00:00:00 IGIHE NETWORK KN KINYARWANDA EN ENGLISH FR FRANCAIS

Nta gihugu cyita ku baturage cyakwemera ko iri curuzwa ry’abantu rikomeza

Yanditswe na Dr Vincent Biruta, Priti Patel
Kuya 19 April 2022 saa 02:04
Yasuwe :

Imirongo mpuzamahanga igenda ibijyanye no guha abantu ubuhungiro yarangiritse. Hirya no hino ku Isi, ubu buryo buri gusenyuka mu gihe hari ikibazo kigaragara cy’abakeneye ubutabazi, kubera ko hari abantu bakoresha ubu buryo busanzwe mu gucuruza abantu, byose bigakorwa mu nyungu zabo bwite.

Aba banyabyaha bakina n’amarangamutima n’ibyifuzo by’abimukira bafite amikoro, bakabashora mu ngendo zirimo amakuba menshi kuko baba bijejwe ko nibazirangiza, bazahabwa ubuhungiro.

Ibi bigira ingaruka zitabarika kuri ibi bihumbi by’abagabo, abagore n’abana kuko bamwe batakariza ubuzima cyangwa se ubw’ababo muri izi ngendo mbi.

Ububi bw’izi nzira bacamo kandi ni uko abadafite amikoro yo kwishyura abo bagizi ba nabi babigenderamo, hagakomeza gusa abafite ubushobozi bwo kwishyura abo banyabyaha babambutsa.

Ntabwo twakwemera ko ibi bikomeza. Hakenewe ibisubizo bya nyabyo kugira ngo ubu bucuruzi bw’amaraso buhagarare.

Niyo mpamvu u Bwongereza n’u Rwanda byiyemeje gufatanya guhangana n’iki kibazo. Gutakaza ubuzima bw’abantu ni ikiguzi kiremereye cyane kandi kidakwiriye.

Tugomba gutuma ya mirongo mpuzamahanga yashyizweho ibera bose, duharanira ko abakeneye ubufasha koko babona umutekano ari nako duhangana n’ikibazo cy’ubushobozi bwa muntu n’amahirwe ahari ari nabyo byorohereza iri curuzwa ry’abantu rishingiye ku mikoro.

Turashaka gushyiraho inzira zishingiye ku mategeko, umutekano n’ituze kugira ngo abantu bagire ubuzima bwiza, bahunge akarengane n’itotezwa cyangwa se amakimbirane ariko aho bagiye babone amahirwe y’ubuzima.

Ni yo mpamvu u Bwongereza n’u Rwanda batangije ubufatanye buzabera urugero indi mikorere mishya mpuzamahanga.

Ni imikorere ihera mu mizi iki kibazo mpuzamahanga, mbere na mbere hakemurwa ubusumbane buri mu kongerera abantu ubushobozi, ari nabwo iyo buhuye n’amakimbirane, biteza iri suhuka mpuzamahanga ryabaye insobe.

Binyuze mu ishoramari rigamije ko haboneka imirimo, ubumenyi n’amahirwe muri Afurika, ubu bufatanye bugamije kubera urugero n’abandi hirya no hino ku isi.

Bizashwanyaguza bwa bucuruzi bw’udutsiko tw’abagizi ba nabi kandi bibuze abimukira gushyira ubuzima bwabo mu kaga.

Bizatuma kandi koko ba bandi bakeneye ubufasha babubonera mu gihugu kizwiho ku rwego mpuzamahanga, guha ikaze no kwita ku bimukira.

Kubera amateka ya vuba y’u Rwanda, iki gihugu kizi ububi bw’ubuhunzi no kuba umwimukira mu gihugu cy’amahanga, ibi byagize uruhare mu kunoza gahunda cyihaye mu guhangana n’ikibazo cy’abimukira.

U Rwanda rufite agahigo mu guha umutekano abahunga ibibazo bitandukanye, hakiyongeraho ko ari kimwe mu bihugu bitekanye cyane ku Isi.

Ni igihugu gisanzwe gicumbikiye impunzi zisaga 130 000 zo mu bihugu bitandukanye. Mu mwaka wa 2019 ku busabe bwa HCR, u Rwanda rwahaye ubuhungiro abimukira bari bari mu byago muri Libya. Ibi bigaragaza wa muhate warwo mu kwita ku batagira kivurira.

U Bwongereza n’u Rwanda bishyize hamwe mu rugamba rwo guteza imbere uburyo bushya kandi buciye mu mucyo bugamije guhangana n’ibibazo by’abimukira bizira ba rusahuriramunduru b’abanyabyaha n’abagizi ba nabi.

Ubu buryo buzashimangira gahunda zo kwita ku mpunzi zidahutaza uburenganzira bwa muntu, zitanga amahirwe mu kubaka ubushobozi no kubona amahirwe atandukanye haba ku bimukira n’abatuye aho bakiriwe, kandi bibe uburyo bwiza bukurikije n’amategeko kuri abo bahunga akarengane n’umutekano muke.

Ikibazo cy’abimukira binjira binyuranyije n’amategeko ni mpuzamahanga. Icyo turi gukora, ni ugushyiraho gahunda ihamye igamije guhangana n’iki kibazo Isi ihanganye nacyo.

Turi kuzana uburyo bushya budasanzwe, nyamara biratangaje uburyo abo bose babunenga, batagaragaza uburyo bwabo bumva byakorwamo. Kugira ngo ubu buryo turi gukoresha butange umusaruro witezwe, bisaba imbaraga zidasanzwe.

Kwemera ko abantu bakomeza kubabara gutya ntabwo bikiri amahitamo ku gihugu cyita ku buzima n’imibereho myiza y’abaturage.

Iyi nkuru yatambutse bwa mbere mu kinyamakuru The Times iri mu rurimi rw’Icyongereza. IGIHE yayihinduye mu Kinyarwanda

Priti Patel, ni Minisitiri w’umutekano mu Bwongereza, naho Dr Vincent Biruta ni Minisitiri w’Ububanyi n’Amahanga w’u Rwanda

Priti Patel na Vincent Biruta basinya amasezerano hagati y'ibihugu byombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .