Minisiteri eshanu, Perezida w’imitwe yombi y’Inteko: Biruta, Umunyapolitiki wadomye mu mfuruka zose

Yanditswe na Philbert Girinema
Kuya 13 Ugushyingo 2019 saa 07:40
Yasuwe :
0 0

22 na 23, niyo mibare y’ingenzi isobanura urugendo rwa Dr Vincent Biruta muri politiki y’u Rwanda. Ni we muntu umaze igihe kinini muri Guverinoma y’u Rwanda kurusha abandi bose bayirimo uyu munsi kuko yayinjiyemo bwa mbere mu 1997 nka Minisitiri w’Ubuzima, bisobanuye ko amaze imyaka 22 ayikandagiyemo ndetse ni Minisitiri w’Ububanyi n’Amahanga wa 23 w’u Rwanda kuva rwabona ubwigenge.

Ni umwe mu bagabo bayoboye mu nzego zitandukanye kandi zikomeye mu gihugu, kuko usibye kuba Minisitiri, yicaye mu mwanya wa kabiri ukomeye mu gihugu, aho yari Perezida wa Sena mu gihe cy’imyaka umunani.

Ni umugabo wubatse amateka kuva kera, kuko yize ibijyanye n’ubuganga ndetse abikora mu bihe u Rwanda rwari rukomerewe, aho yatanze umusanzu ukomeye mu kuvura Ingabo za RPA zari muri CND mu gihe we n’umuryango we bari bahahungiye.

Afite ubunararibonye muri politiki y’u Rwanda

Dr Biruta usanzwe ari Perezida w’ishyaka rya PSD, amaze kuyobora Minisiteri eshanu kandi zifite inshingano zitandukanye, ndetse zinahabanye gusa zihuriye ku kubaka u Rwanda.

Kuva mu 1997 kugera mu 1999, yinjiye muri Guverinoma nka Minisitiri w’Ubuzima, nyuma yaho amara umwaka umwe [kugera mu 2000] ari Minisitiri w’Imirimo rusange, gutwara abantu n’itumanaho.

Yayoboye kandi Inteko Ishinga Amategeko mu gihe cy’inzibacyuho mu myaka itatu hagati ya 2000 na 2003, aho yavuye aba Perezida wa Sena kugera mu 2011.

Mu Ukuboza 2011, yagizwe Minisitiri w’Uburezi kugeza muri Nyakanga 2014, nyuma yaho agirwa Minisitiri w’Umutungo Kamere yaje guhindurwa Minisiteri y’Ibidukikije kugera ku wa Kane Ugushyingo 2019 ubwo yagirwaga Minisitiri w’Ububanyi n’Amahanga.

Yahise aba Minisitiri wa 23 uyoboye Minisiteri y’Ububanyi n’Amahanga kuva u Rwanda rwabona ubwigenge, n’uwa 10 nyuma ya Jenoside yakorewe Abatutsi.

Ni umwe muri 14 bayoboye iyi Minisiteri batarigeze baba aba Ambasaderi b’u Rwanda n’uwa cyenda uyiyoboye yarabaye umuyobozi w’izindi minisiteri.

Avuga neza indimi mpuzamahanga

Kimwe mu by’ingenzi mu kuyobora iyi Minisiteri, ni ukuba uyihabwa agomba kuba azi nibura indimi ebyiri mpuzamahanga zikoreshwa cyane mu bubanyi n’amahanga, ari zo Igifaransa n’Icyongereza.

Izi ndimi zikenewe mu ruhando mpuzamahanga, hafatiwe ku miryango u Rwanda rubarizwamo, runafitemo inshingano.

Biruta waminuje mu bijyanye n’ubuganga muri Université Libre de Bruxelles, avuga neza Igifaransa hamwe n’Icyongereza, bimugira umugabo ushoboye kuri iyi ngingo.

Yanditse izina ku rwego mpuzamahanga

Inama mpuzamahanga nyinshi zigamije kwiga ku bijyanye no kubungabunga ibidukikije zabaye kuva mu 2014, Dr Biruta yarazitabiriye ahagarariye u Rwanda, akanatangamo ibitekerezo bifatika.

Ni ibintu byatumye amenyekana cyane bijyanye na gahunda u Rwanda rwimakaje yo kurengera ibidukikije, binyuze mu guca ibikoresho bya pulasitiki n’ibindi bifitanye isano n’imyuka yangiza ikirere.

Amasezerano mpuzamahanga yose u Rwanda rwasinyaga muri iyi ngeri, niwe wayashyiragaho umukono, akayobora n’inama nyinshi rwabaga rwahawe, urugero ni nk’ijyanye n’amasezerano ya Kigali [Kigali Amendment].

Ibi bituma ku ruhando mpuzamahanga izina rye ritumvikana nk’irishya mu matwi y’abandi bayobozi, kuko abenshi bagiye bamwumva kubera urugendo rw’u Rwanda rwo kurengera ibidukikije.

Amaze kwandika izina ku rwego mpuzamahanga kubera inama zitandukanye yagiye yitabira zivuga ku kurengera ibidukikije

Urutonde rw’abaminisitiri 21 bayoboye MINAFFET mu nshuro 22

1. Rusingizandekwe Otto: 1961–1962

2. Habamenshi Callixte: 1962 - 1963

3. Amb. Mpakaniye Lazare: 1963–1965

4. Bagaragaza Thaddée: 1965–1969

5. Dr Nsanzimana Sylvestre: 1969–1971

6. Gashonga Deogratias: 1971–1972

7. Munyaneza Augustin: 1972–1973

8. Col. Nsekalije Aloys : 1973–1979

9. Amb. Ngarukiyintwali François : 1979–1989

10. Dr Bizimungu Casimir: 1989–1992

11. Ngulinzira Boniface: 1992–1993

12. Amb. Dr Gasana Anastase: 1993–1994

13. Bicamumpaka Jérôme : Mata 1994 – Nyakanga 1994

14. Amb. Dr Jean Marie Ndagijimana: Nyakanga 1994 – Ugushyingo 1994.

15. Amb. Dr Gasana Anastase: 1994 – 1999

16. Amb. Amri Sued: 1999 (Amezi make)

17. Dr. Iyamuremye Augustin: 1999-2000

18. Al Hajj Andre Habib Bumaya: 2000-2002

19. Amb. Dr Charles Muligande: 15 Ugushyingo 2002 – 08 Werurwe 2008

20. Amb. Rosemary Museminali: 08 Werurwe 2008 – 04 Ukuboza 2009

21. Louise Mushikiwabo: 04 Ukuboza 2009 – 18 Ukwakira 2018

22. Amb. Dr Richard Sezibera: Kuva ku wa 18 Ukwakira 2018 – 03 Ugushyingo 2019

23. Dr Vincent Biruta: 04 Ugushyingo 2019 -

Dr Vincent Biruta yaminuje mu bijyanye n'ubuganga ndetse yanabikozeho mbere yo kwinjira muri politiki
Dr Biruta yayoboye Minisiteri eshanu zitandukanye hose ahavana ishema
Biruta avuga neza indimi mpuzamahanga zikoreshwa muri dipolomasi arizo Icyongereza n'Igifaransa'
Dr Vincent Biruta asanzwe ari Perezida w'Ishyaka rya PSD

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza