RDC: Gushwana kwa Tshisekedi na Kabila kwageze no mu rugaga rw’abikorera

Yanditswe na Bukuru JC
Kuya 24 Ukuboza 2020 saa 08:38
Yasuwe :
0 0

Umwuka ukomeje kuba mubi hagati y’uruhande rwa Perezida wa Repubulika Iharanira Demokarasi ya Congo, Félix Tshisekedi n’uruhande rwa Joseph Kabila yasimbuye ku butegetsi.

Kuri ubu, umwuka mubi wageze mu rugaga rwa sosiyete z’ubucuruzi muri icyo gihugu ruzwi nka FEC (Fédération des Entreprises du Congo) biturutse ku matora ya Perezida warwo yabaye mu Ugushyingo agateshwa agaciro.

FEC yari imaze imyaka 15 iyobowe na Albert Yuma nka Perezida w’Inama y’Ubutegetsi, akaba inshuti y’akadasohoka ya Perezida Joseph Kabila.

Tariki 26 Ugushyingo Yuma yatorewe kongera kuyobora urwo rugaga ariko Dieudonné Kasembo Nyembo bahanganye ajuririra inama ishinzwe iyubahirizwa ry’amategeko muri Leta, itesha agaciro ibyayavuyemo.

Dieudonné Kasembo Nyembo asanzwe ari Umuyobozi w’Ikigo gikomeye cyinjiza ibicuruzwa muri Congo, Gecotrans. Bivugwa ko ari umuntu wa hafi w’ubutegetsi bwa Tshisekedi.

Amatora ya kabiri yateguwe kuri uyu wa Gatatu tariki 23 Ukuboza 2020 aho Kasembo Nyembo ari we mukandida rukumbi wari wiyamamaje.

Ni mu gihe Yuma n’Inama y’Ubutegetsi ya FEC bayamaganye bavuga ko atanyuze mu mucyo kubera ko urwo rugaga rutagengwa n’amategeko ya Leta, bityo ko atari Leta yagombaga gutesha agaciro amatora yabo.

Nubwo byabanje guteza induru, byarangiye kuri uyu wa Gatatu Nyembo atowe n’abantu 14, mu bantu 130 bagombaga gutora. Abo mu ruhande rwe batangaje ko bitari gukunda ko abanyamuryango bose bagomba gutora baboneka i Kinshasa muri ibi bihe byo kwirinda Coronavirus.

Kwigizayo Yuma wahoze ari inshuti ya Kabila, abasesenguzi babibona nk’umugambi ukomeje wa Perezida Tshisekedi wo kwikiza abahoze bakomeye mu butegetsi bwa Kabila kugira ngo asigarane ijambo ku bikorwa byose bikomeye mu gihugu.
Mu minsi ishize, Tshisekedi yatangiye kuganira n’amashyaka akomeye kandi afite Abadepite mu Nteko Ishinga Amategeko, nyuma yo gusesa umubano impuzamashyaka ye Cash yari ifitanye na FCC ya Joseph Kabila.

Uruhande rwa Tshisekedi ruvuga ko kubera ubwiganze n’abantu bagikomeye muri Leta bashyigikiye Kabila, byatumaga imyanzuro akeneye ko ifatwa ngo ashyire mu bikorwa ibyo yemereye abaturage bidakorwa.

Biro y’Inteko Ishinga Amategeko yari igizwe n’abantu bo mu ishyaka rya Kabila iherutse kweguzwa.

Hashize igihe umwuka utameze neza hagati ya Kabila na Tshisekedi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .