00:00:00 IGIHE NETWORK KN KINYARWANDA EN ENGLISH FR FRANCAIS

Natacha Polony yagizwe umwere mu guhishira ’amabandi’ yijanditse muri Jenoside

Yanditswe na IGIHE
Kuya 26 May 2022 saa 12:25
Yasuwe :

Umunyamakuru Natacha Polony aherutse kugirwa umwere n’urukiko rwo mu Bufaransa ku byaha byo gupfobya Jenoside, mu rubanza rwayobowe n’agatsiko k’Abanyaburayi kasaga n’akiterera urwenya kuri Jenoside yakorewe Abatutsi mu1994 nk’uko n’ubundi byari byitezwe.

Polony yagizwe umwere nyuma yo kuvuga ko “mu mateka ya Jenoside nta ruhande rw’abantu beza cyangwa urw’ababi rwari ruhari ahubwo bose bari kimwe. Kuko yari amabandi ahanganye.”

Aya magambo ateye isoni ku mahano yabaye mu Rwanda mu 1994 yayavuze ubwo yagerageza gukingira ikibaba u Bufaransa ku ruhare bwatanze kuri Guverinoma yakoze Jenoside yari iri kurimbura Abatutsi mu Rwanda.

Kuri ubu Polony uri kwishimira uyu mwanzuro uteye isoni w’urukiko afite intego yo gukomeza gukingira ikibaba Abafaransa batigeze bagezwa imbere y’ubutabera kubera uruhare bagize muri iki cyaha ndengakamere.

“Binyuze muri uyu mwanzuro, urukiko twatanze ubutumwa bw’uko abahanga mu mateka n’abashakashatsi bashobora gukora kandi bakagaragaza uko bumva ibyabaye (mu Rwanda) ndetse bakabijya mu mizi ntawe ubateye ubwoba ko bashobora gukurikiranwa” aya ni amagambo Polony yatangaje ku cyemezo cy’urukiko yishushanya nk’impirimbanyi y’uburenganzira bw’abahanga mu mateka n’abashakashatsi bwo kugereranya imyitwarire y’abagize uruhare muri Jenoside n’abitambitse uwo mugambi wo kurimbura Abatutsi.

Ibi bigaragaza ko uyu mwanzuro w’urukiko utanga ubutumwa bw’uko rwemeranya na François Mitterand wabaye Perezida w’u Bufaransa wigeze kuvuga ko “Muri biriya bihugu, Jenoside si ikintu gihambaye.”

Iyi myimvure ni yo yatumye amwe mu mabandi y’Abafaransa ahitamo gushyigikira Guverinoma yakoze Jenoside yashishikarizaga abaturage kwica ku bwinshi mu gihe RPA yageragezaga guhagarika ubwo bwicanyi. Ni iyi myitwarire igaragaza abari amabandi cyangwa se abakiri yo hashingiwe kuri iyi myitwarire y’urukiko ndetse n’ibyishimo bya Polony n’agatsiko ke.

Mu Isi y’amabandi, niba abantu bashobora kuvuga ko impande zombi zari kimwe, byakorohera umuntu gushyigikira inyungu z’igihugu kabone n’iyo zaba zisaba kurimbura Abatutsi.

Kuba urukiko rwashyigikira imyumvire nk’iyi ni byo byonyine bishobora gusobanura ukuntu Polony yabaye umwere muri iki kirego cyagaragazaga uko yapfobeje Jenoside yakorewe Abatutsi, agerageza kuyigereranya n’ibindi byaba ashinja ingabo zahoze ari iza RPA.

Byakumvikana nk’ubusazi umuntu aramutse avuze ko mu Ntambara ya Kabiri y’Isi, Aba-Nazis n’ingabo zabarwanyaga “bose bari amabandi ahanganye” hashingiwe ku byaha wenda na zo zaba zarakoze. Niba ibyo ari ubusazi, kubivuga kuri RPA byaba ari irondaruhu n’imyumvire iciriritse.

“Iyo urubanza rutaza kugenda gutya, nta munyamakuru wari kugira icyo avuga kuri iyo ngingo.” Aya ni amagambo Polony yakomeje kuvuga yigaragaza nk’intwari.

Niba Polony yarasomye neza ibinyamakuru byo mu Burengerazuba bw’Isi, abanyamakuru bo muri icyo gice bagiye bakoresha imbaraga zabo zose mu kugoreka amateka y’u Rwanda.

Imiryango ishamikiye ku Muryango w’Abibumbye yagiye igushwa mu mutego wa Jenoside ya baringa yakorewe Abahutu na RPA ariko nyuma hakaza kubura ibimenyetso byo gushingiraho.

Ku bw’ibyo baje guhimba imwe yabereye mu gihugu cy’abaturanyi cya Congo. Nta gutangaza amazina y’abayiguyemo, abayikoze, abakoze iperereza cyangwa abatangabuhamya, ‘Mapping report’ yarakozwe ndetse iratangazwa hagamijwe: Gukingira ikibaba amabi yakozwe n’ibihugu byo mu burengerazuba bw’Isi bigize Akanama gahoraho k’umutekano karebereye Jenoside ndetse kagakomeza gushyigikira abayishyize mu bikorwa bari barahungiye mu cyahoze ari Zaïre ndetse bagaha intwaro impunzi zari mu nkambi zifashishijwe mu kugaba ibitero ku butaka bw’u Rwanda.

Kugeza n’uyu munsi, mu bihugu byo Burengerazuba bw’Isi amajwi avuga ku nkunga byahaye abakoze Jenoside mbere yayo, muri yo na nyuma yayo aracyari make nubwo bikenewe ko hagaragazwa ibyaha byakozwe n’amabandi yabo cyane cyane ayo mu Bufaransa.

Aho kugira ngo bigende gutyo, urukiko rwo mu Bubiligi rwagize abere bamwe mu basirikare bari mu butumwa bw’amahoro basize ibihumbi by’Abatutsi byari byabahungiyeho muri ETO Gitarama bakaza kwica n’interahamwe n’abasirikare ba Leta.

Kimwe n’ibi, Inkiko zo mu Bwongereza zanze gukurikirana abagize uruhare muri Jenoside baba muri icyo gihugu ndetse n’inkiko z’u Bufaransa na zo hashize imyaka zaradindije imirimo yo kuburanisha abakekwaho jenoside baba muri icyo gihugu, aho uwagejejwe imbere y’ubutabera bwa mbere byakozwe mu2014 nyuma y’imyaka 20 jenoside ibaye.

Hashingiwe kuri aya mayeri yo gutinza imanza n’imyitwarire idakwiye, umwanzuro w’urukiko rwo mu Bufaransa wo kugira Polony umwe ntabwo watunguranye, uhuye neza n’umurongo wo gutesha agaciro Jenoside yakorewe Abatutsi n’ubuzima bw’Abanyafurika ariko Abanyarwanda bakomeje kwihangana no kudatezuka.

Nubwo Polony akomeje kuvuga ko Isi ikwiriye kwibanda ku byaha byakozwe na RPA agamije gukingira ikibaba uruhare u Bufaransa bwagize muri Jenoside yakorewe Abatutsi, abayirokotse bakomeje urugamba rwo guhangana n’Abafaransa bagize uruhare muri Jenoside binyuze mu bufatanye mutaziguye muri icyo gikorwa cya kinyamaswa cyangwa bahitamo guceceka.

Urugero, Komisiyo y’u Buransa yashyizweho na Perezida Macron (nubwo yari yarwanyijwe bikomeye n’abatabishaka barimo na Polony) yasuzumye bimwe ukuri kwa bimwe mu bintu bishobora kuzasobanuka igihe kimwe, hashimwe umuhate w’impirimbanyi n’abarokotse.

Uko iminsi igenda, Polony azagera aho ahangane n’ukuri kw’ibyaha byo gufata ku ngufu byakozwe n’abasirikare b’Abafaransa boherejwe by’amaburakindi ngo batabare ubuzima bw’Abatutsi mbarwa bari barokotse nyuma yo kubona ko Guverinoma yakoze Jenoside, ishyigikiwe n’u Bufaransa yatsinzwe na RPA ku rugamba.

Uko ibyaha byakozwe n’abasirikare b’u Bufaransa bigenda bijya hanze, amajwi y’abagoreka amateka azakomeza kuba menshi kuko bizakomeza kugaragaza ko mu 1994 Intwari za RPA zahanganye n’abakoze Jenoside n’amabandi y’Abafaransa yari abashyigikiye.

Urukiko rwo mu Bufaransa rwagize Natacha Polony umwere mu guhishira amabandi yijanditse muri Jenoside

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .