Perezida Ndayishimiye yashinje u Rwanda gufata impunzi z’Abarundi nk’imbohe, abusanya n’ibimenyetso

Yanditswe na Rabbi Malo Umucunguzi
Kuya 7 Kanama 2020 saa 02:33
Yasuwe :
0 0

Perezida w’u Burundi, Evariste Ndayishimiye, akomeje umurongo we wo gushotora u Rwanda, aho kuri iyi nshuro yarushinje gufata impunzi z’Abarundi zicumbikiwe mu nkambi ya Mahama nk’imbohe zikingiye ikibaba abagize uruhare mu byaha mu Burundi, bagahungira mu Rwanda.

Ni mu ijambo yavugiye i Busoni mu Ntara ya Kirundo kuri uyu wa Kane, aho Ibiro by’Umukuru w’Igihugu mbere yo gushyira kuri Twitter agace k’amashusho ashinja igihugu atavuze izina, byashyizeho amagambo ko yagarukaga ku ibaruwa y’impunzi zo mu nkambi ya Mahama mu Rwanda, zamusabye ubufasha ngo zitahe.

Kuva mu mpera za Werurwe 2015, impunzi z’Abarundi zatangiye kwinjira mu Rwanda, ruzishyiriraho inkambi z’agateganyo i Gashora n’i Nyanza mbere yo kwimurirwa i Mahama mu Karere ka Kirehe, izindi ziguma mu Mijyi ya Kigali na Huye.

Ntawe uhunga amahoro! Ibyo byose byatewe n’imvururu zijyanye n’amatora yagombaga kwitabirwa na Pierre Nkurunziza, nyamara yarashinjwaga ko manda ebyiri yemererwaga zarangiye, ariko ariyamamaza ndetse atsinda amatora.

Byateje imvururu zikomeye, Gen Godefroid Niyombare agerageza guhirika Nkurunziza muri kudeta (coup d’état) irapfuba, abaturage benshi baricwa, abandi bafata iy’ubuhungiro.

Imibare y’Ishami ry’Umuryango w’Abibumbye ryita ku Mpunzi (UNHCR) yo ku wa 31 Gicurasi 2020, igaragaza ko kugeza ubu mu Rwanda hakiri impunzi 72.007 (hagomba kuvamo babiri bapfuye mu minsi ishize), muri Tanzania hari 164.873, muri RDC ni 48.582 na 48.275 muri Uganda.

U Rwanda rwafashe neza impunzi z’Abarundi

U Rwanda rwakiriye neza impunzi ruzemerera kwiga kugeza ku mashuri 12, mu nkambi ya Mahama zihabwa ishuri, ivuriro, buri muryango uhabwa inzu isakaje amabati, ndetse n’umusore ugeze igihe cyo gushinga urugo asaba inzu akayihabwa.

Zihabwa amafaranga yo kugura ibizitunga, ababonye amahirwe yo kujya nko kwiga kaminuza cyangwa amashuri yisumbuye bakabona ababishyurira ndetse kandi bose leta ibishyurira ubwisungane mu kwivuza.

Bijyanye n’ikibazo cy’ibicanwa mu Ntara y’Iburasirazuba, i Mahama bahawe gaz batekesha, ndetse mu nkambi hari uburyo bwo kuyongera mu macupa.

Nta heza nko mu rugo...

Nubwo wakwitabwaho ute ariko, nta heza haruta iwanyu. Mu gihe ibintu bisa n’ibirimo kujya mu buryo, Perezida Ndayishimiye yasabye abaturage gukangurira bene wabo gutahuka, ati ‘ntidushaka ko abana b’Abarundi bicwa n’inzara, bakarara rubunda, barara baganya kandi bene wabo hano mu gihugu bamerewe neza.’

Gusa mu buryo butunguranye, yavuze ko icyo gihugu atavugaga amazina cyabujije izi mpunzi gutahuka, kikazifata bugwate.

Yakomeje ati “Ni nayo mpamvu dusaba bose gutaha, niba ibyo bihugu bahungiyemo bibafashe nk’ingwate - kuko turabibona ko byabafashe nk’ingwate, kuko nta muntu ushaka gutaha mu gihugu cye ngo hagire igihugu kimwangira gutaha - ni ukuvuga ko babafashe nk’ingwate, babafata nk’imbohe. Turasabye rero ko icyo gihugu cyabarekura bakitahira mu gihugu cyabo cy’amavuko.”

Yavuze ko azi neza ko izo mpunzi zikurikirana amakuru y’i Burundi, bityo niba barabangiye gutaha kandi babishaka, “nibave hasi bitahire twebwe twiteguye kubakira, hanyuma tuzarebe ubatangirira ku mupaka ababuza kwitahira iwabo”.

Ndayishimiye yagarutse ku birego Pierre Nkurunziza wamubanjirije yakunze gushinja u Rwanda ko rucumbikiye abagerageje guhirika ubutegetsi bwe mu 2015.

Ati “Mbega ko tuzi impamvu ziriya mpunzi bazifashe nk’ingwate! Erega bazifashe nk’ingwate kugira ngo zikingire abakoze amarorerwa mu gihugu cyacu. Turabizi. None abo bakoze amarorerwa, barimo kungura iki ibyo bihugu bibacumbikiye?”

Yavuze ko umuturanyi mwiza akwiye kuba akoherereza uwakoze ikibi iwawe kugira ngo ahanwe, aho kumukingira ikibaba.

Yakomeje ati “None aho kubohereza ngo bahanwe, wowe uravuga uti ‘ahubwo n’abarundi mwese nimuze mubakingire kugira ngo ntibaboneke’. Kuko rero bashaka ubukunzi ku Burundi, nibabanze abo bakoze amarorerwa babaduhe, tubacire urubanza, hanyuma abagizweho ingaruka n’ibibi bakoze nabo batekane mu mutima.”

Yavuze ko batifuza ubucuti n’igihugu cy’abaturage kibazanaho uburyarya, gishaka kugaragaza ko kiri kumwe nabo.

U Rwanda ntirwigeze rubuza Abarundi gutaha

Ubwo byamaraga gutangazwa ko Abarundi bandikiye perezida wabo bamusaba kubafasha gutaha, Emmanuel Bizimana umaze imyaka itanu mu nkambi ya Mahama, yabwiye itangazamakuru ko babuzwaga gutaha banyuze mu nzira zitemewe, ati “twe rero twaranditse kugira ngo duce mu nzira zemewe n’amategeko."

Yavuze ko hari abantu babashishikariza kuba baretse gutaha, ariko ni abantu bari mu mahanga ya kure, bishoboka ko ari abanyapolitiki b’Abarundi bafite inyungu mu bibazo by’impunzi.

Ati "Bamwe muri abo rero barashaka kudufata nk’inyungu zabo, ni bo bavuga ngo ntiharagera ko mutaha kuko ibyo mwahunze bitararangira. Hari abantu bari [hano] mu nkambi bavugana n’abanyapolitiki bari za Burayi n’ahandi, babakoresha kubera inyungu zabo".

Mu itangazo Minisiteri Ishinzwe Ibikorwa by’Ubutabazi yasohoye ku wa 3 Kanama, yashimangiye ko gutahuka ku bushake kw’impunzi ari cyo gisubizo kirambye, bijyanye n’amategeko mpuzamahanga n’ayo u Rwanda rugenderaho.

Yakomeje iti "U Rwanda rurashimangira ubushake rufite mu kurengera impunzi ziri ku butaka bwarwo, kandi rwiteguye gufasha ababihisemo, gutaha mu buryo butekanye kandi bubahesha agaciro, ku bufatanye na UNHCR na za guverinoma bireba."

Ibyo binahura n’ibyemezwa n’Ishami ry’Umuryango w’Abibumbye ryita ku mpunzi, UNHCR, rivuga ko nta gihe impunzi z’Abarundi ziri mu Rwanda zitatashye, uretse muri ibi bihe imipaka yafunzwe kubera icyorezo cya Coronavirus.

Umuvugizi wa UNHCR mu Rwanda, Elise Laura Villechalane, yabwiye IGIHE ko guhera mu mwaka ushize izi mpunzi zatangiye gutahuka, nibura mu kwezi hagataha abagera kuri 200.

Gusa ngo ubwo hakorwaga ikusanyabitekerezo harebwa icyemezo cyafatwa mu buryo rusange, benshi bahurije ku kuba bategereza amatora ya perezida yabaye muri Gicurasi bakareba ibivamo, bakabona kwemeza niba basubira iwabo cyangwa niba baba baretse.

Yakomeje ati “Bijyanye rero no kuba aba baregereye Perezida mushya w’u Burundi ngo bamusabe ubufasha, ubwo bufasha dutekereza ko ari ubwabageza iwabo. Muri iyo gahunda rero UNCHR irimo gusaba ko habaho inama yahuza impande eshatu, harimo guverinoma z’ibihugu byombi, kugira ngo ziganire uburyo gucyura impunzi byakorwamo.”

“Kubera ko mu bikenerwa ntabwo ari uburyo bw’urugendo gusa ngo basubire iwabo, hakenerwa n’uburyo bwo kubasubiza mu muryango kuko abantu baba bamaze imyaka itanu batari mu gihugu cyabo, iyo basubiyeyo baba bakeneye inkunga kugira ngo bongere kwisuganya.”

Yavuze ko UNHCR irimo gukora ubuvugizi ngo ibyo biganiro bibeho mu gihe cya vuba, cyane ko no muri ibi bihe bya COVID-19, uburyo bw’ingendo bugomba kuba bwizweho neza, abantu bagapimwa ku mupaka kugira byizerwe ko badafite uburwayi.

Elise Laura Villechalane yamaganye ibivugwa ko u Rwanda rwafashe izo mpunzi bugwate, ati “Navuze ko mu mwaka ushize abantu bagera kuri 200 batahaga buri kwezi, icyo ni ikimenyetso, abantu bahoraga bagenda.”

Icyo impunzi zasabye ubu ngo ni ukuba abantu batakomeza kugenda mu matsinda mato uko babishaka, ahubwo bikaba mu buryo bwateguwe neza bagasubizwa iwabo.

Mu mvugo ze kandi, Perezida Ndayishimiye yanavuze ko bo u Burundi budashobora gutera inkunga abashaka kugirira nabi abandi, nyamara ibimenyetso bigaragaza ko byabaye inshuro nyinshi.

Ati “Ibihugu bimwe birabizi, Abarundi ni igihugu cya mbere kirimo abantu bafite urukundo n’umubano mwiza, n’ikimenyimenyi ntiturigera twumva ngo u Burundi bwagiye gushotora ikindi gihugu cyangwa ngo bufate mu mugongo urimo kugirira nabi ikindi gihugu.”

“Icyo kirerekana umutima Abarundi dufite, w’urukundo, twebwe iminsi yose twishakira umubano mwiza n’ibindi bihugu, ntidushaka gukorana n’indyarya zitubeshya ngo turimo turakundana, zashyize ihwa mu kirenge ngo ritujombe.”

Nyamara ku wa 27 Kamena 2020 nibwo abantu bagera mu 100, bitwaje imbunda zirimo mashinigani (machine guns) n’izirasa za rockettes, binjiriye mu Karere ka Nyaruguru bafite umugambi wo kugirira nabi abatuye mu Mudugudu w’icyitegererezo wa Yanza, mu kilometero kimwe gusa uvuye ku mupaka w’u Burundi.

Basize inyuma abarwanyi babo bane bapfuye, ibikoresho bya gisirikare birimo imbunda na radiyo za gisirikari n’ibikombe by’ibiribwa by’ingabo z’u Burundi, byanditseho "Force de Defense Nationale du Burundi". Batatu bafashwe mpiri.

Minisiteri y’Ububanyi n’Amahanga y’u Rwanda yandikiye iy’u Burundi "isaba ibisobanuro, ku gitero cyagabwe n’abantu bataramenyekana baturutse mu Burundi, inasaba Guverinoma y’u Burundi gufata ingamba zose zishoboka kugira ngo abagize uruhare muri ibyo byaha bahungiye mu Burundi, bafatwe mu maguru mashya bagezwe imbere y’ubutabera, cyangwa boherezwe mu Rwanda kugira ngo babazwe ibyo bakoze”. Ntacyo u Burundi bwigeze busubiza.

Uretse ibyo, hari ibindi bitero byishe abaturage ndetse bitwika imodoka, binasahura abaturage, birimo ibyagabwe n’umutwe witwara gisirikare wa FLN, wari ufite Nsabimana Callixte “Sankara” nk’umuvugizi. Byemejwe ko babaga baturutse mu Burundi.

Ni mu gihe n’ubuhamya bwakomeje gutangwa n’abafatiwe muri iyo mitwe, buvuga ko Uganda yakomeje kuba nk’icyicaro cyinjirizwamo abashaka kujya muri iyo mitwe igamije gutera u Rwanda, mu gihe u Burundi bwabaye irembo ribageza mu mashyamba ya Congo, n’ahantu ho kunogereza imigambi cyangwa kwinyagamburira igihe mu mashyamba byanze, icyo bite "withdraw route" mu Cyongereza.

Perezida Ndayishimiye kuri uyu wa Kane yari mu Kirundo
Abaturage bari bateze amatwi ubutumwa bwa Perezida wabo, bugaruka ku mibanire n'abaturanyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .