Undi muntu yiciwe mu myigaragambyo yamagana ifungwa rya Bobi Wine

Yanditswe na Munyengabe Murungi Sabin
Kuya 24 Kanama 2018 saa 04:07
Yasuwe :
0 0

Undi mwambari wa Bobi Wine yishwe arashwe na Polisi ya Uganda ubwo yari mu myigaragambyo yo kwamagana ifungwa n’iyicarubozo ryakorewe Depite Robert Kyagulanyi[Bobi Wine].

Uwishwe yitwa Vincent Sserugaya, yapfuye mu ijoro ryo kuri uyu wa 23 Kanama 2018 nyuma yo kuraswa na polisi ya Uganda ubwo yari mu gihiriri cy’abigaragambya bamagana uburyo Bobi Wine yafunguwe n’urukiko rwa gisirikare Polisi igahita yongera kumuta muri yombi.

Chimp Reports yatangaje ko, Bobi Wine akirekurwa n’urukiko rwa Gisirikare rwa Gulu, abatabarika biraye mu mihanda batangira kwishimira ko depite wabo arekuwe. Ibyari ibyishimo byahindutse imyivumbagatanyo ubwo abaturage bamenyeshwaga ko Bobi Wine ahise yongera gufungwa.

Imyigaragambyo yari ifite ubukana cyane mu gace ka Bukalamuli muri Gomba district aho Bobi Wine uhagarariye agace Kyadondo East akomoka, aha niho Vincent Sserugaya yarasiwe.

Polisi ya Uganda yatangaje ko yohereje abapolisi muri Gomba nyuma yo kumenya ko hari abaturage bari gusenya inzu no kwangiza ibikorwa remezo bitandukanye nk’uburyo bwo kwigaragambya.

Francis Chemusto, umuvugizi wa Polisi muri aka gace, yavuze ko abapolisi bakigera muri aka gace basanze hari igihiriri cy’abaturage biraye mu mihanda, bamwe barimo gutwika amapine abandi bari gusambura inzu.

Uwitwa Sserugaya wari mu b’imbere mu myigaragambyo, ngo akibona abapolisi baje “yahise yinjira mu nzu ye ajya kuzana ishoka n’umuhoro ashaka guhangana na polisi. Mu kwirwanaho, polisi yarashe ikomeretsa Vincent Sserugaya waje gupfira ku bitaro bya Gombe azize ibikomere yatewe n’amasasu.”

Chemusto yakomeje avuga ko uwarashe nyakwigendera yahise atabwa muri yombi ubu akaba ari gukorwaho iperereza mu gihe umurambo wa Sserugaya wajyanwe mu bitaro bya Gombe.

Sserugaya abaye uwa gatatu upfiriye mu myigaragambyo yamagana ifungwa rya Bobi Wine umaze iminsi mu buroko hamwe n’abandi badepite bane n’abandi batabarika batavuga rumwe n’ubutegetsi bo muri Arua.

Mu Mujyi wa Kampala hakomeje imyigaragambyo yo gusaba ko Bobi Wine arekurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .