00:00:00 IGIHE NETWORK KN KINYARWANDA EN ENGLISH FR FRANCAIS

Abanenga icyemezo cy’u Rwanda cyo kwakira abimukira bo mu Bwongereza barata inyuma ya Huye

Yanditswe na IGIHE
Kuya 22 April 2022 saa 11:22
Yasuwe :

U Rwanda rwongeye kwiharira ipaji y’imbere mu bitangazamakuru. Kuri iyi nshuro ruranengwa umwanzuro warwo wo kwemera kwakira impunzi zaheze mu bihugu by’i Burayi aho zisa n’izitifuzwa.

Ibitangazamakuru bikomeye mu Bwongereza birimo The Independent na The Times biyoboye ibindi mu gutangaza inkuru zinenga gahunda y’u Bwongereza yo kohereza abimukira n’impunzi mu Rwanda.

Ibyo bigenderaho mu kunenga icyo cyemezo ubwabyo nta shingiro bifite, birabogamye, birimo ubujiji no kuvuguruzanya.

Jonathan Clayton yifashishije umukozi wo mu Bwongereza, yanditse muri The Times, amagambo ateye kwibazaho.

Yagize ati “Abimukira bazahunga, berekeze muri Uganda na Sudani mbere yo guhingukira muri Libya cyangwa baterwe ubwoba bwo kwicwa.’’

Yongeyeho ko “Niba ibikurikizwa mu gusaba bisa n’ibyadindije gahunda ya Israel na Denmark [yo kwimurira izindi mpunzi mu Rwanda] bazahunga bamaze amasaha atatu bageze mu gihugu.’’

Clayton wakabaye yitwara nk’umunyamakuru, ntakwiye guhitamo aho avana amakuru hatizewe ngo abe ari yo ashingiraho.

Ese impunzi zizahunga cyangwa zikangishwe kwicwa? Aya mahitamo yashoboka mu gihe intego yaba atari ugutangaza ukuri ahubwo ikaba guharabika igihugu gifite abayobozi bakoze amahitamo ya kimuntu yo guha ikaze impunzi.

No mu gihe bagerageje kubaza abayobozi babo ibyo bagombaga gukora, abanyamakuru b’Abongereza basa n’abatekereza ko uburyo bwiza bwo kubikora ari ugushinja abayobozi b’u Rwanda guhonyora uburenganzira bw’ikiremwamuntu.

Abanyamakuru b’abanyamwuga bafite ibihamya hafi yabo. Iyo bigeze ku buryo impunzi zifatwa, uwashaka kubireba neza yabona inkuru y’izakiriwe mu Rwanda ndetse zikishimira kuhaba no kuhafata nko mu rugo rwa kabiri rwongeye kubasubiza agaciro bari barambuwe.

Shabana Basij-Rasikh yatangarije Washington Post urugwiro impunzi zo muri Afghanistan zakiranywe mu Rwanda.

Ati “Mu ijoro ry’umunsi twagereyeho mu Rwanda, icyiciro cya mbere cy’Abanyarwanda twahuye si abayobozi b’Urwego rushinzwe Abinjira n’Abasohoka. Ni abajyanama mu by’ubuzima bwo mu mutwe. Muri iryo joro badusabye kwiyumvamo ikaze no gutura imitwaro yacu yose.’’

Inkuru ya Shabana ni imwe mu zizewe zashyira umucyo ku mpaka zihari nyamara iburizwamo imbere y’ibitekerezo by’Abanyaburayi batigeze baba mu buzima bw’ubuhunzi ndetse bakaba badashobora kwisanisha nabwo.

Mu by’ukuri, biragoye kubona aho u Rwanda runengwa ngo Michela Wrong abure kubyitereramo n’ubwo byaba bitamureba.

Wrong yabwiye Clayton ko “Kagame yitwara nk’umunyaburayi hanyuma agatanga igisubizo.’’

Ntibisanzwe kubona Wrong ashyigikira Perezida Kagame, nubwo yaba yibeshya ko mu gushaka ibisubizo by’ibibazo abayobozi bo ku Mugabane w’u Burayi bananiwe kubikemura.

Kuri iyi ngingo, ikibazo cy’imiyoborere [ijegajega] mu bihugu by’abazungu ni cyo cyari gikwiye kuba ingingo nyamukuru.

Ikibabaje ni uko abacengezamatwara b’i Burayi nka Wrong, usanga bagerageza kwerekana gutsindwa kwa sosiyete kuko ukwikunda kw’abazungu kubaha uburenganzira bwo guhirikira imitwaro ibaremereye yavuye ku gutsindwa kwabo ku Banyafurika.

Wrong akwiye kumenya ko ibitekerezo byo ku Mugabane w’u Burayi bidafashe runini muri gahunda za Kagame. Afite igihugu cyo kuyobora n’Umugabane akorera ubuvugizi.

Abayobozi bo ku Mugabane w’u Burayi bakwiye gukora inshingano batorewe, ni ugukemura ibibazo byugarije abaturage bayobora.

Iyo batsinzwe cyangwa hakagira undi ubaha ubufasha, icyo abaturage babo bakwiye gukora ni uguha agaciro ubwo bumuntu.

Wrong yongeyeho ko “kohereza abimukira mu gice cy’Isi, cyasenywe na Jenoside yakorewe Abatutsi, intambara z’abasivili n’ubuhunzi, ni kimwe mu byemezo biteye inkeke Guverinoma ye yafashe.”

Wrong agomba kwibaza imiterere y’ubuyobozi bushobora guhindura igihugu cyashwanyaguritse, kikaba urugo ku bihumbi by’impunzi nyuma y’imyaka 28. Si ibidasanzwe ahubwo birahambaye.

Clayton si we wenyine watannye mu gutanga ibitekerezo kuri gahunda yo kohereza mu Rwanda abimukira bavuye mu Bwongereza.

Muri The Independent, Joe Sommerlad, yakoresheje amagambo y’Umudepite w’Umwongereza avuga ko iyo gahunda isa n’iremwa rya gereza y’u Bwongereza [British Guantanamo Bay.]

Abanyaburayi n’abazungu bakwiye kwibuka ko Guantanamo Bay itagenzurwa n’u Rwanda ahubwo ni iy’imwe muri Guverinoma zikora raporo zishinja u Rwanda guhonyora uburenganzira bwa muntu.

Igitangaje ni uko nta n’umwe muri aba banyamakuru b’Abongereza, wari kugira ikibazo mu gihe impunzi zari koherezwa mu gihugu gifite Guantanamo ya nyayo. Ni gute watekereza Guantanamo mu Rwanda mu gihe habaho iya nyayo!

Clayton, Wrong n’abandi ntibigeze banakopfora ubwo abana n’ababyeyi batwite bari bapakiye mu tuzu duto bacunzwe kinyamaswa.

Abimukira bahura n’itotezwa ry’ubwoko bwose harimo n’iribi rirenze iryo watekereza.

Hari imvugo ivuga ko “Mbere yo gutokora akari mu jisho rya mugenzi wawe, banza utokore umugogo uri mu ryawe”.

U Rwanda rushobora kuba atari igihugu gikize mu bijyanye n’ubukungu ariko gikungahaye ku kugira impuhwe n’ubumuntu.

Mu gihe bishobora kugaragara nk’ibyumvikana kohereza impunzi mu bihugu bikize, ibi bihugu ntibishobora gutanga ibyo u Rwanda rwihagijeho, ni ukuvuga kugira ubuntu, agaciro n’ubumuntu.

Shabana Basij-Rasikh yanditse muri Washington Post ko ibyo u Rwanda rutanga nta mafaranga yabigura.

Ati “Kutaboneka nk’udasanzwe cyangwa uteye impuhwe ahubwo ukabaho mu buryo bungana. Ibi ni byo buri mpunzi yagusaba. Ni ko ubuzima bumera ku wabuze aho yita mu rugo ariko akongera kuhabona.’’

Ni byo, zimwe mu mpunzi ntizizabona agaciro k’iyo mpano ndetse zishobora kongera kwirukira muri bya bihugu by’aho batazishaka.

Impamvu ibasunikira gufata izo ngamba z’ubwihebe ni rya tangazamakuru, rimwe ribabwira ko aho bagana ari mu bihugu by’inzozi zabo, bahagera bagasharirirwa, ni ryo riri kugaruka ribabwira ibibi ku Rwanda.

Ntibakwiye kunengwa ku kwemera ibyo babwira. Ariko uko ibihe byicuma, bazabona amahirwe yo gutekereza ku bihugu bidashaka kubakira aho ni ho bazumva ko u Rwanda rwabafashe ukuboko mu bihe bari mu buzima bukomeye.

Mu Rwanda bazahasanga Perezida wahoze ari impunzi, kandi wita by’umwihariko ku bakuwe mu byabo n’abadahabwa uburenganzira bubakwiye.

U Rwanda rwemeye kwakira abimukira bazava mu Bwongereza, icyemezo kitavuzweho rumwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .