Iyi mikino yabaye kuri uyu wa Gatatu tariki 30 Ugushyingo 2022, yari ishiraniro, kuko buri kipe yari ifite amahirwe yo gukomeza mu kindi cyiciro cy’irushanwa.

Umukino wa Argentine na Pologne watangiye utuje ukinirwa mu kibuga hagati, ariko Argentine yiharira umupira cyane.

Ku mumota wa 32 Angel Di Maria yateye koruneri yijyana mu izamu, ariko umunyezamu Wojciech Szczęsny wa Pologne awukuramo.

Argentine yakomeje gusatira bikomeye ishaka igitego hakiri kare, ari nako koruneri zari nyinshi.

Iyi kipe yashakaga kuva mu itsinda iyoboye urutonde, yakomereje igice cya kabiri aho yasoreje icya mbere, maze ku munota wa 47 Mac Allister atsinda igitego cya mbere, imitima y’abakunzi ba Argentine isubira mu gitereko.

Ku munota wa 58 Argentine yakoze impinduka, Di Maria asimburwa na Leandro Paredes, Marcos Acuna asimburwa na Nicolas Tagliafico.

Argentine yakomeje kwiharira umupira cyane, ku munota wa 68 Julian Alvarez atsinda igitego cya kabiri ku mupira Fernandez yazamukanye akawumucomekera neza, na we ntiyakora ikosa arangiriza mu izamu.

Umukino warangiye Argentine itsinze Pologne ibitego 2-0.

Undi mukino wabaye, Mexique na yo yatsinze Arabie Saoudite ibitego 2-1 ariko birangira isezerewe kubera ikinyuranyo cy’ibitego, kuko amakipe yombi yanganyije amanota ane, ariko Mexique ikaba ifite umwenda w’igitego kimwe.

Mu mikino ya 1/8, Argentine izakina na Australia ku wa Gatandatu tariki 3 Ukuboza, mu gihe Pologne izakina n’u Bufaransa ku Cyumweru tariki 4 Ukuboza 2022.

Messi yateye penaliti, ariko Wojciech Szczęsny ayikuramo

Wojciech Szczęsny yakuyemo penaliti ya kabiri muri iki Gikombe cy'Isi

Abakinnyi ba Pologne bari mu byishimo

Wojciech Szczęsny yari mu byishimo nyuma yo gukuramo penaliti ya Messi

Lionel Messi ntiyumvaga uburyo penaliti yateye bayifashe

Argentine yaje kubona ibitego bibiri muri uyu mukino

Robert Lewandowski yishimiye kuguma mu irushanwa nyuma yo gutsindwa

Mexique yaje gusezererwa ku kinyuranyo cy'ibitego

Abakinnyi ba Mexique baciwe intege no gusezererwa