inama, kugirwa inama ndetse n’iyo kujya inama.

Hari inshuti yanjye yigeze kumbwira ko mu ngengo y’imari ye ndetse n’aho akora mu kazi bahorana ingengo y’imari yo kugura ibitabo.

Akenshi mu bihugu byacu bya Afurika, hari ubwo benshi babona kugura igitabo atari ikintu bashyira imbere bitewe n’ubwinshi bw’ibyo baba bakeneye. Gusa igitangaje ni uburyo hari n’ababona amafaranga bakayapfusha ubusa, bakayajyana mu bintu bidafite umumaro ugasanga ntashobora no kugura agatabo k’umwana.

Muri iki gihe cy’ikoranabuhanga usanga urubyiruko arirwo gusa dutezeho amakiriro kandi niko bimeze koko kuko nibo mizero y’ejo hazaza. Gusa njye mpora nibaza nti ni gute urubyiruko rwatera imbere ,rukamenya aho ruva n’aho rujya rudasoma ibitabo? Ni gute umuntu yakubaka igihugu adasoma ibitabo?Ni gute wakubaka Afurika udasoma ibitabo?

Hari uwigeze kumbwira ko gusoma ibitabo ari iby’abanyaburayi! Namubwiye ko ibyiza byose atari iby’Abanyaburayi ko natwe kwimakaza umuco wo gusoma ibitabo utubereye kandi ko ari ishingiro rya byose.

Rero si byiza gukunda gusoma agacupa gusa, dukunde no gusoma ibitabo ni ingenzi ku buzima bwawe bw’uyu munsi n’ejo hazaza.

Nidukunda gusoma, tuzaba dusigiye abana bacu umurage mwiza urambye. Dushyizeho gahunda zihariye mu masibo yacu, mu midugudu, aho dukorera zijyanye no gusoma ibitabo ndetse no kubyandika, byafasha mu kwihutisha iterambere ry’Igihugu cyacu, cyane cyane ibitabo birimo indangagaciro na Kirazira zibereye Abanyarwanda n’Abanyafurika.

Urugero dushobora gutangiza nka gahunda ya Kunda igitabo Munyarwanda, Gendana igitabo Ntore y’i Rwanda, Gura igitabo Rubyiruko, Mubyeyi kunda igitabo, Umugoroba w’igitabo, n’izindi gahunda nyinshi abantu batekereza zigashyirwaho zigamije kwimakaza uyu muco mwiza ubereye Abanyafurika b’uyu munsi n’ab’ejo hazaza.

HATEGEKIMANA Richard,
Umwanditsi w’ibitabo akaba na Perezida w’Urugaga rw’Abanditsi mu Rwanda,
E-mail: [email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .