00:00:00 IGIHE NETWORK KN KINYARWANDA EN ENGLISH FR FRANCAIS

#Qatar2022: Argentine yatsinze Australia ibona itike ya 1/4

Yanditswe na Iradukunda Olivier
Kuya 4 Ukuboza 2022 saa 08:19
Yasuwe :

Argentine yatsinze umukino wayihuje na Australia ibitego 2-1, biyiha uburenganzira bwo gukomeza muri ¼ cy’irangiza mu gikombe cy’Isi. Uyu mukino wabereye kuri Ahmed bin Ali Stadium.

Argentine yinjiye mu mukino ihabwa amahirwe kuko ari yo yatwaye iki gikombe mu 1986, ndetse yanageze ku mukino wa nyuma mu 2014.

Umukino watangiye Argentine ikina neza hagati mu kibuga, gusa uruhande rwa Lionel Messi bari barushyizeho imbaraga, Argentine itangira kubakira umukino kuri Papu Gomez.

Australia yari ihagaze neza mu kugarira cyane hagati, byatumye Argentine ihita yimurira umukino ku mpande. Australia yabonaga umupira wose ikawohereza imbere, ntabwo yashakaga guhererekanya kuko itari kubirusha Argentine.

Iminota 25 yose yarangiye nta kipe n’imwe irareba mu izamu ry’indi. Uburyo bwa mbere bwabonetse bwari ubwa Australia ku munota wa 28, ku mupira w’umuterekano, Jackson Irvine awushyira hanze.

Australia yatangiye kubona ko ishobora kubyaza umusaruro igihagararo cyabo, itangira gushaka amakosa yavamo imipira y’imiterekano. Umusifuzi Szymon Marciniak na we akayisifura neza, akayibaha.

Gusa ubuhanga bwa Nicolas Otamendi bwakomeje gutuma batagera mu izamu. Aya mahirwe Australia yabonye yatumye iva inyuma, ifungura umukino ndetse inagabanya kugarira cyane.

Argentine na yo yaje kubona uburyo ku makosa ya ba myugariro ba Australia, Lionel Messi abona aho amenera.

Yateye umupira bawukuyemo, awusubizwa na Otamendi, atera ishoti rikomeye umunyezamu Mathew Ryan ntiyamenya uko bigenze.

Messi yatsinze igitego cyanditse amateka kuko ari umukino we wa 1000 yakinaga, akanatsinda igitego cye cya 788, ku ntsinzi ya 682.

Kuva ku munota wa 35 umukino wayobowe na Argentine. Australia izwiho kugira abakinnyi bataruha vuba yakomeje gushaka uko yishyura, ariko Argentine yafata umupira ikawugumana.

Nubwo nta buryo bwinshi bwaremwe muri uyu mukino ntibyabujije Argentina kujya mu karuhuko ifite 1-0 bwa Australia.

Mu gice cya kabiri kandi Argentine yagitangiye yitwara neza, kuko yakomeje gukina uburyo bwayo bwo guhererekanya neza mu kibuga.

Umutoza wa Argentine Lionel Sebastian Scaloni yahinduye uburyo agabanya abakinnyi inyuma abongera mu kibuga hagati. Aha yahise akora impinduka ku munota wa 50 akura mu kibuga Papu Gomez wari wananiwe ashyiramo Lisandro Martinez.

Izi mpinduka zatumye Australia itongera gupfa kubona umupira, ku buryo n’imipira babonaga bayitakazaga by’amaherere. Imyinshi muri yo Lisandro Martinez yayikuragaho, akayishyira kwa Rodrigo De Paul wakoreshejwe cyane mu gice cya kabiri.

Kutumvikana neza k’umuzamu Mathew Ryan na myugariro we Harry Souttar wamuhereje umupira akabura icyo awukoza, byatumye Julian Alvarez abatsinda igitego cya kabiri ku munota wa 57.

Iki gitego cyaciye intege cyane Australia, gusa ihanyanyaza ikoresha imipira yabo inyuze mu kirere. Argentine na yo yari yamaze kwirara ikina imipira yose itacyifuza kujya gushaka igitego cya gatatu.

Uku kwirara kwatumye uburyo bumwe Australia yabonye muri iki gice ikuramo igitego. Iki gitego cyitsinzwe ku munota wa 77 na Enzo Jeremias Fernandez. Craig Goodwin wagiye mu kibuga asimbuye Riley McGree, ari we uteye umupira.

Cyaturutse, ku makosa ya Nicolas OtamendI wakuyeho umupira nabi, Craig Goodwin atera ishoti rinini Enzo Jeremias Fernandez, awukoraho, ujya mu izamu.

Australia yagarutse mu mukino nyuma y’iki gitego, itangira gusatira cyane ku buryo yageze imbere y’izamu kenshi gashoboka mu minota 10 ya nyuma, ariko Otamendi ayobora neza ubwugarizi.

Argentine na yo yugariye isigara icungira ku muvuduko wa Lionel Messi. Uyu mugabo yihutanaga umupira ariko yagera imbere y’izamu Lautaro Martinez amutenguha inshuro eshatu atabasha gushyira umupira mu izamu.

Ku munota wa 98 Argentine yari yishyuwe igitego cya kabiri, ikubitwa amashoti ariko Lisandro Martinez n’umuzamu Emiliano Martinez bayirwanaho, abafana 45,032 baryoherwa n’iminota ya nyuma y’uyu mukino.

Argentine na Australia bamaze guhura inshuro eshatu harimo no mu 2005 aho Argentine yatsinze ibitego 4-2, irongera itsinda 1-0.

Argentine nyuma yo gutsinda umukino yakomeje muri ¼, aho izakina n’u Buholandi bwatsinze Leta Zunze Ubumwe za Amerika ibitego 3-1.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .