00:00:00 IGIHE NETWORK KN KINYARWANDA EN ENGLISH FR FRANCAIS

#Qatar2022: Morgan Freeman watunguranye mu birori bitangiza Igikombe cy’Isi yibajijweho

Yanditswe na Mahoro Vainqueur
Kuya 21 Ugushyingo 2022 saa 12:10
Yasuwe :

Ijwi ry’Umusaza w’Ikirangirire muri Sinema, Morgan Freeman, ryakiranywe ubwuzu ubwo ryumvikanaga mu ndangururamajwi zo muri Al Bayt Stadium, yabereyemo umukino ufungura Igikombe cy’Isi cya 2022.

Ku mugoroba wo ku Cyumweru, tariki ya 20 Ugushyingo 2022, ni bwo habaye ibirori byo gutangiza Igikombe cy’Isi. Byabanjirije umukino warangiye Equateur itsinze Qatar ibitego 2-0.

Muri ibyo birori, Morgan Freeman yatangiye yumvikana mu mashusho yatunganyijwe mu kwerekana umuco wa Qatar, n’uko ruhago ari siporo ihuza abantu.

Uyu musaza w’imyaka 85 yageze imbere y’imbaga y’abasaga ibihumbi 67 atunguranye cyane ko abahanzi barimo Dua Lipa, Shakira na Rod Stewart banze kwitabira ibi birori bikavugwa ko banze kujya muri Qatar, igihugu bashinja guhonyora uburenganzira bwa muntu.

Ibi birori byari binogeye ijisho byatangijwe na Morgan Freeman ari kumwe n’umusizi wo muri Qatar Gandem Al Muftau aho batanze ubutumwa bw’ubumwe no kubahana hagati y’abaturage.

Aba bakurikiwe n’abandi barimo Jung Kook, Umunya-Koreya y’Epfo uri mu bagize Itsinda BTS waririmbye indirimbo bise ‘Dreamer’ yakorewe Igikombe cy’Isi.

Mu baririmbye kandi harimo Umuhanzikazi wo muri Liban, Myriam Fares, waririmbye indirimbo yakorewe iserukiramuco riherekeza iyi mikino ryiswe “FIFA Fan Festival” ni indirimbo yitwa "Tukoh Taka", yahuriyemo na Nicki Minaj ndetse na Maluma.

  Hari abibaza ku cyabaye ku kiganza cya Morgan Freeman

Nyuma yo kumva ijwi rya Morgan Freeman, abari bakurikiye ibi birori babonye ko ikiganza cy’uyu musaza w’icyamamare muri sinema z’i Hollywood gishobora kuba kitameze neza.

Bijya gutangira yagaragaye yambaye uturindantoki ku kiganza cy’ibumoso nyuma aza kudukuramo ariko ikiganza cye kiboneka nk’ikidakora neza.

Ubusanzwe Morgan Freeman yamugaye ukuboko kw’ibumoso biturutse ku mpanuka ikomeye y’imodoka yabaye mu 2008 ubwo yari mu muhanda wa Mississippi.

Morgan ubwe yiyemereye ko afite ububabare kuko arwaye ‘fibromyalgia’, ndetse aracyafite uburibwe budashira bwaturutse kuri iyo mpanuka, yanavunikiyemo urutugu.

Fibromyalgia ni indwara idakira itera ububabare mu mubiri, hamwe n’umunaniro ukabije bigatuma utabasha gusinzira neza.

Mu 2011, Freeman yavuze ko yangiritse ku mitsi y’ubwonko ku buryo inshuro nyinshi bimugora kuba yakwihindukiza cyangwa se ngo ahindukize ikiganza uko abishaka.

  Ubutumwa buri mu ijambo yagejeje ku bitabiriye Igikombe cy’Isi
Morgan Freeman yavuze ku mbaraga ziri muri ruhago n’uburyo zishobora guhuza Isi.

Igice cya mbere cy’ijambo rye cyari ubutumwa bwerekeye Igikombe cy’Isi avuga ko cyugururiwe Isi yose ntawe usigaye.

Nyuma hakurikiyeho amashusho yerekana uburyo abarabu n’abandi bantu baturutse hirya no hino ku Isi batangiye gukina umupira hamwe nta rwikekwe.

Freeman yashimye uruhare umupira w’amaguru ugira mu guhuza abantu no mu bihe by’amacakubiri, ashimangira ko igihe kigeze ngo Isi yunge ubumwe.

Ati "Umupira w’amaguru uhuza ibihugu binyuze mu rukundo rw’uyu mukino mwiza. Igihuriza hamwe ibihugu ni nacyo gihuza abaturage."

Freeman ari kumwe n’umusizi wo muri Qatar, Gandem Al Muftau batanze ubutumwa bukomeye bw’ubumwe no kubahana nk’umuryango.

  Hari abanenze Morgan Freeman

Hari abahanzi banze ubusabe bwa FIFA bwo gutarama mu birori bifungura Igikombe cy’Isi bivugwa ko banze kujya muri iki gihugu bavugaho guhonyora uburenganzira bw’ikiremwamuntu.

Ku mbuga nkoranyambaga benshi bakomeje kwibaza ukuntu Morgan Freeman yashukishwa amafaranga y’Abanya-Qatar akemera kujya muri iyi mikino na yo itavugwaho rumwe.

Ubwo Qatar yemererwaga kwakira Igikombe cy’Isi mu Ukuboza 2010, ntiyavuzweho rumwe nk’igihugu kidafite amateka akomeye muri ruhago ku Isi.

Iki gihugu cyashinjwe gutanga ruswa ngo ihabwe kwakira iri rushanwa ndetse abandi bagitunga agatoki ko kitubahiriza uburenganzira bwa muntu n’ubw’abimukira by’umwihariko.

Abanenze uyu musaza bavuga ko atari akwiriye kujya muri Qatar nyuma yaho igihugu cye cya Leta Zunze Ubumwe za Amerika yari anashyigikiye kibuze amahirwe yo kwakira iyi mikino ikajyanwa muri Qatar.

Ku mbuga nkoranyambaga bamwe ntibabyakiriye neza kubona Morgan Freeman muri iyi mikino iri kubera muri Qatar.

Morgan Freeman ni umusaza ufite ubuhanga mu gukina mu myanya yose ahabwa muri filime yagaragayemo kuva yatangira uwo mwuga wamuhesheje ibihembo birimo n’icya Oscars yegukanye mu 2005 nka ‘Best Supporting Actor’ muri Filime “Million Dollar Baby” (2004).

Morgan Freeman yamenyekanye muri filime zakoze amateka zirimo iyitwa “Street Smart” (1987), “Driving Miss Daisy” (1989), “The Shawshank Redemption” (1994), “Invictus” (2009), “Glory” (1989), “Robin Hood: Prince of Thieves” (1991), “Seven” (1995), “Deep Impact” (1998), “The Sum of All Fears” (2002), “Bruce Almighty” (2003), “The Dark Knight Trilogy” (2005–2012), “The Lego Movie” (2014) na “Lucy” (2014).

Ibirori bifungura imikino y’Igikombe cy’Isi byabanjirije umukino wa Qatar yatsinzwe na Equateur ibitego 2-0, iba igihugu cya mbere gitsindiwe mu rugo ku mukino ufungura iri rushanwa riri gukinwa ku nshuro ya 22.

Morgan Freeman na Jung Kook wo muri BTS mu birori bitangiza imikino y'Igikombe cy'Isi muri Qatar
Morgan Freeman n'Umusizi wo muri Qatar, Gandem Al Muftau basabye abantu kunga ubumwe kuko umupira w'amaguru ubereyeho kubahuza aho kubatanya
Morgan Freeman w'imyaka 85 yabanje kwambara uturindantoki nyuma aza kudukuramo
Morgan Freeman n’Umusizi Gandem Al Muftau batanze ubutumwa bukomeye mu birori bitangiza Igikombe cy'Isi cya 2022
Ikiganza cy'ibumoso cya Morgan Freeman cyibajijweho byinshi kubera imiterere yacyo
Jung Kook ni we wari uhagarariye bagenzi be bahuriye mu Itsinda BTS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .