00:00:00 IGIHE NETWORK KN KINYARWANDA EN ENGLISH FR FRANCAIS

RDC yamaganye abakomeje gukabiriza ikibazo cyabaye hagati y’ingabo zayo n’iz’u Rwanda

Yanditswe na IGIHE
Kuya 21 Ukwakira 2021 saa 06:15
Yasuwe :
0 0

Guverinoma ya Repubulika Iharanira Demokarasi ya Congo yasabye abakomeje gukabiriza ikibazo cyabaye hagati y’ingabo zayo n’iz’u Rwanda kubihagarika, kuko ibyabaye ari ibintu bisanzwe hagati y’ibihugu bituranyi.

Tariki 18 Ukwakira 2021, inzego z’umutekano z’u Rwanda zakurikiranye abatwara magendu bari bambutse umupaka ugabanya u Rwanda na Repubulika Iharanira Demokarasi ya Congo mu Kagari ka Hehu, Umurenge wa Bugeshi mu karere ka Rubavu.

Itangazo ryashyizwe hanze n’ingabo z’u Rwanda, rivuga ko “Inzego z’umutekano z’u Rwanda zibeshye zikambuka metero nke zigana muri Repubulika Iharanira Demokarasi ya Congo zikurikiye abatwaye magendu bari bahetse imitwaro itaramenyekanye bishoboka ko bari bitwaje intwaro.”

Ingaboza Congo zafashe umusirikare w’u Rwanda wari wibeshye akambuka umupaka, icyakora mu binyamakuru bya Congo na mpuzamahanga hakwirakwiriye amakuru y’uko habayeho kurasana anyomozwa n’inzego zibishinzwe ku mpande zombi.

Mu kiganiro n’abanyamakuru kuri uyu wa Gatatu, Umuvugizi wa Guverinoma ya Congo, Patrick Muyaya, yavuze ko ibyabaye ari ibintu bisanzwe.

Yagize ati “Twarabyamaganye ariko umuntu anareba uko ibintu byagenze. Ibi ni ibintu bibaho, bishobora kubaho. Ntabwo ari ibintu bikanganye binagendanye n’umubano dufitanye n’ibihugu duhana imbibi.”

Muyaya yatanze ingero ku bindi bihugu nk’u Buhinde n’ibindi, bijya bihura n’ikibazo nk’icyo ku mipaka yabyo, avuga ko nta mpamvu yo gukuririza ibyabaye.

Ati “Ntabwo bivuze ko dufite igisirikare kidashoboye. Ukurikiranye ibibera mu bindi bihugu nk’u Buhinde n’ahandi ku Isi, ku bice bikora ku mipaka ho habera rimwe na rimwe ibintu bikomeye. Rero, nta mpamvu yo kubigereranya ni ikintu cyoroshye.”

RDF yijeje ko isanganywe umubano mwiza n’igisirikare cya RDC (FARDC) kandi bakomeje gufatanya ku bibazo bijyanye n’umutekano w’ibihugu byombi.

Inkuru bijyanye: RDF yasobanuye iby’umusirikare w’u Rwanda wibeshye akinjira ku butaka bwa Congo

Patrick Muyaya yavuze ko ibyabaye hagati y'ingabo z'ibihugu byombi ari ibintu bisanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .