00:00:00 IGIHE NETWORK KN KINYARWANDA EN ENGLISH FR FRANCAIS

Massamba yasinye amasezerano y’imikoranire na Tomtransfers (Video)

Umuhanzi Massamba Intore wamamaye mu kuririmba indirimbo gakondo yasinye amasezerano yo gukorana na Sosiyete ya Tomtransfers isanzwe ikora ibikorwa bitandukanye birimo gucuruza imodoka n’ibindi.

Ni amasezerano yasinywe nyuma y’aho Massamba yari amaze igihe agirana ibiganiro n’iyi sosiyete.

Massamba yatangaje ko yagiye areba amatangazo yamamaza Tomtransfers nyuma aza guhura na Munyaneza Tom yamusobanurira uko bakora agasanga yarakererewe ko bakorana.

Ati “Yarabinsobanuriye neza nsanga narakererewe. Ndamubwira nti njye ntabwo uyu munsi urenga tudatangiye gukorana. Bukeye mu gitondo ibyo nifuzaga nahise mbibona. Ayo masezerano rero ni meza ni ayo kugira ngo nanjye nk’umuhanzi uzwi ufite benshi bankurikira ushobora kugeza Tomtransfers ku rwego rwiza aho nkangurira abantu kugira ngo bagane iyi sosiyete yazanye ibintu byiza.”

Uyu muhanzi avuga ko icyo azakora ari ukwamamariza iki kigo akakimenyekanisha mu bamukurikira ahantu hatandukanye haba mu bihangano bye, mu bitaramo n’ahandi.

Ati “Nzamamaza ibikorwa byabo ahantu hose ndi. Yaba mu bitaramo, imbuga nkoranyambaga, mu biganiro n’abanyamakuru ndetse no hagati n’inshuti zanjye turi kuganira. Mfite abankurikira bakuze ndetse n’abakiri bato bagitangira kwirema neza mu bintu bijyanye n’imibereho nzaba umuvugizi mwiza. Duteganya gukora indirimbo igendanye n’ibyo Tom Transfers ikora icyo gihe nzakorana n’abandi bahanzi bakorana na yo.”

Uyu muhanzi akomeza avuga ko Tomtransfers ifite umwihariko wo kuba igiye kujya ifasha abantu bari mu Rwanda kubona imodoka nziza zo kwifashisha mu gihe bashaka gutembera, ndetse by’umwihariko umuntu ufite amafaranga make akazoroherezwa gutunga imodoka akazagenda ayishyura gake.

Ati “Maze kujya mu bihugu bitandukanye muri Diaspora, abantu benshi baba bibaza ku biciro byo gukodesha imodoka mu Rwanda cyangwa kubona apartement zihendutse aho rero hakaba ariho duhera tubasobanurira ko Tom Transfers yabikemuye.”

Aya masezerano nta gihe runaka yahawe kuko iyi sosiyete na Massamba bashobora kugirana amasezerano y’umwaka umwe, ibiri cyangwa indi runaka ariko bakazajya bayavugurura bitewe n’uko imikoranire iri kugenda.

Umuyobozi ushinzwe imenyekanishabikorwa muri Tomtransfers, Ngiruwonsanga Jean Damascène, yabwiye IGIHE ko Tomtransfers ari umuryango wakira abantu bose bawugana.

Ati “Tom Transfers ni umuryango wakira abantu bose muri rusange bivuga ngo umuhanzi utwegereye cyangwa se uwo twegereye akabanza akatwumva akabisobanukirwa akabimenya. Twe twegera abantu bazwi kugira ngo tubanyuzemo ibikorwa byacu bigera ku bantu benshi. Niyo mpamvu twegereye Massamba nk’umunyabigwi, turaganira twemeranya gukorana kuko twabonaga afite imbaraga mu murongo wacu dufite.”

Yakomeje avuga ko atari we wenyine bagomba kugarukiraho kuko bafite gahunda yo gukorana n’abandi kuko yaba uwo bakoranye na bo ubwabo babyungukiramo.

Avuga ko uretse abahanzi nk’uku basinyanye amasezerano na Massamba, hari n’abanyamakuru ndetse n’abandi bantu benshi batigeze bifuza kujya imbere ya camera bakorana barimo abakinnyi b’umupira w’amaguru, basketball cyangwa volleyball.

Ubu sosiyete ya Tomtransfers imaze guteza imbere u Rwanda mu bikorwa bitandukanye, aho yafashije abantu bajyaga bakenera imodoka ariko badafite ubushobozi bwo kuzigura ikazibakodesha mu gihe cyose bifuza cyangwa se abantu bashaka kuzigura badafite amafaranga ahagije bakishyura igice kimwe andi bakazayishyura bayabonye.

Tom Transfers igiye gufungura amashami mu bindi bice by’igihugu nko mu karere ka Musanze mu Majyaruguru, Rubavu mu Burengerazuba na Huye mu Majyepfo. Barashaka no kwagura ibikorwa mu bihugu by’abaturanyi nka RDC i Goma aho bateganya gufungura amashami. Hari n’ibindi bihugu byinshi byo muri Afurika bishaka ko dukorana kubera izina Tom Transfers imaze kubaka i Burayi.

Uretse imodoka, iyi sosiyete yanorohereje abakodesha ibyumba cyangwa inzu zo kuruhukiramo, aho umuntu ashobora kwishyura icyumba kimwe mu nzu irimo ibyumba bitandatu cyangwa bine, akaba aricyo akoresha bitabaye ngombwa kwishyura inzu yose.

Uretse ibi hari Abanyarwanda barenga 100 bamaze guhabwa akazi mu mishinga itandukanye y’ubucuruzi ikorwa na Tomtransfers ndetse ubu bamaze kwiteza imbere ku buryo bugaragara.

Tomtransfers itanga izindi serivisi zitandukanye aho ifite Bar & Restaurent, bafite igaraje, Supermarket ndetse mu minsi iri imbere barashaka gufungura akabyiniro.

Ntabwo igihe aya amsezerano azamara cyigeze gitangazwa
Umuyobozi ushinzwe imenyekanishabikorwa muri Tomtransfers, Ngiruwonsanga Jean Damascène hamwe na Massamba

Special pages
. . . . . .