Urujijo mu Burundi rurakomeje nyuma y’urupfu rwa Nkurunziza; Agathon Rwasa yasabye ko haba amatora mashya

Yanditswe na Philbert Girinema
Kuya 11 Kamena 2020 saa 10:17
Yasuwe :
0 0

Urupfu rwa Perezida Pierre Nkurunziza rukomeje gushyira ihurizo rikomeye kuri politiki y’u Burundi, aho utavuga rumwe n’ubutegetsi, Agathon Rwasa yashimangiye ko hakwiye gukurikizwa ibiteganywa n’Itegeko Nshinga, bityo Perezida w’Inteko Ishinga Amategeko agafata ubutegetsi mu gihe cy’inzibacyuho, agategura amatora mashya y’Umukuru w’Igihugu.

Nibwo bwa mbere mu mateka y’u Burundi bibayeho ko Umukuru w’Igihugu apfuye hari n’undi watowe utararahira.

Itegeko Nshinga rya Repubulika y’u Burundi ntiryemerera Gen Evariste Ndayishimiye uherutse gutorwa kuba yarahira ubu, kuko riteganya ko Umukuru w’Igihugu aba agomba kurahira hashize iminsi 90 ibyavuye mu matora bitangajwe. Kuri gahunda ni uko agomba kurahirira kuyobora u Burundi ku wa 20 Kanama.

Ingingo ya 121 y’Itegeko Nshinga ry’u Burundi iteganya ko iyo Umukuru w’Igihugu apfuye cyangwa agize izindi mpamvu zitamubashisha gukomeza imirimo ye, asimburwa na Perezida w’Inteko Ishinga Amategeko, agategura amatora y’usimbura Perezida mu gihe kitari munsi y’ukwezi kandi kitarenze amezi atatu, keretse hari impamvu zindi zikomeye nabyo byemezwa n’Urukiko rushinzwe kurengera Itegeko Nshinga.

Umuvugizi wa leta y’u Burundi, Prosper Ntahorwamiye, yatangaje ko mu gihe habayeho impamvu nk’izi zitunguranye "inzego zibanza kubaza urukiko rw’itegeko nshinga" rukiga ku kigomba gukorwa ndetse ko hari iminsi bifata kugira ngo umwanzuro utangazwe.

Ku rundi ruhande, Agathon Rwasa uyoboye ishyaka CNL ritavuga rumwe n’ubutegetsi, watsinzwe mu matora aheruka, yavuze ko inzira ikwiriye gukurikizwa ari imwe, yo gutegura amatora.

Rwasa yasabye Perezida w’Inteko Ishinga Amategeko, Pascal Nyabenda, uteganwa nk’ugomba gusimbura Umukuru w’Igihugu witabye Imana, ko yakubahiriza ibikubiye mu Itegeko Nshinga, agafata ubutegetsi ariko yabugeraho agakora ikintu cy’ingenzi ari cyo “gutegura amatora mashya mu gihe kiri hagati y’ukwezi n’amezi atatu”.

Ku rundi ruhande, bamwe mu bayobozi bakuru mu Burundi cyane mu ishyaka riri ku butegetsi, bamaganye igitekerezo cya Rwasa bavuga ko nta shingiro gifite, bibutsa ko Nkurunziza yari ku musozo wa manda ye kandi ko intsinzi ya Gen Ndayishimiye yari yaramaze kwemezwa n’Urukiko rurengera Itegeko Nshinga.

Kuri uyu wa Kane guhera ku isaha ya saa mbili z’igitondo, hateganyijwe Inama idasanzwe y’Abaminisitiri yatumijwe n’Umuvugizi wa Guverinoma Prosper Ntahorwamiye, aho iza kwiga intambwe ikurikira nyuma y’urupfu rwa Nkurunziza.

Iyi nama ishobora kuza gusaba Urukiko rurengera Itegeko Nshinga kwiga ku cyakorwa ku mwanya w’Umukuru w’Igihugu, rukaba arirwo rwemeza uba Perezida w’inzibacyuho.

Hari amakuru kandi avuga ko iminsi 90 iteganywa n’Itegeko Nshinga nk’igihe cyo kurahira kwa Perezida mushya ishobora kwigizwa imbere, ku buryo Gen Ndayishimiye yarahira mbere y’igihe cyari giteganyijwe akaba ariwe uzayobora imihango yo gusezera bwa nyuma kuri Nkurunziza.

Pascal Nyabenda uhabwa amahirwe yo kuba Perezida w’inzibacyuho, niwe wari amahitamo ya mbere ya Nkurunziza nk’umusimbura we, gusa icyo gitekerezo cyamaganwe n’abasirikare bakuru mu gihugu, cyane abari ku rugamba rwaganishije Nkurunziza ku butegetsi batsimbaraye ku mahitamo yabo y’umusirikare, byatumye Gen Ndayishimiye asezera bwangu mu gisirikare kugira ngo yinjire muri politiki.

Mu mpera za Kanama 2016 nibwo yatorewe kuba Umunyamabanga Mukuru wa CNDD-FDD, nyuma y’ukwezi kumwe gusa avuye mu gisirikare.

Urupfu rwa Nkurunziza rwaciye igikuba mu baturage, cyane ko rwabaye rutunguranye aho benshi baketse ko yaba yarahitanywe n’icyorezo cya Coronavirus, dore ko bivugwa ko umugore we umaze iminsi arwariye muri Kenya yaba yari yaragiye kuyivuza.

Agathon Rwasa utavuga rumwe n'ubutegetsi mu Burundi, yavuze ko Itegeko Nshinga rikwiye gukurikizwa, hanyuma Perezida w'inzibacyuho agategura amatora mashya mu gihe kiri hagati y'ukwezi n'amezi atatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .