00:00:00 IGIHE NETWORK KN KINYARWANDA EN ENGLISH FR FRANCAIS

Umuti urambye wavugutirwa urubyiruko rukabasha guhangana n’ingengabitekerezo ya Jenoside

Yanditswe na Nsanzabera Jean de Dieu
Kuya 22 April 2022 saa 10:57
Yasuwe :

Muri ibihe by’iminsi ijana Abanyarwanda twibukamo abacu basaga miriyoni bazize Jenoside yakorewe Abatutsi, inkubiri yo kuyipfobya ikomeje gukaza umurego hirya no hino ku isi. Aha akaba ariho hakomeza kwibazwa uzakoma mu nkokora icyo cyago gikomeje kumunga intekerezo za benshi mu Banyarwanda.

Abakomeje kugorwa no guhizura iryo hurizo, ni urubyiruko n’abandi bakiri bato dore ko bagize bagize umubare munini w’Abanyarwanda bose.

Mu biganiro byaciyeho kenshi ku maradiyo no mu mbwirwaruhame byatanzwe mu bihe byo kwibuka Jenoside yakorewe Abatutsi ku nshuro ya 28, imbwirwaruhame nyinshi zagiye ziveba urubyiruko ko nta mbaraga rushyira mu guhangana n’abapfobya Jenoside yakorewe Abatutsi babikorera ku mbuga nkoranyambaga n’amaradiyo akorera kuri murandasi. Aha hakavuka ihurizo buri Munyarwanda wese yahurizaho n’undi, ryo kwibaza ahazava intwaro urwo rubyiruko ruzakoresha mu guhangana n’izo nkuke zihebeye ikibi!

Ugaya impundu z’urushishi, areba inkike rwaturutsemo! Benshi mu rubyiruko dufite mu Rwanda, ni urwavutse nyuma ya Jenoside, bishaka kuvuga ko n’iyo Jenoside batozwa kwamagana benshi ntayo babonye hakaba na bamwe mu bagerageza kuyibabwira badafite ubumenyi buhagije bw’amateka yayo!

Buri wese abivuga uko abyumva, akurikije amarangamutima ye, atitaye ku mateka yiyanditse kandi amateka ntahimbwa kuko aba ari ukuri kw’ibyahise akaba urumuri rumurikira ahazaza.

Abapfobya hari ingingo ebyiri baterura kenshi bagaragaza ishingiro ry’ibyo bavuga ko ari ukuri kandi ziboneka mu mateka y’u Rwanda, waba udasobanukiwe na zo ukagwa mu majune ntubone n’ubwinyagamburiro bwagufasha kuhikura, maze bakakwanjama n’ibitutsi byinshi, dore ko banarangwa n’ikinyabupfura gike!

Izo ngingo bashingiraho bapfobya ukuri kugaragarira benshi, hari kuvuga ko ibihugu byari kuri ubu butaka bw’u Rwanda byose uko ari 29 byari iby’abahutu, bityo bakaba bagomba kwisubiza ibihugu byabo.

Bavuga ko Abatutsi baje ari abavantara baje gukoloniza ibihugu byo muri aka karere harimo n’iby’Abahutu, ari na ko babyigarurira babigira ibyabo. Bityo, umututsi ni umukoloni w’igihe kirekire ukwiye kwamaganwa nk’abandi bose, rubanda nyamwinshi bagasubirana uburenganzira bwabo ku butaka gakondo.

Izi ngingo baheraho bapfobya Jenoside yakorewe Abatutsi nubwo atari nyinshi ariko kuzigobotora biragoye! Yewe, usibye n’abakiri bato, abakuze n’abasheshe akanguhe babasha kuhikura ni bake cyane kuko ari amateka afite umuzi mu myaka isaga 1922 ishize u Rwanda rutangiye guturwa.

Mu guhanga na bo kuri ziriya ngingo, hari ibyo buri Munyarwanda wese akwiye kumenya. Icya mbere, u Rwanda ntirwigeze ruhanganwa ubuhutu, ubutwa n’ubututsi, yewe n’imiryango migari tubumbiyemo yagiye ivuka bitewe n’intera igihugu kigezeho cyiyubaka n’imihigo ya buri wese yagombaga kwesa mu mushinga wo kubaka u Rwanda. Bityo rero, nta bihugu by’Abahutu cyangwa Abatutsi byigeze bibaho.

Ubuhutu, ubututsi n’ubutwa byahanzwe nyuma y’imyaka isaga 1045 u Rwanda rutangiye guturwa (+300-1345), ubwo umwami Cyilima Rugwe yirwanagaho ashakisha abasangirangendo bamufasha kumva kimwe na we umushinga wo kubaka u Rwanda bakanamufasha kuwushyira mu bikorwa no gushaka ibizawugedaho byose.

Nyuma y’aho se Bwimba atabariye u Rwanda wenyine nk’incike kandi afite umuryango, agatabara nk’impehe kandi ari mwami uganje ufite ingabo, akaza kugwa mu Gisaka, ni bwo Rugwe wamuzunguye ku ngoma yasanze uwo mushinga ukomeye wo kwagura u Rwanda, asanga atawinjiramo wenyine kuko yazamera nka se Bwimba watanze atararenga umutaru.

Nyuma yaho ibihugu byari bitangiye guhangwa, byahuriranye n’iyororoka ry’abatangiye gutura u Rwanda banatangiye kwibumbira mu miryango migari y’abakomoka ku muntu umwe. Noneho abahuje umuryango bakarema igihugu cyabo, bityo, bityo, kugeza ubwo bibaye 29. Ibyo bihugu byose, ntabwo byahangiwe rimwe, byahanzwe mu gihe cy’imyaka isaga 920 (300-1120).

Imiryango migari yigabanyije ubutaka ibuhangamo ibihugu. Urugero, Abasinga n’imiryango ibakomokaho bahanze ibihugu 16, Abazigaba n’imiryango ibakomokaho bahanze ibihugu bitandatu, Abanyiginya n’imiryango ibakomokaho bahanze ibihugu bitanu, Abashi n’Abahavu bahanga bibiri. Tutirengagije ko hari n’imiryango nk’Abatsobe, Abashingo, Abungura, Abanyakarama n’Abasita bagiteze bagira ibihugu, ahubwo bibanze ku gutera ingabo mu bitugu bene wabo basangiye inkomoko y’igisekuruza bakazamura ubuhangage bw’ibihugu byabo.

Ibi bikaba bigaragara ko nta bihugu by’Abahutu n’Abatutsi byigeze bihangwa naho iby’Abahutu, Abatutsi n’Abatwa byadukiye ku ngoma ya Rugwe, imiryango yose uko ari 29 yisanze ifite abaturage babarizwa muri ibyo byiciro byombi kandi basangiye igihugu kimwe cy’u Rwanda, nta we ukirushaho undi ubuzare.

Mu Rwanda nta miryango izwiho umwihariko wo kubyara Abahutu, ngo indi igire umwihariko wo kubyara Abatutsi n’Abatwa, ahubwo buri muryango wese washoboraga kugira abanyamuryango bari muri ibyo byiciro byombi.

Ingingo ya kabiri, kuba bavuga ko Abatutsi ari abimukira n’abakoloni b’igihe kirekire, ni ubuhezanguni budafite ishingiro kuko n’ubusanzwe abatuye mu Rwanda bose kimwe n’ahandi henshi ku isi, bafite igisekuruza cya kure cy’aho bakomoka, nta wigeze ahanuka mu ijuru ngo yikubite kuri ubu butaka ngo abuturemo. Bose baje basanga ari amashyamba cyimeza, barayatutira bayahangaho gakondo z’ibihugu bituwe.

Nibo ubwabo bifatiye umwanzuro wo kwihuza hatitawe aho buri wese yakomotse barema igihugu kimwe banahuza imyumvire yo kucyubaka. Uwo murage mwiza abo bakurambere mpangarwanda baremye mu mizo ya mbere wo kugira ubumwe bakanashyikirana bemeranya guhuza intekerezo (philosophie)bazubakiraho igihugu kiri ku butaka bushya bari bamaze gutura, nta n’umwe ukwiye kuwutuvutsa ahubwo twamwivuna, kuko ibihugu biwufite ni mbarwa!

Ikindi bagomba gusobanukirwa, ni uko u Rwanda rutigeze rwubakirwa ku mwuka wo kwihimura, igomwa, ubushotoranyi, urwiyenzo, gatebe gatoki, kwigaranzurana n’ibindi bibi bisa bityo. U Rwanda rwubakiwe ku mwuka w’ubwubahane n’umushyikirano, ufite imbaraga agafasha utazifite akamugeza ku kigero cyiza ariho, ufite intege nke akisunga uzimurusha.

Ibyo bashinja Abatutsi ko bigaruriye ibihugu by’Abahutu, birengagiza ko habayeho amasezerano y’i Nkotsi na Bikara yahuje abami b’ibihugu 29 byari bigandagaje mu Rwanda kandi na bwo ntibyari iby’abahutu cyangwa se abatutsi nk’uko twabibonye.

Bemeranyije kubihuza biba igihugu kimwe cyubakitse kandi kigwije igitinyiro. Ayo masezerano yabaye ahasaga mu wa 1100, ari na yo nkomoko y’umurage wa Gihanga w’igihugu gisangiwe Abanyarwanda baharanira kubungabunga, ari na wo FPR-INKOTANYI irangajwe imbere na Kagame Paul yarwaniye na n’ubu tukinambanye na wo.

Abami b’ibihugu bari bateraniye muri iyo nama y’umushyikirano i Nkotsi na Bikara (ubu ni mu Karere ka Musanze mu Murenge wa Nkotsi) bemeranyije ihuzwa ry’ibihugu byabo uko ari 29 bikaba igihugu kimwe kandi ko uzabitambamira mu ishyirwa mu bikorwa ry’ayo, igihugu cye bazacyigaruza uruhembe rw’umuheto.

Guhangana n'ingengabitekerezo ya Jenoside, urubyiruko rusabwa kumenya amateka

Gihanga wahawe inshingano zo kuba umuyobozi nshingwabikorwa w’uwo mushinga w’ihuzabihugu akaba yaratwaraga igihugu cy’i Gasabo yasize awuraze abana be ngo bazawushyire mu bikorwa mu ngingo zawo zose harimo no kuzarwanya uwo ari we wese uzahirahira ngo arawikuramo.

Amateka y’uruhererekane ku iyaguka ry’u Rwanda, yagiye ataturwa nabi aho bagaragaje ko u Rwanda rwagize ibindi bihugu ingaruzwamuheto mu rwego rwo kwigarurira ubutaka bwabo. Intambara zose zagiye ziba zigamije kwagura u Rwanda, zari izo kurwanya abagomeramurage w’i Nkotsi na Bikara w’igihugu gisangiwe cyagombaga guhuza ibihugu 29 byanze bikunze. Ari na wo wakomeje kugomerwa ubwo Abahutu bicaga Abatutsi bashaka kubarimbura mu Rwanda bakarusigaramo bonyine, kandi ibyo bitari iby’i Rwanda.

Umwuka wo kugomera umurage w’ubusangiragihugu ku buryo bungana ntawe ukirushaho undi ubuzare, ni wo ukomeza guhemberwa ijoro n’umunsi n’abakoze Jenoside yakorewe Abatutsi bakayicengeza no mu babakomokaho.

Umuti w’iki kibazo uzaba uwuhe?

Buri kibazo cyose mu mateka y’u Rwanda kivugutirwa umuti, waba uwangushye cyangwa uw’igihe kirekire, umuti urambye w’iki kibazo cyo guhangana n’abahakana Jenoside yakorewe Abatutsi, ni uko buri Munyarwanda wese ushaka kunamba ku gihugu cye akwiye kwiga amateka y’u Rwanda uhereye mu mizi yayo, akamenya intekerezo z’ihangabuhanga zababashishije Abakurambere mpangarwanda kurema no kubaka igihugu kiramye gihamije igitinyiro, mu mwuka umwe, ubutarushwa n’ubutaneshwa.

Buri Munyarwanda wese by’umwihariko urubyiruko, akwiye kwicara azi amateka y’u Rwanda, kuko ari bwo azahangana n’amacumu acanye y’abadakunda u Rwanda n’abarwo, bahora batera mu Rwanda ngo bagwabize amaboko y’abaruharaniye. Abanyarwanda bakicara ku ntebe imwe, mu gihugu kimwe, mu kazi kamwe, bumva kimwe amateka y’u Rwanda.

Ikoni rikakakaye, benshi bakomeje kuzingazinga ngo barebe ko barikata ntawe uhaguniye ijosi, ni iryo guhuza imitekerereze y’amateka y’u Rwanda, ugiye kugira ijambo ageza ku bandi akababwira amateka y’imvaho atavanzemo politiki kandi afite ibimenyetso gihamya cy’uko yabayeho. Amahirwe tugira mu Rwanda, ni uko amateka yacu adatandukana n’ukuri kw’ibiriho kuko n’ubundi yubakiye k’umurage, kandi mu gihugu cy’umurage nta we ugenda uko yiboneye.

Amateka y’u Rwanda kuva rwahangwa yagize ibibariro bigera muri bitanu ari byo Amateka ya mbere y’u Rwanda, Amateka y’ihangwa ry’u Rwanda, Amateka y’iyubakwa ry’u Rwanda, Amateka y’isenyuka ry’u Rwanda n’Amateka yo kongeraho kubaho k’u Rwanda.

Ingorabahizi tugira, ni uko abafashe mu mutwe biriya bice bitanu by’amateka y’u Rwanda babarirwa ku mitwe y’intoki, ari na yo mpamvu kugeza ubu ababasha guhangana n’abo bigize kabushungwe mu kwenyegeza ingengabitekerezo ya Jenoside bakiri bake, kuko abambaye bakikwiza mu bumenyi bw’amateka y’u Rwanda ari igitonyanga mu nyanja!

Ibice bikunda kuganirwaho n’abagerageje gutatura amateka y’u Rwanda, ni ibice bibiri bya nyuma, bikubiyemo amateka y’isenyuka ry’u Rwanda n’amateka yo kongeraho kubaho k’u Rwanda, na yo usanga abayetekerereza abandi batayafiteho ubumenyi buhagije hakaba n’abayavangamo politiki bikayangiza.

Ibi bibazo ni byo bikwiye kuvugutirwa umuti mu cyerekezo gishya cya 2020-2050, kimwe no kwesa umuhigo w’u Rwanda ruramye ruzira n’igicurane mu myaka ibihumbi n’ibihumbi iri imbere.

Urubyiruko rujye ku murimo

Mu mushinga wo gusenya u Rwanda wamaze imyaka ijana (1894-1994), ni imyaka yashyizwemo imbaraga nyinshi mu gusenya u Rwanda, haba iz’amafaranga yakoreshejwe mu kwandika inyandiko zicengeza amacakubiri, haba amafaranga yashowe mu kubaka amashuri yakorewemo ivangura rikanigishirizwamo, haba n’insengero zubatswe zikigishirizwamo ivanjiri ricengeza irondakoko n’irondakarere.

Hashinzwe n’amaradiyo na televiziyo yo gutangiraho ibiganiro bicengeza urwango Abahutu bangaga Abatutsi. Amafaranga yatanzwe mu nama zifatirwamo ingamba zo gukora Jenoside na yo ntiyari make! Abantu benshi banatanze n’umwanya wabo bitabira ibyo biganiro ndetse hari n’abakozi bahembewe ako kazi barimo n’abayobozi b’uwo mushinga.

No muri ibi bihe byacu, urugamba rwo guhangana n’abagifite ingengabitekerezo ya Jenoside, ntabwo ari urugamba dukwiye kujenjekera! Imbaraga zashyizwemo kugira ngo ishoboke, hakwiye gushyirwamo izizikubye kenshi kugira ngo abaragwa bayo batsinsurwe burundu!

Abanyarwanda bafate iya mbere mu kuyirwanya ariko Leta na yo ishoremo amafaranga kugira ngo hashyigikirwe imishinga itoza urubyiruko guhangana n’abayipfobya, cyane cyane kwigisha amateka y’u Rwanda uhereye mu mizi yarwo, no guha imbaraga imbuga nkoranyambaga zifite uwo murongo wo guhangana n’abayipfobya.

Mu gihe hatashyirwamo imbaraga nyinshi mu kwigisha urubyiruko amateka y’u Rwanda yose uhereye mu mizi yawo yose, biragoye ko twazabona abazahagarara bemye ubudahugahuga mu byiza by’umushinga wo kubaka u Rwanda watangijwe na Kagame Paul nyuma yo guhagarika Jenoside yakorewe Abatutsi ngo azanabashe kubakira ku nkingi za mwamba yaremye na we akarema ibiramba.

Abayobozi bo mu nzego zitandukanye cyane cyane abagira ijambo rikomeye ku baturage, nibicare ku ntebe nkarishyabwenge bakungahaze amateka y’u Rwanda, bityo babone uruboho ruhagije rwo kuganiriza Abanyarwanda ku mateka yabo.

Imihigo yo kuzahura u Rwanda mu buzima bwose bw’igihugu, yose yeshejwe ku kigero cyo hejuru, u Rwanda tugendaho rurarabagirana! Igisigaye ni ukubaka u Rwanda rwo mu mutwe, u Rwanda rutugendamo n’u Rwanda tugendana rukongera kugira ishyikizo mu mitima ya benerwo. Tukusa ikivi cy’uburame bw’u Rwanda bwacagashijwe n’abakoloni. U Rwanda rukazarama imyaka ibihumbi n’ibihumbi nta gicurane rurwaye, nta n’uwongeye kurukora mu jisho!

Umusizi Nsanzabera Jean de Dieu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .