Trump yabaniye ate u Rwanda mu myaka ine ishize?

Yanditswe na Philbert Girinema
Kuya 2 Ugushyingo 2020 saa 07:24
Yasuwe :
0 0

Harabura amasaha make Amerika igatora Perezida ugomba kuyobora iki gihugu muri manda y’imyaka ine. Agomba kuva hagati ya Donald Trump, umukandida w’Aba-républicains na Joe Biden uhagarariye Ishyaka ry’Aba-Démocrates.

Amatora y’Umukuru w’Igihugu muri Amerika aba ahanzwe amaso n’Isi yose kuko uko byagenda kose umuntu utorwa ashobora guhindura politiki mpuzamahanga y’iki gihugu bikagira ingaruka imwe cyangwa indi ku bindi.

Amashyaka yombi ahanganira cyane uyu mwanya w’Umukuru w’Igihugu, ugiye kureba nta kintu kinini atandukaniyeho. Nk’Aba-Républicains aho Trump abarizwa kuva no mu myaka ya mbere, usanga bita cyane ku ishoramari n’ibindi bijyanye n’ubucuruzi ku buryo muri gahunda zabo aribyo bashyira imbere.

Ku rundi ruhande, Aba-démocrates nabo nubwo ibyo byombi babyitaho, usanga bitsa cyane ku ngingo z’uburenganzira bwa muntu ariyo mpamvu nko kuri manda ya Obama cyangwa se Bill Clinton bombi bari barajegeje Isi mu bijyanye n’uburenzira bwa muntu.

Kimwe n’ibindi bihugu, u Rwanda ruri mu byo Umukuru w’Igihugu utorewe kuyobora Amerika ashobora gufata ibyemezo bikarugeraho.

Mbere y’uko tureba uko Trump yabaniye u Rwanda muri manda ye ari gusoza, ni ngombwa no kwitsa ku mibanire y’amashyaka abiri akomeye muri Amerika ku Rwanda.

U Rwanda ntirwahiriwe ku ngoma z’Aba-Démocrates mu myaka 26 ishize

Uhereye nko mu 1994, Amerika imaze kuyoborwa n’abaperezida bane, mu mashyaka abiri akomeye buri rimwe rifitemo babiri. Nk’Aba-Démocrates bafitemo Bill Clinton na Barack Obama mu gihe Aba-Républicains bafitemo George W. Bush na Donald Trump.

Muri iyi myaka 26 ishize, u Rwanda rwahuye n’ibibazo mu gihe cyose Amerika yari iyobowe n’Aba- Démocrates kurusha uko byagenze ku ngomba y’Aba- Républicains. Urugero, ni uko mu 1994 ubwo Jenoside yakorewe Abatutsi yabaga, Amerika yari iyobowe n’Umu-Démocrate, Bill Clinton.

Uyu mugabo yanze gukoresha ijambo Jenoside ngo yamagane ubwicanyi bwakorerwaga Abatutsi icyo gihe. Nyuma yaje kwatura, yicuza ko ntacyo yakoze aho ubwe yavuze ko iyo icyo gihe Amerika yohereza ingabo mu Rwanda, abarenga “300.000” muri miliyoni irenga bishwe bari kubasha kurokorwa.

Uyu munsi Clinton akunze kugaragaza ko yashegeshwe n’uburyo Leta yari ayoboye yitwaye ku byaberaga mu Rwanda mu 1994. Yigeze kuvuga ati “Iyo tuba twaragiye mu Rwanda hakiri kare, nizera ko twari kubasha kurokora nibura kimwe cya gatatu cy’abishwe […] byangizeho ingaruka zikomeye.”

Ku ngoma ye kandi nibwo habaye intambara za Congo, icyo gihe kandi nabwo leta ye yokeje umuriro ku Rwanda irushinja kuvogera ubusugire bwa RDC n’ibindi birego nk’ibyo. Gusa avuye ku butegetsi agasimburwa n’Umu-Républicain, ibintu byashushe n’ibihinduka gato ubwo Amerika yayoborwaga na George W. Bush.

Bush muri Gashyantare 2008 yasuye u Rwanda, mu muhango yanatashyemo Ambasade ya Leta Zunze Ubumwe za Amerika i Kigali ku Kacyiru. Icyo gihe yanasuye urwibutso rwa Jenoside rwa Kigali, agaragaza icyizere gikomeye afitiye ubuyobozi bw’u Rwanda.

Icyo gihe yagize ati “Kuko nshima gukorana n’ubuyobozi bwita ku baturage, ngakunda umurava n’ubwitange, kandi nizera nta gushidikanya ko ibyo ari bimwe mu bikuranga Nyakubahwa Perezida [Kagame], uri perezida wita ku baturage bawe n’ishema ryabo mu buryo budasanzwe.”

Uyu mugabo nyuma ya manda ze ebyiri, yasimbuwe mu 2009 na Barack Obama. Abanyafurika benshi bamwakiriza yombi, bishimira ko iki gihugu cy’igihangange kigiye kuyoborwa n’umwirabura, bavuga bati natwe tweretse Isi ko tutari ibivume, ko dushobora no kuyobora igihugu cya mbere gikomeye ku Isi.

Ku ngoma ya Obama nibwo u Rwanda rwahagarikiwe inkunga rushinjwa gushyigikira umutwe wa M23, ni nabwo rwokejwe igitutu ku kigero cyo hejuru ku bijyanye n’uburenganzira bwa muntu muri raporo zasohokaga umusubirizo zirimo nka Mapping Report ivuga ku bwicanyi bwabereye muri RDC n’izindi.

Amakuru yizewe IGIHE ifite ni uko muri manda ye ubwo u Rwanda rwari mu Kanama ka Loni gashinzwe Amahoro, Amerika aricyo gihugu cyari inyuma yo kurwanya inyito yemewe ya Jenoside yakorewe Abatutsi nubwo benshi bakeka ko ari u Bufaransa bwari bubiri inyuma.

Amerika yarwanyije bikomeye iyi nyito igashaka ko Jenoside yakorewe Abatutsi yitwa Jenoside yo mu Rwanda n’ibindi nk’ibyo.

Avuye ku butegetsi, Obama yasimbuwe n’Umu-Républicain, Donald Trump, mu myaka ine ishize utarigeze yita cyane kuri Afurika, ahubwo amaso ye yayerekeje ku bihugu byo mu Burengerazuba bwo hagati no gutsura umubano n’ibihugu by’Abayisilamu.

Ubwo George W Bush yasuraga u Rwanda agafungura na Ambasade ya Amerika mu Rwanda

Trump ntiyitaye ku Rwanda na Afurika

Kuva ubwo Trump yiyamamazaga, yashyize imbere Amerika muri gahunda ye yise “MAGA” [Make America Great Again].

Umubano yubatse n’amahanga wabaga ari ugamije ahanini gushyigikira inyungu za Amerika, ni ukuvuga nko kubona Amerika ibanye neza n’ibihugu by’Abarabu, ari nayo mpamvu uyu munsi yishimira cyane kuba Israel yarasinyanye amasezerano y’amahoro na Leta Zunze Ubumwe z’Abarabu na Bahrain.

Urugero rwa hafi rugaragaza uburyo Trump afata Afurika, ni amagambo yigeze kuvuga mu 2018 ko ibihugu by’uyu mugabane ari umwanda (Shithole Countries).

Icyo gihe uwari Minisitiri w’Ububanyi n’Amahanga w’u Rwanda, Louise Mushikiwabo, yarayamaganye, aho yagize ati “Amagambo yavuze arababaje cyane kandi ntabwo byari bikwiye ko ava ku muyobozi nkawe. Biragaragaza isura Afurika ihabwa ku Isi, ariko natwe bidusigiye isomo ry’uko tugomba kutabiha amatwi ahubwo tugakora ibiduhesha ishema, bikagaragaza n’isura nyayo ya Afurika.’’

Ikindi gihamya cy’uko Trump afata Afurika, ni amagambo aherutse kuvuga mu minsi mike ishize ku kibazo cya Misiri na Ethiopia cyatewe n’urugomero rwa Grand Renaissance. Icyo gihe yavuze ko kuba Ethiopia yaratangiye kuzuza amazi muri uru rugomero ruzaba ari urwa mbere muri Afurika, ari amahitamo mabi kuko Misiri ishobora kutabyishimira ikarushwanyuza.

Ni imvugo igaragaza ko we icyo ashyize imbere ari umubano mwiza n’ibihugu by’Abarabu kurusha ibyo muri Afurika yo Munsi y’Ubutayu bwa Afurika.

Mu gihe abandi bakuru b’ibihugu bikomeye birimo nk’u Bushinwa n’u Buyapani bashyira imbaraga mu kwakira bagenzi babo no gutsura umubano na bo ugamije kwiteza imbere, Perezida Trump ntiyakunze kwakira abakuru b’ibihugu byo muri Afurika. Ku Rwanda by’umwihariko, Trump yahuye na Perezida Paul Kagame inshuro nke.

Bill Clinton niwe wari uyoboye Amerika ubwo u Rwanda rwari mu bihe by'icuraburindi rya Jenoside yakorewe Abatutsi

Ku ngoma ya Trump, u Rwanda rwakuwe mu masezerano ya AGOA

Nyuma y’umwanzuro u Rwanda rwafashe wo kuzamura imisoro ku myenda n’inkweto byambawe bizwi nka caguwa, ntirunagaragaze ubushake bwo kwisubiraho kuko rwahisemo guteza imbere inganda zarwo, Amerika yafashe umwanzuro wo kurukura mu bihugu bishobora koherezayo ibicuruzwa bidaciwe imisoro, AGOA.

AGOA igenewe ibihugu bitandukanye byo muri Afurika yo Munsi y’Ubutayu bwa Sahara, aho bifashwa kohereza muri Amerika ibicuruzwa bikorerwa muri ibyo bihugu nta musoro, bikaba mu bwoko busaga 6000 burimo nk’imyenda, ikawa, ibiribwa n’ibindi bikomoka ku buhinzi.

Amerika yatangiye kureba nabi u Rwanda n’ibindi bihugu byo mu Muryango wa Afurika y’Iburasirazuba nyuma y’aho bifatiye umwanzuro wo kuzamura umusoro ku myenda n’inkweto bya caguwa bitumizwa hanze, hagamijwe guteza imbere inganda zibikora mu karere.

Kenya, Tanzania na Uganda byaje kwisubiraho, ariko u Rwanda rushikama kuri iki cyemezo ndetse ku wa 1 Nyakanga 2016, ruzamura umusoro uva ku madorali 0.2 ku kilo cy’imyenda yambawe ugera kuri 2.5$ naho ku nkweto zambawe iva kuri 0.2$ ugera kuri 5$ ku kilo.

Mu itangazo yashyize ahagaragara ku wa 30 Nyakanga 2018, Umuyobozi wungirije w’Ibiro by’Amerika bishinzwe Ubucuruzi, C.J. Mahoney, yibukije ko mu myaka ibiri yari ishize, uburyo bwose USA yakoresheje mu kuganira n’u Rwanda kuri iki kibazo nta cyagezweho.

Impuguke muri Politiki akaba n’Umwarimu muri Kaminuza y’u Rwanda, Dr Ismael Buchanan, yabwiye IGIHE ko kuva kw’ibihugu muri aya masezerano no gushyirirwaho ibihano na Trump, byatumye ibihugu bya Afurika byishakamo ibisubizo.

Ati “Abantu bari bazi ko mu guca Caguwa, Afurika igwa hasi, ariko byagiye bigaragara ko hari aho ibihugu nk’u Rwanda byahise byiga ubwenge bwo kubaho. Nta wari uzi ko guca caguwa mu Rwanda ubuzima butahagarara, ariko bwarakomeje. Njye numva ko gukanga kwa Trump kwigishije ibihugu bya Afurika kumenya ubwenge hakiri kare.”

Nta kibazo cyihariye u Rwanda rwatewe n’ingoma ya Trump

Dr Ismael Buchanan asanga nubwo hari inkunga zagabanyijwe mu bikorwa bimwe na bimwe Amerika yashyigikiraga mu Rwanda, nta kindi kibazo u Rwanda rwahuye nacyo kuri manda ya Trump.

Ati “Njye numva kuri manda ya Trump ku Rwanda nta kibazo gihari, keretse wenda urebye mu ruhando rw’Isi uko babona Trump, ariko numva ko ku ruhare rw’u Rwanda nta kibazo cyabaye, ubucuti bwagumye uko bwari bumeze. No muri iki gihe cya COVID-19 nizera ko Abanyamerika hari kinini bafashije u Rwanda.”

Buchanan yavuze ko hari ibihugu bimwe na bimwe bya Afurika bitabaniwe neza na Trump biturutse ku kibazo cy’abimukira, gusa ngo nabyo si politiki mbi, ahubwo imiterere ye yatumye abayobozi ba Afurika bakanguka.

Ati “Hari uburyo yakanze Abanyafurika babona ko ishyamba atari ryeru ku ngoma ye, ariko byahinduye uburyo bwo kubaho bakishakamo ibisubizo. Ku ngoma ya Trump, byagaragaye ko udashobora kumenya politiki afite iyo ariyo, irahinduka, si ya politiki y’Abanyamerika yari isanzwe. Ibi byose hari icyo byafashije Abanyafurika mu kwishakamo ibisubizo, ni intambwe Afurika yateye.”

Umusesenguzi, Gatete Ruhumuriza, we yavuze ko politiki ya Trump ari nziza nubwo imico ye atari myiza.

Ati “Abantu bajye batandukanya imico y’umuntu na politiki ye n’icyo iyo politiki imariye Afurika. Ku giti cye, ntabwo ari umuntu mwiza, ariko politiki ye n’iy’Aba-Républicains muri rusange yatumye Afurika igira umutuzo, itegura gahunda zayo mu mutuzo, igatera imbere.”

Mu bihe bitandukanye, Leta Zunze Ubumwe za Amerika zahaye u Rwanda inkunga igamije guteza imbere urwego rw’ubuzima.

Nko mu 2016, Amerika yahaye u Rwanda inkunga ingana na miliyoni 268 z’amadolari. Muri yo, harimo miliyoni 56 z’amadolari zakoreshejwe mu bikorwa byo kurwanya SIDA, miliyoni 41 z’amadolari zari zigenewe ibikorwa by’ubutabazi na miliyoni 38 z’amadolari zashyizwe mu bikorwa byo kurwanya amakimbirane, guharanira amahoro n’umutekano.

Hari na miliyoni 34 z’amadolari yari agenewe ibikorwa by’uburezi bw’ibanze na miliyoni 23 z’amadolari zari zigenewe ibikorwa by’ubuvuzi bw’ibanze.

Kuva mu 2017 kandi binyuze muri USAID, Amerika yatanze mu Rwanda miliyoni 105 z’amadolari , mu 2018 ayo mafaranga ariyongera agera kuri miliyoni 147 z’amadolari naho mu 2019 aba miliyoni z’amadolari 135. Kugeza ubu, iki gihugu kimaze gutera inkunga u Rwanda ingana na miliyoni 105 z’amadolari.

Amafaranga menshi Amerika yahaye u Rwanda yari agenewe kwifashisha mu bikorwa by’ubuzima aho byihariye miliyoni 64 z’amadolari mu gihe uburezi bufite miliyoni 13 z’amadolari.

Kugeza ubu, Biden niwe uhabwa amahirwe menshi yo kuba yakwegukana amatora y’Umukuru w’Igihugu atsinze Trump, gusa ibintu byose birashoboka kuko hashobora kubaho ugutungurana.

Kimwe mu byitezwe ni ukureba uko Biden yazabanira Afurika mu gihe yaba agiye ku butegetsi, agahindura politiki y’aba-Démocrate kuri uyu mugabane.

Trump ntiyitaye kuri Afurika mu myaka ine ishize
Abanyafurika benshi banenga Obama ku buryo yabaniye uyu mugabane, nyuma y'intambara zikomeye zirimo n'iyo Libya
Joe Biden niwe uhabwa amahirwe menshi yo gutsinda amatora ateganyijwe kuri uyu wa Kabiri tariki ya 03 Ugushyingo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .