00:00:00 IGIHE NETWORK KN KINYARWANDA EN ENGLISH FR FRANCAIS

Amerika yikuye imbere ya Iran, u Bwongereza bunyagira Wales (Amafoto)

Yanditswe na IGIHE
Kuya 30 Ugushyingo 2022 saa 12:02
Yasuwe :

Leta Zunze Ubumwe za Amerika yatsinze Iran igitego 1-0 ikatisha itike ya 1/8 cy’Igikombe cy’Isi mu gihe u Bwongereza bwanyagiye Wales ibitego 3-0.

Iyi mikino yahuje amakipe ahuriye mu Itsinda B yakinwe saa Tatu z’ijoro ryo kuri uyu wa Kabiri, tariki ya 29 Ugushyingo 2022.

Umukino wari witezwe na benshi ni uwa Amerika na Iran ahanini kubera amagambo yari yawubanjirije.

Ishyirahamwe ry’Umupira w’Amaguru muri Iran ryatangaje ko rigiye kurega Leta Zunze Ubumwe za Amerika muri FIFA, ku bwo kugaragaza ibendera ry’iki gihugu ryavanyweho ikimenyetso cya ‘Allah’.

Ubu bushotoranyi bwa Amerika bwakozwe mu gihe yo na Iran biri mu Itsinda B mu mikino y’Igikombe cy’Isi, ndetse byitegura guhura ku wa 29 Ugushyingo 2022 mu mukino wa gatatu mu itsinda.

Amategeko y’Ishyirahamwe ry’Umupira w’Amaguru ku Isi, FIFA, agena ko ibyakozwe na Amerika bijyanye no guhindanya imyemerere y’abandi, ikipe ibihamijwe ihanishwa igihano gishobora kugera ku guhagarikwa imikino 10.

Umubano wa Leta Zunze Ubumwe za Amerika na Iran waranzwe n’amakimbirane y’ibihugu byombi hagati ya 1979 na 1981. Amerika ikomeza gushinja Iran guhonyora uburenganzira bwa muntu.

Iki gihugu cy’igihangange ku Isi cyageze aho gifatira ibihano Iran kubera kugishinja gucura intwaro za kirimbuzi. Mu 2006 ni bwo Iran yashyiriweho ibihano kubera gutunganya ubutare buvamo ibisasu.

Ibi byarenze bigera mu kibuga mu mukino Amerika yasabwaga gutsinda kugira ngo ikomeze muri 1/8 mu gihe Iran yo yashakaga inota rimwe gusa.

Amerika yawinjiyemo isatira cyane kuva ugitangira ndetse yaruhutse ibonye igitego cyo ku munota wa 38 cyatsinzwe na Christian Pulisic nyuma y’umupira w’umutwe yateye awuhawe na Dest.

Uyu rutahizamu yahise agira imvune abanza kwitabwaho n’abaganga ariko akomeza gukina.

Ku munota wa 51, Timothy Weah w’imyaka 22 yatsinze igitego cya kabiri cya Amerika ariko umusifuzi yerekana ko yari yaraririye.

Igitego cya Amerika cyo mu gice cya mbere ni cyo cyatandukanyije impande zombi.

Amahirwe Iran yabonye mu minota ya nyuma ntiyashoboye kuyabyaza umusaruro ngo ibone igitego kimwe yasabwaga ngo ikomeze.

Amerika yageze muri 1/8 cy’Igikombe cy’Isi, ku nshuro ya gatatu yikurikiranya kuva mu 2010 na 2014 mu gihe Iran yananiwe kurenga amatsinda mu nshuro esheshatu imaze kwitabira iri rushanwa.

  U Bwongereza bwanditse amateka kuri Wales

Ikipe y’Igihugu y’u Bwongereza yatangiye irusha Wales ariko abasore ba Gareth Southgate babonye amahirwe batashoboye kubyaza umusaruro.

Ba rutahizamu bayobowe na Rashford Marcus babonye amahirwe ariko ntibabasha kuyabyaza umusaruro.

Amakipe yombi yagiye kuruhuka anganya 0-0, nta kipe irareba mu izamu ry’indi.

Igice cya kabiri cy’uyu mukino wabereye kuri Ahmad bin Ali Stadium cyatangiye u Bwongereza bukomeza kwerekana inyota yo gutsinda.

Wales na yo yashakaga intsinzi yashobora kuyifasha gukomeza muri 1/8, yakoze impinduka aho Kapiteni wayo Gareth Bale yavuyemo, hinjiramo Brennan Johnson.

Ku munota wa 50, u Bwongereza bubifashijwemo na Rashford bwafunguye amazamu ku gitego yatsinze kuri coup franc, kiba icya kabiri cye mu Gikombe cy’Isi kiri kubera muri Qatar.

Nyuma y’umunota umwe gusa, Phil Foden yatsinze igitego cya kabiri cy’u Bwongereza.

Rashford wa Manchester United wigaragaje cyane uyu munsi, ku munota wa 68 yashyizemo agashyinguracumu, afasha igihugu cye kubona igitego cya gatatu, cyari icya kabiri cye muri uyu mukino.

Umukino warangiye u Bwongereza butsinze Wales ibitego 3-0. Ni ku nshuro ya mbere busoje ku mwanya wa mbere mu mikino y’amatsinda kuva mu 2006 ubwo bwasezererwaga na Portugal muri ¼.

Igitego cya kabiri bwatsinze muri uyu mukino ni icy’ijana bwabonye mu Gikombe cy’Isi, mu gihe Rashford wagitsinze yabaye umukinnyi wa kabiri wa Manchester United watsinze ibitego bitatu nyuma ya Bobby Charlton (wabikoze mu cy’Isi cya 1966).

Marcus Rashford ubu anganya ibitego na Kylian Mbappé w’u Bufaransa, Umuholandi Cody Gakpo na Enner Valencia ukinira Equateur yasezerewe, aho bafite ibitego bitatu.

U Bwongereza bwazamukanye na Amerika muri 1/8 cy’Igikombe cy’Isi. Biteganyijwe ko “Three Lions” izakina na Sénégal ku Cyumweru mu gihe Amerika izacakirana n’u Buholandi ku wa Gatandatu, tariki ya 3 Ukuboza 2022.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .