Ubuzima mu Burundi muri manda ya nyuma ya Nkurunziza nka Perezida

Yanditswe na IGIHE
Kuya 26 Kamena 2020 saa 11:03
Yasuwe :
0 0

Abarundi bakomeje ikiriyo nyuma y’urupfu rutunguranye rw’uwo bafata nk’umwana w’igihugu, umubyeyi w’igihugu kuri bamwe n’umugome ku bo ubutegetsi bwe bwaruriye bamushinja ko bwabahejeje ishyanga abandi bukabavutsa ubuzima.

Ni umugabo wibukirwa kuri byinshi, guhera ku buryo yafashe igihugu no kugeza ku buryo yabuvuyeho amaze kugira uruhare mu matora y’umusimbura, ibintu benshi batahaga amahirwe ko bishoboka.

Mu mpera ya manda ye, yagizwe umurinzi w’ikirenga w’indangagaciro yo gukunda igihugu (guide suprême du patriotisme) hashingiwe ku ruhare rwe mu gukunda no gukundisha igihugu Abarundi, kubera urugero rwiza yahaye Abarundi mu kuzirikana igihugu, mu kunywanisha Abarundi no kugendera ku bwitonzi byaranze abasekuruza b’u Burundi.

Nyuma yo kurokoka ibikomere yatewe n’intambara yamuganishije ku butegetsi, Nkurunziza yahereye ubwo yiyegurira Imana, ibikorwa bye byose bishingira ku masengesho no kuragiza Imana igihugu.

No mu byashingiweho agirwa umurinzi w’ikirenga w’indangagaciro zo gukunda igihugu, harimo ko yagize uruhare mu kurinda umutekano w’igihugu, “ashingiye ku Mana ishobora byose”.

Abarundi bamushimira ko ariwe mukuru w’igihugu wa mbere wayoboye u Burundi akarangiza manda ze zose hari umutekano, ku buryo abaturage batirirwa babundabunda bahunga intambara.

Byaturutse ku kuba agifata ubutegetsi yarashyize ingufu mu kunga igisirikare, kikaba ikibonwamo na buri wese yaba Umuhutu n’Umututsi ndetse no muri Guverinoma bigenda bityo.

Ababyeyi kandi baramwirahira ku bwo kuba yarashyizeho gahunda z’uko ugiye kubyara abyarira ubuntu ndetse umwana akemererwa kuvuzwa ku buntu kugeza agejeje imyaka itanu.

Nkurunziza nk’umuntu wabaye umwarimu wa Siporo muri Kaminuza, yashyize imbere ibikorwa by’imikino cyane umupira w’amaguru. Abakunzi ba Ruhago mu Burundi bamushimira ko kuri manda ye hubatswe stade ziciriritse nyinshi hirya no hino mu gihugu kugira ngo babashe kugaragaza impano zabo, byatumye u Burundi bugira abakinnyi benshi bakina hanze y’igihugu kandi bakomeye bunitabira CAN iherutse.

Perezida Pierre Nkurunziza yasezeweho bwa nyuma kuri uyu wa Gatanu

Apfanye ipfunwe...

Mu 2019 Ambasaderi wa Uganda muri Loni, Adonia Ayebare, yasuye Nkurunziza amubaza icyo yumva yagejeje ku Burundi nicyo atarakora. Mu kumusubiza, Nkurunziza yagize ati“Adonia, uribuka ubwo wazaga kunsura hano mu 2015, icyumweru kimwe ngarutse mva muri Tanzania ngahagarika coup d’etat yari yateguwe n’igisikare n’ubwicanyi bwakorerwaga abaturage bacu umunsi ku wundi, muri make igihugu cyari mu muriro?”

“Ikintu gikomeye nagezeho ni ukugarura amahoro n’umutekano mu Burundi bwose”.

Nkurunziza apfuye yemera ko u Burundi budahagaze neza mu rwego rw’ubukungu ndetse n’ubuzima. Icyo gihe yabwiye Adonia ati “Ubukungu, ubukungu bw’u Burundi buri ahantu habi kimwe n’urwego rw’ubuzima”.

Nkurunziza yagiye ku butegetsi yemereye Abarundi kuzahura ubukungu bugatera imbere ku kigero cya 3% mu 2005, 7% mu 2020 na 10% mu 2025.

Yari yiyemeje kuvana umutungo umuturage yinjiza ku madolari 110 ku mwaka, ukagera ku madolari 116 mu 2010, amadolari 264 mu 2015 n’amadolari 430 mu 2020.

Ubu umusaruro mbumbe w’umuturage mu Burundi ku mwaka wa 2018 wabaye amadolari 275, mu 2017 wari amadolari 293, mu 2016 wari amadolari 282 mu gihe mu 2015 yari amadolari 296.

Ikigega Mpuzamahanga cy’Imari, FMI, kivuga ko ubukungu bw’u Burundi muri uyu mwaka (2020) buzamanuka ku kigero cya -5,5%. Kaburimbo mu gihugu iri mu mihanda ireshya na kilometero 1950.

Imibare ya Banki y’Isi igaragaza ko Abarundi 64% bari munsi y’umurongo w’ubukene, ni mu gihe abana batandatu mu 10 baba bafite ikibazo cyo kugwingira. Icyizere cyo kubaho ku Barundi nacyo kiragabanuka ubutitsa aho cyavuye ku myaka 57 mu 2014 kigera ku myaka 52 mu 2018.

Nkurunziza yakunze kuvuga ko ubukungu bw'u Burundi ari rumwe mu nzego zihagaze nabi mu gihugu

Asize igihugu cyarabaye nk’akarwa

Muri manda ya kabiri ya Nkurunziza, u Burundi bwahinduye isura, buhagarika ibikorwa byinshi byabuhuzaga n’amahanga ndetse imiryango itandukanye mpuzamahanga irahambirizwa.

Hari nyuma y’uko manda ya kabiri ya Nkurunziza itereye ibibazo, abatavuga rumwe n’ubutegetsi bakamushinja ko inyuranyije n’Itegeko Nshinga ku buryo abaturage barenga ibihumbi 240 bahungiye mu bihugu bitandukanye bihana imbibi n’igihugu cye no mu mahanga ya kure.

Mu bihugu by’ibituranyi, Tanzania ni cyo gihugu cyonyine cyari gifitanye umubano usa n’ukomeye na Leta ya Nkurunziza, ibindi byose byabanaga bya nyirarureshwa. Ibihugu by’i Burayi byahoze ari umuterankunga wabwo, ibyinshi byahagaritse inkunga.

Ikindi ni uko manda ya gatatu ya yaranzwe no kwirukana imiryango mpuzamahanga cyangwa yigenga yakoreraga mu gihugu. Nko mu 2016 Ishami rya Loni rishinzwe uburenganzira bwa muntu ryarahagaritswe, nyuma rirafungwa kuko ryakoze icyegeranyo kigaragaza ko inzego za Leta zishe abaturage abandi zikabafunga nyuma ya coup d’etat yaburijwemo mu 2015.

Umuryango w’ibihugu by’ubumwe bw’u Burayi (EU) wafatiye ibihano bamwe mu bayobozi bakuru b’u Burundi birimo iby’ingendo, kubera uruhare rwabo mu mvururu zo mu 2015.

Jesper Bjarnesen, umushakashatsi muri Nordic Africa Institute, ati “Nkurunziza yashakaga guheza u Burundi mu ruhando mpuzamahanga, ariko byagize ingaruka ku baturage b’igihugu cye. Aha ni mu bijyanye n’ubufasha mu by’ubukungu kandi byakwigaragaza mu rwego rw’ubuzima mu bufasha igihugu gihabwa mu kurwanya COVID-19.”

Uko kwifungirana kwajyanye no kwiheza kw’abakuru b’ibindi bihugu. Mu myaka ine amaze muri manda ya gatatu, abakuru b’ibihugu batatu nibo bamaze gusura u Burundi, ni ukuvuga Ali Bongo Ondimba wa Gabon muri Mata 2018, Mohamed Abdullahi “Farmajo” wa Somalia wamusuye muri Gashyantare 2019, na Felix Tshisekedi wa Repubulika Iharanira Demokarasi ya Congo wasuye icyo gihugu muri Kamena 2019.

Impuguke muri politiki y’akarere k’ibiyaga bigari zivuga ko coup d’etat yapfubye mu 2015 yatumye Nkurunziza akora ibishoboka ngo akure igihugu cye mu maso y’ibindi, kuko yumvaga ko nk’abakuru b’ibihugu bya EAC bashaka kugena uko igihugu cye kibaho.

Bavuga ako akarere kazamwibukira ku buryo atitabiriye ubutumire bw’inama z’abakuru b’ibihugu inshuro nyinshi. Kuva mu 2015 ntiyigeze yitabira inama z’Umuryango wa Afurika yunze Ubumwe cyangwa se iz’Inteko rusange ya Loni.

Tshisekedi ni umwe mu bakuru b'ibihugu bake basuye u Burundi muri manda ya nyuma ya Nkurunziza

Amezi ya nyuma ya Nkurunziza, kwifuriza inabi amahanga n’ibindi

Umunyarwanda yagize ati “inzira ntibwira umugenzi” yungamo ati “urucira uwo hanze rugatwara uwo mu nzu”! Mu minsi 40 ishize, mu Burundi ishimwe ryari ryose ku Mana bayishima ko yateje icyorezo cya Coronavirus, kikibasira abo butavuga rumwe, banayitakambira ko iki cyorezo cyakaza umurego ku bandi maze bo bakikorera amatora nta nkomyi; gusa bibagiwe ikintu kimwe cy’ingenzi, ko Imana koko atari nk’umuntu.

Abarundi kimwe mu byo bibagiwe, ni uko ibibi bifuriza abandi bishobora kubageraho ndetse bikanabagiraho ingaruka zikomeye; ubu ibimenyetso biragaragaza ko Coronavirus bashakaga ko ihitana abandi, yaba iri gusya itanzitse ihereye ibukuru.

Ubwo hatangiraga ibikorwa byo kwiyamamaza ku mwanya w’Umukuru w’Igihugu mu ishyaka CNDD-FDD, hari umugore w’umuvugabutumwa wahawe ijambo, atangira aririmba indirimbo irimo kwivuga ibigwi k’u Burundi, ashima Imana ko yabarinze abanzi babwo barimo u Rwanda na Perezida warwo.

Uwo mugore wasengeye ibikorwa byo kwiyamamaza i Muramvya, yashimye Imana ko yateje Coronavirus abanzi b’u Burundi, ubu bakaba baraheze mu nzu. Yakomeje asaba Imana gukomeza guheza mu nzu abo yita abanzi, bakazayavamo ari uko ishyaka CNDD-FDD rimaze gutsinda amatora.

Ubu Coronavirus mu Burundi biravugwa ko ivuza ubuhuha nyuma y’uko no mu minsi ishize umugore wa Perezida Nkurunziza ashyizwe mu bitaro hamwe n’abarinzi be, ndetse amakuru akurikira urupfu rutunguranye rwa Nkurunziza akaba avuga ko ariyo yamwivuganye.

Uru rupfu rutunguranye rwa Perezida Pierre Nkurunziza rwashegeshe u Burundi rusigira umukoro ukomeye ubutegetsi bwa Gen Evariste Ndayishimiye mu gusana igihugu cyangiritse bikomeye.

Nkurunziza ni umugabo wafatwaga nk’umubyeyi w’igihugu kuri bamwe, ku bandi agafatwa nk’umugome bikomeye kuko ubutegetsi bwe bwabaheje abandi bukabavutsa ubuzima.

Mbere y’urupfu rwe, mu Burundi hari hashize amezi abiri hari ibikorwa by’amatora y’Umukuru w’Igihugu, abagize Inteko Ishinga Amategeko ndetse n’abayobozi b’inzego z’ibanze; aho Ishyaka rye CNDD-FDD ariryo ryegukanye imyanya myinshi.

Ni amatora yabaye mu gihe Isi yose ihangayikishijwe n’icyorezo cya Coronavirus, ariko mu Burundi ho inkuru y’iki cyorezo yari nk’ibintu by’ahandi bitabareba, ku buryo nta kintu na kimwe kigeze gikorwa mu kwirinda. Ibikorwa byo kwiyamamaza byahuruje imbaga, abantu baracyasuhuzanya nk’ibisanzwe yewe bagahana n’imisaya, muri make ubuzima ni ubusanzwe.

Amasaha make mbere y’uko bitangazwa ko Nkurunziza yitabye Imana, umwe mu banyamakuru bo mu Burundi yabwiye IGIHE, ko Coronavirus ifatwa “nk’ibintu bya politiki” ku buryo buri wese atinya no kuyivugaho.

Ati “Ikintu cya Coronavirs usibye Minisitiri w’Ubuzima nta wundi muntu wayivugaho, abanyamakuru bose barabyirinze. Nta nubwo tumenya abarwaye, twe icyo kintu ntikivugwa, umuganga niwe ushobora kukubwira uko bimeze, hari n’abapfa mu bitaro ariko bikavugwa ko ari izindi ndwara.”

Mu baturage b’u Burundi, usibye abize, kandi nabo babaye hanze y’igihugu, nibo usanga bafite ubwoba bwa Coronavirus, abandi nta na kimwe ibabwiye byagera mu byaro ho bikaba kure kubi.

Ati “Hari abo ushobora kuganira nabo bakakubwira ngo nibyo mfite ubwoba ariko ahenshi nta bwoba, ubwoba buri muri bake, abantu bize gusa. Mu muhanda usanga abantu bagenda nk’ibisanzwe, abacuruza muri za pharmacie nibo bambara za mask. Gusa ikintu gihari ni ugukaraba intoki, ahantu hose winjira ukarabye.”

Kuri bamwe, Nkurunziza yari umuntu mwiza mu gihe hari abandi bamuvumiraga ku gahera

Nkurunziza yaba yarahitanywe na COVID-19?

Mu itangazo rya Guverinoma y’u Burundi, ryasobanuye ko Nkurunziza yapfuye ku mugoroba wo kuri uyu wa Mbere aguye mu bitaro biri mu cyaro cy’ahitwa Karusi, azize guhagarara k’umutima.

Nubwo byatangajwe ko yahitanywe n’umutima, nta na rimwe byigeze bivugwa mbere ko Nkurunziza afite ibimenyetso by’umutima ahubwo nyuma y’aho umugore we arwariye Coronavirus akajya kwivuza muri Kenya, byatangiye guhwihwiswa ko iki cyorezo cyaba cyageze no mu bakomeye mu gihugu.

Abahanga mu by’ubuzima bakunze kuvuga ko abantu badakwiriye kwitiranya umutima na Coronavirus ariko ko ku rundi ruhande abarwaye iki cyorezo bashobora kugaragaza ibimenyetso nk’iby’abarwaye umutima.

Impamvu ni uko COVID-19 ishobora kwangiza ibihaha, umuntu akananirwa guhumeka ku buryo itera ibibazo by’ubuhumekero. Ubushakashatsi bwakozwe n’ibitaro byo mu Mujyi wa Wuhan mu Bushinwa bwayobowe na Dr. Zhibing Lu mu bitaro bya Zhongnan bwagaragaje ko 20% by’abarwayi ba COVID-19, bari bafite ibimenyetso byo kwangirika k’umutima.

Bwagaragaje ko bene abo bantu baremba cyane, ndetse inshuro nyinshi bagira ibibazo byo guhumeka. Umuntu wahuye n’icyo kibazo aba afite ibyago byo gupfa byikubye inshuro enye ugereranyije n’undi udafite ikibazo mu buhumekero.

Ibi kandi byagaragajwe n’abaganga bo mu Butaliyani, aho berekanye ko umuntu ufite ibibazo by’umutima ashobora no kwibasirwa na Coronavirus ku buryo bworoshye.

Abantu bapfa umunsi ku wundi, abaminisitiri bamwe baranduye

Mu mpera za Gicurasi byatangajwe ko Denise Bucumi, umugore wa Nkurunziza yagiye kwivuriza Coronavirus muri Kenya, agezeyo ahita ashyirwa mu bitaro ndetse n’abarinzi be batatu bapimwe basanganwa iki cyorezo.

Hari amakuru kandi avuga ko abandi bayobozi barimo abaminisitiri n’abadepite barimo abanduye Coronavirus. Igikomeje kwibazwa na benshi ni uko mu baturage basanzwe byifashe niba Umugore wa Nkurunziza n’abandi bayobozi baranduye.

Umunyamakuru w’Umurundi yabwiye IGIHE ko hari abaganga batanga amakuru y’ibibera mu bitaro byo mu Mujyi wa Bujumbura, bavuga ko abantu bapfa bishwe n’iki cyorezo ariko bikitirirwa izindi ndwara zirimo Malariya.

Ku rundi ruhande, leta yashyize ingufu mu kubwira abaturage ko Coronavirus atari indwara bakwiye gutaho umwanya kuko ahubwo basenga ibindi bakabiharira Imana.

Ni ibigaragaza umukoro ukomeye ubugetsi bufite wo guhangana n’iki cyorezo mu gihe cyamaze gukwira mu baturage benshi.

Imibare itangazwa na OMS igaragaza ko mu Burundi hari abantu 144 banduye Coronavirus barimo umwe witabye Imana na 93 bakize bagasezererwa mu bitaro. Ni mu gihe kuva iki cyorezo cyagaragara mu gihugu ku wa 31 Werurwe hamaze gufatwa ibipimo 382, bike cyane ugereranyije n’ibifatwa n’ibindi bihugu.

Bisobanuye ko haramutse hafashwe ibipimo byinshi, nta kabuza umubare w’abarwayi mu gihugu ushobora kuba watumbagira ukaruta uwa bimwe mu bihugu byo mu Karere.

Ni umuntu wakundaga kugaragara mu bikorwa by'amasengesho byinshi
Yakundaga imikino cyane... aha yari ari kwitegereza isiganwa ry'imodoka
Kimwe mu bikorwaremezo bikomeye asigiye u Burundi, harimo n'Ibiro by'Umukuru w'Igihugu byubatswe n'u Bushinwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .