U Burundi mu mayira abiri: Ni nde ugiye kuyobora igihugu mu nzibacyuho?

Yanditswe na Philbert Girinema
Kuya 10 Kamena 2020 saa 06:36
Yasuwe :
0 0

Nyuma y’urupfu rutunguranye rwa Pierre Nkurunziza, amaso yerekejwe ku muntu uza kuyobora igihugu mu nzibacyuho aho ihurizo rikomeye riri mu ishyaka CNDD-FDD rigomba gushyigikira ko ibikubiye mu Itegeko Nshinga byubahirizwa hakirengagizwa ibice ryatangiye gucikamo aho harimo icy’abasirikare bakuru n’ikindi kirimo abanyapolitiki.

Magingo aya, agahinda ni kose mu Burundi ndetse hatangijwe icyunamo cy’iminsi irindwi yo gusabira Perezida Nkurunziza. Hari amakuru kandi avuga ko mu Mujyi wa Bujumbura no mu zindi nkengero zawo, abaturage batashye kare cyane bacyumva urupfu rwe bakava mu mihanda ndetse ko hari abafashwe na polisi bagafungwa bashinjwa kwishimira urupfu rw’uyu mukuru w’igihugu.

Ni ku nshuro ya Kabiri mu myaka ya vuba u Burundi bugiye kugira Perezida w’inzibacyuho. Uheruka yari Domitien Ndayizeye mu 2003 ari nawe Nkurunziza yakoreye mu ngata, ubu nawe agiye gusimburwa na Perezida w’inzibacyuho kuko uherutse gutorwa Gen Ndayishimiye Evariste agomba kuzatangira manda ye mu mezi abiri ari imbere.

Itegeko Nshinga ry’u Burundi mu ngingo yaryo ya 121 rigena ko mu gihe Umukuru w’igihugu apfuye cyangwa agize izindi mpamvu zituma adakomeza kuyobora igihugu, Perezida w’Inteko Ishinga Amategeko ahita afata ubutegetsi akayobora afatanyije na ba Visi Perezida.

Domitien Ndayizeye wasimbuwe na Nkurunziza yatangaje ko nta gihindutse Pascal Nyabenda agomba gufata ubutegetsi akaba ariwe ugomba gutegura ibijyanye no kurahira kwa Gen Ndayishimiye akazafata ubutegetsi muri Kanama.

Nyabenda ni umugabo bivugwa ko ariwe Nkurunziza yashakaga ko yamusimbura ariko biza gutuma ishyaka CNDD-FDD ricikamo ibice, kuko hari uruhande rw’abanyapolitiki rwari rushyigikiye uwo mugambi mu gihe urundi rwiganjemo abasirikare bo batabikozwaga ahubwo bashaka ko Gen Ndayishimiye agera ku butegetsi.

Mbere y’uko CNDD-FDD itoranya Gen Ndayishimiye ku bw’igitutu cy’abasirikare, Nyabenda niwe wahabwaga amahirwe yo kuyobora igihugu kuko yabaye mu myanya ikomeye irimo kuba Perezida wa CNDD-FDD, umwanya wa kabiri ukomeye mu ishyaka.

Ubwoba ni bwose mu gihugu kubera Coronavirus

Inkuru y’urupfu rwa Nkurunziza yateye icyoba mu baturage kuko kugeza ubu benshi ntibaremera ko yishwe n’umutima ahubwo bitsa ku kuvuga ko ari icyorezo cya Coronavirus, dore ko umugore we n’abarinzi be bari mu bitaro bya Aghan Khan muri Kenya nyuma yo gusanganwa iki cyorezo.

Hari andi makuru avuga kandi ko usibye Denise Bucumi, umugore wa Nkurunziza, hari n’abandi bantu bo mu muryango we [Nkurunziza] banduye iki cyorezo bari kwitabwaho barimo nyina na bashiki be babiri, biyongera ku bandi bantu ba hafi ba Nkurunziza.

Binavugwa kandi ko na Perezida uherutse gutorwa, Gen Evariste Ndayishimiye, nawe yaba yaranduye iki cyorezo, dore ko inshuro nyinshi yakundaga kuba ari kumwe na Perezida Nkurunziza.

Niba aribyo koko ko Nkurunziza yahitanwe na Coronavirus, ibi bisobanuye ko haramutse hakozwe igikorwa cyo kugenzura abantu bahuye, wasanga nibura abagize Guverinoma bose baba bafite uburwayi ku buryo byashyira kiriya gihugu mu kaga gakomeye.

Binavugwa kandi ko usibye abaminisitiri, hari n’abadepite bamaze kwandura iki cyorezo ariko Guverinoma ikaba nta makuru na make itanga ku burwayi bwabo. IGIHE yakiriye amakuru yemeza ko mu bitaro byo mu Mujyi wa Bujumbura harimo umubare munini w’abantu bapfa ariko “bikitirirwa” izindi ndwara nka malariya.

Uburwayi bw’umutima bwahitanye Nkurunziza buhuriye he na COVID-19?

Ubushakashatsi buherutse kugaragaza ko uburwayi bw’umutima bushobora gutuma umuntu atakaza abasirikare ku buryo yibasirwa byoroshye na Coronavirus ndetse ko bufite ubushobozi bwo kumuhitana ku kigero kiri ku nshuro enye ugereranyije n’undi utawurwaye.

Icyo gihe ibihaha by’umuntu bigira ikibazo cyo kutabona umwuka uhagije bigatuma umutima uhagarara cyangwa ugatera buhoro cyangwa cyane, uburwayi buzwi nka “arythmie”.

Ibi bijyana kandi n’uko umuriro umuntu urwaye COVID-19 agira, utuma umubiri ucika intege ku buryo utabasha gukwiza amaraso mu bice byose by’umubiri. Icyo gihe uwo murwayi agira ibibazo bikomeye, bikaba ngombwa ko yongererwa umwuka.

Hagati aho hari amakuru yemeza ko mu ijoro ryo kuwa Gatandatu rishyira ku Cyumweru tariki 7 Kamena icyuma cyongerera umwuka umubiri, kimwe gifasha abarwayi guhumeka [ventilator/ventilateur] - kimwe muri bicye cyane bibarizwa mu hose mu Burundi - cyakuwe shishi itabona muri bimwe mu bitaro bya Bujumbura na kajugujugu yakijyanye muri Hôpital du cinquantenaire Natwe Turashoboye bya Karuzi, ahaguye Perezida Pierre Nkurunziza.

Urupfu rwa Nkurunziza azize guhagarara k’umutima, rubaye rufitanye isano na Coronavirus, byashimangira uburyo Coronavirus mu Burundi itigeze ihabwa agaciro, kuko mu bikorwa by’amatora igihugu kimazemo iminsi, nta buryo bwari bwarashyizweho bwo kwirinda iki cyorezo mu gihe cyari cyaramaze kugera mu gihugu.

Imibare itangazwa na OMS igaragaza ko mu Burundi hari abantu 83 banduye Coronavirus barimo umwe witabye Imana na 45 bakize bagasezererwa mu bitaro. Ni mu gihe kuva iki cyorezo cyagaragara mu gihugu ku wa 31 Werurwe hamaze gufatwa ibipimo 382, bike cyane ugereranyije n’ibifatwa n’ibindi bihugu.

Mu gihe abantu bose ku Isi bashishikarizwa kwambara agapfukamunwa, mu Burundi si ko bimeze, twambarwa ku mavuriro amwe n’amwe, ibyo kwirinda kujya mu ruhame ntabwo abantu babikozwa dore ko na Nkurunziza yarembye avuye kureba umupira.

Ni ibimenyetso byose bikomeje gushyira ubwoba mu bantu, bibaza uko bazahangana n’iki cyorezo n’icyerekezo cya politiki y’igihugu.

Nkurunziza wapfuye afite imyaka 55, yari Perezida wa munani w’u Burundi aho yayoboye igihugu kuva mu 2005. Agisize ari kimwe mu bihugu bikennye muri Afurika.

Urupfu rutunguranye rwa Nkurunziza rukomeje gutuma abantu bibaza ibibazo byinshi ku miterere y'icyorezo cya Coronavirus mu Burundi
Pascal Nyabenda nta gihindutse niwe ugomba kuba Perezida w'inzibacyuho kugeza igihe Gen Ndayishimiye azarahirira
Uhereye ibumoso: Perezida w'Inteko Ishinga Amategeko y'u Burundi, Pascal Nyabenda; Minisitiri w'Umutekano, Gen. Alain-Guillaume Bunyoni na Visi Perezida wa Mbere w'u Burundi, Gaston Sindimwo; ni bamwe mu bakomeje gushyirwa mu majwi yo kuba bayobora u Burundi mu nzibacyuho ariko Itegeko Nshinga riha amahirwe Nyabenda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .