00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda n’u Burundi bigeze kure ibiganiro ku guhererekanya abagerageje ’Coup d’État’ mu 2015

Yanditswe na Rabbi Malo Umucunguzi
Kuya 19 May 2022 saa 10:56
Yasuwe :

Minisitiri w’Intebe, Dr Edouard Ngirente, yavuze ko u Rwanda n’u Burundi bigeze kure ibiganiro ku bibazo byakomeje kuba igitotsi mu mubano wabyo, ku buryo mu gihe cya vuba umupaka ubihuza ushobora kongera gufungurwa.

Perezida w’u Burundi, Evariste Ndayishimiye, aheruka kuvuga ko kugira ngo umubano n’u Rwanda uzahuke, bizasaba ko ruboherereza abantu bahahungiye, bagize uruhare mu mugambi wapfubye wo guhirika ubutegetsi bwa Perezida Pierre Nkurunziza, mu 2015.

Minisitiri w’Intebe, Dr Ngirente, yabwiye abanyamakuru kuri uyu wa Gatatu ko icyo kibazo gikomeje kuganirwaho.

Yagize ati "Iki kibazo ndagira ngo mvuge ko kirimo kuganirwaho kandi ibiganiro bigeze kure, ntabwo ndajya kubabwira ngo hazabaho guhererekanya kanaka na kanaka, ntabyo guhererekanya ndi buvuge hano."

"Ariko ndagira ngo mbabwire ko iyo Guverinoma ebyiri ziyemeje kuganira ikibazo zirakiganira."

Yavuze ko Guverinoma y’u Rwanda n’u Burundi zimaze iminsi zohererezanya intumwa ziva mu Burundi zijya mu Rwanda cyangwa ziva mu Rwanda zijya i Burundi.

Minisitiri w’Intebe, Dr Ngirente, yavuze ko umubano w’ibihugu byombi uri kubyuka ugana aheza.

Yakomeje ati "Ntabwo nabijya mu mizi bimwe haracyanozwa ibigomba gukorwa ariko ndagira ngo mbabwire ko umubano wacu n’u Burundi urimo kugenda ubyuka, umera neza, n’imipaka ikaba izafungurwa mu gihe cya vuba. Icyizere kirahari kandi ni icyemezo cyafashwe n’ibihugu byombi, cyo kugira ngo umubano ubyuke kandi ubyuke neza."

Muri Werurwe ni bwo Perezida Paul Kagame yoherereje mugenzi we w’u Burundi, Evariste Ndayishimiye, ubutumwa buganisha ku gusubiza ku murongo umubano w’ibihugu byombi.

Ni ubutumwa Perezida Ndayishimiye yashyikirijwe na Minisitiri w’Ingabo, Major General Albert Murasira, mu biro bye i Gitega.

Ni urugendo rwabaye nyuma y’uko muri Mutarama 2022, Perezida Kagame yakiriye Minisitiri Ezéchiel Nibigira, wamugejejeho ubutumwa bwa Perezida Ndayishimiye.

Icyo gihe Ibiro by’Umukuru w’Igihugu, Village Urugwiro, byatangaje ko "bagiranye ibiganiro byibanze ku gushimangira umubano hagati y’u Rwanda n’u Burundi."

Umubano w’u Rwanda n’u Burundi wajemo igitotsi guhera ubwo u Burundi bwashinjaga u Rwanda gushyigikira abagerageje guhirika ubutegetsi bwa Perezida Pierre Nkurunziza mu 2015.

U Burundi buvuga ko benshi muri bo bahise banahungira i Kigali, u Rwanda rugasabwa ko boherezwa ngo bakurikiranwe n’ubutabera.

Minisitiri w'Intebe, Dr Edouard Ngirente, yavuze ko u Rwanda n’u Burundi bigeze kure ibiganiro ku bibazo byakomeje kuba igitotsi mu mubano wabyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .