Kuri uyu wa 12 Kanama 2024, Ndayishimiye ubwo yaganiraga n’abanyamakuru ku rugendo amaze iminsi agirira hirya no hino mu gihugu, yavuze ko bidakwiye kugereranya ifaranga ry’u Burundi n’andi mpuzamahanga, kuko mu gihugu cyabo ho ryihagije.

Ati “Kugira ngo uhe agaciro ifaranga ryawe, usarura byinshi hanyuma ugashora hanze. Ifaranga ripimwa ku munzani w’ibisarurwa. Ntimuvuge ngo ifaranga ry’u Burundi ryataye agaciro. Nta gaciro ryataye. Mugende mubaze mu karere aho ubuzima bworoshye, ni hano mu Burundi. Ufite ibihumbi 20 mu Burundi urya neza.”

Yakomeje agira ati “Ifaranga ryacu rifite agaciro mu Burundi. None wagira ngo rigire agaciro mu Bufaransa? Aho nabonye avoka mu Burundi igurwa 200, muri Amerika ikagurwa amadolari atanu, bisobanura ko amadolari atanu angana n’Amarundi 200.”

Perezida Ndayishimiye yavuze ko ubuzima bwo mu Burundi bworoshye, kuko umuntu ufite amadolari atanu, ashobora kurya agahaga ariko ngo uyafite muri Amerika ntashobora guhaga.

Uyu Mukuru w’Igihugu yagaragaje ko Abarundi bagereranya ifaranga ry’u Burundi n’andi yo mu bihugu bikomeye, bafite ikibazo cy’imyumvire.

Yagize ati “Mufite ingorane kuko abo hanze bababeshye. Muza gupima ku munzani irirundi n’idolari. Mwebwe iyo mupima ayo mafaranga, muba mwatakaye. Pima umusaruro ufite, umutungo ufite n’amafaranga ufite mu gihugu. Ntihazagire uwongera gutuka ifaranga ryacu ngo ntirigira agaciro. Ibihumbi 5000 by’Amarundi ubiririye mu Burundi bihangana n’amadolari 50 uyaririye muri Amerika.”

Igipimo cy’ivunja ry’amafaranga kigaragaza idolari rya Amerika kugeza kuri uyu wa 13 Kanama 2024, rifite agaciro kangana n’ak’amafaranga y’u Burundi 2881,8.

Yahakanye ibura rya peteroli mu Burundi

Kuri uyu wa 12 Kanama ubwo Perezida Ndayishimiye yafunguraga ku mugaragaro inyubako nshya y’ishuri ryisumbuye rya Lycée Buterere riherereye i Bujumbura, yavuze ko amaze igihe akurikirana amakuru y’ikibazo cy’ibura rya peteroli kivugwa mu Burundi, asanga ari ibinyoma.

Yagize ati “Burya nta peteroli tubuze, ikibazo ni abantu batobanga bari hano mu Burundi. Ndabamenyesha ko peteroli ya mbere twiguriye ku ruganda bayipakurura uyu munsi. Dufite ubwato butatu buri mu nzira. Ababitoba bari hano, turaziranye.”

Mu byo Perezida Ndayishimiye yashinje "abatobanga", harimo kujya kuyigura ku bwinshi, bakayibika mu bubiko bwabo, bakajya bayigurisha Abarundi ku biciro bishyiriyeho.

Uyu Mukuru w’Igihugu yavuze ko ikibazo kiri mu Burundi ari uko Abarundi basabwaga kwishyura peteroli mu ntoki (cash), nyamara ngo ubu buryo bwo kwishyura buhombya igihugu cyabo amafaranga 36%.

Yavuze ko igihugu cyishyura miliyoni 30 z’amadolari ku kwezi yo kugura peteroli, kandi ko buri mezi atatu peteroli yinjira mu Burundi, agaragaza ko iyinjira mu gihugu ibaye ikoreshejwe neza, nta kibazo cyahaba.

Yibasiye abakomeye batuma amadolari abura

Ku kibazo cy’ibura ry’amadolari mu Burundi, Perezida Ndayishimiye yavuze ko mu bantu batuma ribura muri Banki Nkuru y’Igihugu harimo abakomeye yise “Ibigabo bigendera muri za jeeps.”

Yagize ati “Aya madolari mwumva ngo twarayabuze, abayatoba turabazi. Ndababwiza ukuri ko hano harimo abanyabwenge. Amadolari muri ariya mabandi aruzuye. Kubera iki? Bayajyana ku isoko ry’umukara. Amadolari ava hanze bayashyira ku makonti hanze.”

Ndayishimiye yakomeje yibasira aba bantu ati “Hano dufite abantu bakoreshwa n’amashitani. Abatobanga bariho kandi ntimugire ngo ni batoya! Ni ibigabo bigendera mu ma-jeeps. Twirirwa turwana, turahanganye. Ayo mashitani tuzahangana.”

Yibukije ko aherutse kuvumbura amabuye y’agaciro mu Ntara ya Kirundo, asobanura ko hari umuntu ukomeye wari warayahishe kandi ko umuyobozi wamutungiye agatoki yashyizweho igitutu abizira.

Uyu Mukuru w’Igihugu yabwiye abaturage b’i Bujumbura ko mu gihe arwana urugamba rw’iterambere, hari abantu bakomeje kwiba ubukungu bw’u Burundi. Yasabye abaturage kujya bamwereka abakora nabi kugira ngo abarwanye.

Perezida Ndayishimiye yavuze ko abavuga ko ifaranga ry'u Burundi ryatakaje agaciro, baba barituka

Ndayishimiye yibasiye abakomeye, abashinja kunyereza amadolari