Ubuhamya bw’Abanyarwanda biga muri Kaminuza ya Manchester bahuguwe na Lexis Academy

Abanyarwanda babarizwa mu mpande zose z’Isi ku mpamvu zirimo gushaka ubuzima, kwiyungura ubumenyi mu masomo y’ikirenga mu gutanga umusanzu wo kubaka urwababyaye.

Muri bo hari abahabwa buruse zo kwiga na Leta, izitangwa na Kaminuza bigamo n’izinyuzwa mu yindi mishinga.

Ibizamini bya TOEFL (Test of English as Foreign Language) na IELTS (International English Language Testing System) biri mu bikorwa n’abanyeshuri bashaka kwiga i Burayi, Amerika na Canada.

Mu Banyarwanda batanu biga muri Kaminuza ya Manchester mu Bwongereza mu 2018, batatu bahuguwe na Lexis Academy mbere yo gukora ibizamini.

Mu kiganiro na IGIHE, bahurije ku mahirwe yabasekeye binyuze muri iri shuri ryabatyarije ubumenyi mu Cyongereza.

Muzigirwa Marie Michelle wiga ibijyanye n’Ubwubatsi yasobanuye ko ubumenyi yahakuye bwamuciriye inzira.

Yagize ati “Ishuri ryamfashije kunoza imyandikire yanjye hibandwa ku bikurikizwa mu gukosora ikizamini cya IELTS cyo kwandika. Aho nari mfite imbaraga nke ndahakosora. Narangije bimeze neza, amanota yariyongereye. Iyo ntaza guhugurwa nari gusigara.”

Mulinda Michel wiga mu bijyanye n’Ubwubatsi we yavuze ko “Naje ntasobanukiwe neza ibisabwa ngo umuntu akore IELTS atsinde. Ishuri ryarampuguye, rimpa inama, nditegura nkoze ndatsinda. Nari mfite ukwezi kumwe ko kwitegura ariko umuyobozi w’ishuri yakomeje kundemamo icyizere. Uko banyitayeho byaramfashije cyane.”

Aba banyeshuri na mugenzi wabo Nsanzimana Pascal wiga ibijyanye n’Ingufu, mu butumwa bwabo bakanguriye abashaka gukora ibi bizamini kwimenyereza gusoma cyane bibanda ku bitabo kuko bibafasha mu myigire yabo.

Kuri ubu Icyongereza kiri mu ndimi zivugwa n’abantu benshi ku Isi, bagera kuri miliyoni 360. Mu Rwanda cyemewe mu ndimi z’ubutegetsi, kinakoreshwa mu mashuri no mu ishoramari ryambukiranya imipaka.

Umuyobozi wa Lexis Academy, Haliyamutu Jean Fiacre, yavuze ko intego yabo ari ugufasha abo Icyongereza kibereye inzitizi mu buzima no gushyigikira abakimenye bakakibyaza umusaruro.

Yagize ati “Abatugana tubaha isuzuma ry’ikizamini bazakora. Ababonye 6.5/9 kuri IELTS na 80 /120 kuri TOEFL asabwa n’amashuri makuru na za kaminuza, tubabwira ko nta kibazo cy’ururimi bafite, ko bakwiyandikisha bagategereza gukora.”

“Abo duhugura ni ababonye amanota 5.5 /9 na 60/120. Uri munsi yayo, tumugira inama yo kwiga Icyongereza. Dukora ibishoboka ngo abatugana batsinde. Ubumenyi bahungukira haba mu kuvuga, kwandika, kumva no gusoma Icyongereza, bunabafasha mu mirimo ya buri munsi iyo batabonye amahirwe yo guhita bajya kwiga.”

Abanyuze muri Lexis Academy yashinzwe mu 2004 barimo ababonye amahirwe yo gukomereza amasomo muri Canada, Amerika, u Bufaransa, Australia, Pologne, Philippines, u Bushinwa, u Buhinde n’ahandi.

Usibye abahabwa amasomo yihariye yo gukora ibizamini, Lexis Academy inigisha Icyongereza gisanzwe (General English) n’igikoreshwa mu biro (Business English) ku bantu bose.

Iri shuri rikorera mu Mujyi rwagati mu nyubako yo kwa Ndamage mu igorofa rya gatatu. Ushaka kwiyandikisha cyangwa ibindi bisobanuro ahamagara kuri 0783593253/0783467011/0788574131 cyangwa akabandikira kuri email: [email protected]

Aba banyeshuri ubu bari kwiga muri Kaminuza ya Manchester mu Bwongereza nyuma yo guhugurwa mu Cyongereza na Lexus Academy
Mbere y'uko berekeza mu Bwongereza bafashe ifoto y'urwibutso n'Umuyobozi wa Lexis Academy, Haliyamutu Jean Fiacre (wa gatatu uturutse iburyo)
Abiga muri Lexus Academy bahabwa ibitabo bibafasha gusoma neza icyongereza

Kwamamaza