Ukwinyuramo no gupfundikanya mu itangazamakuru biri kwambika ubusa imikoranire ya CMI na RNC

Yanditswe na Albert Rudatsimburwa
Kuya 15 Ugushyingo 2019 saa 01:07
Yasuwe :
0 0

Tariki ya 1 Ugushyingo 2019, ikinyamakuru gikorera kuri Internet cyo mu Bufaransa, "Africa Intelligence" cyasohoye inkuru igira iti “Imyitwarire ya gashozantambara hagati ya Kampala na Kigali yagiye hanze’. Iyo nkuru yirengaije ibimenyetso byose ndetse bigaragara ko yandikiwe cyangwa yakosowe n’ubutasi bwa Uganda bufatanyije na RNC.

Ikirenzeho, si ubwa mbere urwego rushinzwe ubutasi bwa Gisirikare muri Uganda (CMI) na RNC bigaragara mu nkuru zo kwivuga neza muri icyo kinyamakuru.

Mu gihe Guverinoma y’u Bufaransa n’iy’u Rwanda ziri gukoresha imbaraga ngo zibyutse umubano, hari abandi bayobozi mu Bufaransa badashyigikiye uwo mubano bagakorana n’abayobozi ba CMI n’abambari ba RNC ku buryo bareka inkuru nk’izo zigamije guharabika u Rwanda zigatambuka muri icyo kinyamakuru.

Muri Werurwe 2018, ikinyamakuru Chimpreports cyamamaza CMI, cyanditse inkuru ifite umutwe ugira uti “Akarere k’Ibiyaga bigari karanukamo intambara kubera umugambi wo kwica Perezida Museveni”. Bavugamo ko inzego z’iperereza z’u Bufaransa zaburiye Museveni ku ruzinduko yari agiye kugirira i Bujumbura, ko ngo bamenye ko u Rwanda rwateguye uburyo ruzahanura indege ye. Chimpreports yavugaga ko nayo ayo makuru yayakuye ku kindi kinyamakuru cyo kuri Internet, La Lettre de l’Ocean Indien.

Ubwo bufatanye hagati y’inzego z’iperereza za Uganda na La Lettre de l’Ocean Indien zibagiwe kuvuga ko impamvu nyayo uruzinduko rwa Museveni rwasubitswe ari uko inama y’abakuru b’ibihugu bigize COMESA yagombaga kwitabira yari yahagaritswe kuko u Burundi butabashije kugaragaza ko bwiteguye kwakira iyo nama ku rwego rwo hejuru, nk’uko ikinyamakuru The East African cyabitangaje.

Tariki 1 Ugushyingo, nimero y’ikinyamakuru Africa Intelligence yasohotsemo ibindi birego nk’ibyo byuzuyemo ijambo ku ijambo ibinyoma bya CMI n’ibinyamakuru bya RNC bigamije umugambi uhuriweho wa Museveni na RNC wo gutesha agaciro u Rwanda.

Nibura muri iyo nkuru imwe, hakubiyemo inkuru 14 za CMI. Zirimo kuvuga ko impinduka ziherutse gukorwa muri Guverinoma y’u Rwanda ngo ari uko Kagame ari gusimbuza abasirikare bafite inkomoko muri Uganda akabasimbuza abaturuka mu Burundi. Indi ngirwakinyamakuru ya CMI, The Insider yateruye undi mutwe w’inkuru igira iti “Kagame yakoze impinduka zikomeye muri Guverinoma, ajugunya abaminisitiri bafite aho bahuriye na Uganda”.

Indi yavugaga ko u Rwanda “rukekwaho ko ari rwo rwashinze RED Tabara, umutwe w’inyeshyamba ugizwe n’Abarundi ukorera muri Congo, wagabye igitero mu ntara ya Bubanza mu Burundi tariki 22 Ukwakira ukica abaturage benshi.” Iyo nkuru nayo yatangajwe n’ikinyamakuru cya CMI, Command post.

Cyakomeje kivuga ko ingabo z’u Rwanda zidasanzwe ziri gufatanya n’inyeshyamba za Mai Mai mu kwibasira Abanyamulenge. Si ibyo gusa kandi n’indi nkuru ivuga ko “U Rwanda guhera muri Nzeri uyu mwaka ruri gukorana n’abatavuga rumwe na Leta ya Uganda”, n’indi ngo “Ubwo yagiriraga uruzinduko i New York mu mpera za Nzeri mu Nteko rusange ya Loni, Kizza Besigye mu buryo bw’ibanga yahishuriye abayobozi b’abanyaburayi imitekerereze na kamere ya Museveni, kuva icyo gihe bikaba byarafashije Leta ya Washington gusobanukirwa Perezida wa Uganda”.

Mu kinyamakuru New Vision ho bavuze ko Perezida Kagame yanahuriye na Besigye i New York, nyamara ubuyobozi bw’u Rwanda buvuga ko iyo nama nta yigeze ibaho habe no mu buryo bw’impanuka.

Uburyo “bw’impanuka” bwakoreshejwe nko kwibutsa ibaruwa Perezida Museveni yigeze kwandikira mugenzi we w’u Rwanda, amubwira ko yahuye n’abayobozi bakuru ba RNC mu biro bye ku bw’impanuka.

Ikinyamakuru Africa Intelligence cyanditse kandi ngo “tariki 25 Ukwakira, Umugaba w’Ingabo za Uganda zirwanira ku butaka, General Peter Elwelu yanze gusinya amasezerano y’ubufatanye mu by’umutekano i Goma yari yateguwe n’umugaba mukuru w’ingabo za Congo (FARDC) Célestin Mbala, hagamijwe ubufatanye mu buryo bwa gisirikare hagati y’u Rwanda, u Burundi na Uganda ngo batange umusanzu mu kurandura imitwe y’inyeshyamba ikorera muri Repubulika Iharanira Demokarasi ya Congo.”

Na none, Sarah Kagingo ufite ikinyamakuru giterwa inkunga na CMI ari cyo Soft Power yaranditse ati “U Rwanda rwarakaye kubera ko Uganda yanze gusinya amasezerano y’ubufatanye ku bikorwa bya gisirikare muri RDC”.

Ikinyamakuru Intelligence cyo kinavuga ko “kohereza General Eric Murokore , inshuti ya Kagame, ku mupaka na Uganda ntacyo byafashije mu kugabanya umwuka mubi uri hagati ya Kampala na Kigali”, mu gihe Chimp Reports yo yungamo iti “u Rwanda rwaba rutegura imirwano ya gisirikare itunguranye muri Uganda?.

Umwanya ntabwo utwemereye ngo dukomeze kwerekana ibirego by’amafuti bigamije kwerekana umugambi uhuriweho ugamije guharabika u Rwanda bikozwe n’inzego z’ubutasi za Uganda.

Ikindi gihuha noneho The Intelligence ishaka gukwirakwiza nacyo cyavuye mu butasi bwa Uganda, ngo ni uko Perezida Kagame asigaye agenda mu ndege ebyiri icyarimwe! Igitangaje noneho, ni uko abanditsi bakuru bibagiwe kwandika bamenyesha abasomyi babo ko ayo makuru bayakesha Ubutasi bwa Uganda.

Nibura ubu tumenye icyo Sarah Kagingo n’ikipe ye bagiye gukurikiza bandika vuba aha.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza