Iperereza rya hato na hato kuri Ingabire Victoire rivuze iki?

Yanditswe na Philbert Girinema
Kuya 14 Kamena 2020 saa 03:20
Yasuwe :
0 0

Kuri uyu wa Gatandatu, Ingabire Victoire Umuhoza yasatswe n’abagenzacyaha b’Urwego rw’Igihugu rw’Ubugenzacyaha, RIB, nyuma y’uko bigaragaye ko hari imikoranire afitanye na Gaston Munyabugingo, uherutse gutabwa muri yombi ashaka kuva mu Rwanda ngo yinjire mu mitwe igamije guhungabanya umutekano w’igihugu.

Uyu Munyabugingo asanzwe ari Umukozi wa Leta, aho akora muri Minisiteri y’Uburezi nk’umukozi ushinzwe amasomero ya leta n’amasomero rusange. Yinjiye muri iyi minisiteri avuye mu Karere ka Nyarugenge aho yari umukozi ushinzwe urubyiruko, umuco na siporo nyuma mu 2015 aza kugirwa umukozi ushinzwe ibijyanye n’itangazamakuru.

Bivugwa ko yavuye mu Karere ka Nyarugenge nyuma yo kugirana ibibazo n’ubuyobozi bwe, bwaje no kugaragariza Minisiteri y’Abakozi ba Leta n’Umurimo ko inshingano akora zidahuye n’ibyo yize.

Akarere kamushyikirije Minisiteri y’Abakozi ba Leta n’Umurimo, iba ariyo imushakira undi mwanya muri Minisiteri y’Uburezi.

Umwe mu bakoranye nawe, yabwiye IGIHE ko yari umuntu ugoye kuko atavugirwagamo. Ati “Ni wa muntu niba afite icyo atekereza, ntushobora kukimukuramo, ni nabyo yapfuye na Meya. N’umuyobozi yashoboraga kuvuga nabi nawe akavuga nabi.”

Nta makuru arambuye arajya ahagaragara agaragaza uburyo yafashwe, aho yafatiwe n’igihugu yashakaga kwerekezamo kimwe n’imitwe irwanya u Rwanda yashakaga kwifatanya nayo.

RIB irateganya guhata ibibazo Ingabire ku mikoranire ye n’uyu mugabo w’abana babiri, nk’uko IGIHE yabibwiwe n’Umuvugizi wayo, Umuhoza Marie Michelle, wagize ati “birashoboka cyane ko azabibazwaho”.

Iperereza rya hato na hato kuri Ingabire

Ni inshuro irenga iya kane, Ingabire ari mu ndorerwamo za RIB mu iperereza ku byaha bitandukanye kuva yafungurwa ku mbabazi za Perezida wa Repubulika mu 2018.

Mu Ukwakira 2018, nyuma y’ukwezi kumwe afunguwe, Ingabire yitabye RIB kugira ngo abazwe ku magambo yari aherutse gutangaza ko ifungwa rye rishingiye ku mpamvu za politiki ndetse ko mu Rwanda hari imfungwa za politiki.

Mu biganiro yagiranye na RIB icyo gihe yasobanuye ko ibyo yakoze yabitewe no “kutagira ubumenyi buhagije mu by’amategeko cyangwa kugirwa inama mbi”.

Muri Gicurasi, na none Urwego rw’Igihugu rushinzwe Ubugenzacyaha, RIB, rwakoze iperereza kuri Ingabire Victoire wavuzweho gushakisha abayoboke no kubashishikariza kujya mu mutwe w’iterabwoba ugizwe n’ubwoko bumwe gusa.

Ingabire kandi ku wa 01 Ukwakira 2019 yahamagajwe na RIB kugira atange amakuru yafasha mu iperereza iyicwa rya Dusabumuremyi Cyridion bivugwa ko yiciwe aho yakoraga muri kantine mu Kigo Nderabuzima cya Shyogwe mu Karere ka Muhanga. Nyuma y’urupfu rwe, Ingabire yabwiye BBC ko yishwe n’abantu bigaragara ko batojwe kwicisha ibyuma.

Ku wa 08 Ukwakira 2019 nabwo yahamagajwe na RIB kugira ngo abazwe ku kuba hari aho yaba ahuriye n’igitero cyagabwe mu Karere ka Musanze kigahitana abantu 14, abandi 18 bagakomereka.

Ingabire mu mikoranire na FDLR

Kuva mu 2010 ubwo Ingabire yatabwaga muri yombi, hakunze kuvugwa uburyo yakoranye inshuro nyinshi n’imitwe igamije guhungabanya u Rwanda, uhereye kuri FDLR n’indi.

Ku wa 21 Mata 2010, Uwari Umushinjacyaha mu rubanza rwe, Richard Muhumuza, yabwiye Urukiko rwa Gasabo ko Ingabire yakoranye na FDLR, asaba bamwe mu bayigize kwitandukanya n’abandi, bagashinga umutwe FDU CDF, bafite muri gahunda guteza umutekano muke mu Rwanda.

Icyo gihe yashinjwaga na Lt Col Nditurende Tharcisse wasobanuye ko bagiranye imishyikirano, Ingabire amusaba kwitandukanya na FDLR bagashinga umutwe w’abasirikare wa FDU-Inkingi, ndetse ko yanamwoherereje itike kuri Western Union, bahurira i Kinshasa mu 2008 na Brazzaville babiganiraho. Mu biganiro byabo, ngo bategura ibikorwa by’iterabwoba n’intambara mu Rwanda.

Ingabire n’abagabye ibitero mu Kinigi

Mu Ukwakira 2019, mu Karere ka Musanze abantu bitwaje intwaro bagabye ibitero mu baturage, bica 14 mu buryo bubabaje abandi barakomereka. Abagabye icyo gitero bemereye itangazamakuru ko baturutse mu mutwe wa RUD Urunana, mu rwunge rw’indi mitwe yitwaje intwaro irimo FDLR FOCA na RNC.

Ni imitwe y’abarwanyi ishamikiye ku mashyaka atanu yishyize hamwe mu cyiswe P5, arimo Amahoro People’s Congress, Forces Démocratiques Unifieés – Inkingi (FDU-Inkingi) ya Ingabire; People’s Defence Pact-Imanzi (PDP-Imanzi), Rwanda National Congress (RNC) na PS Imberakuri.

Icyo gihe Ingabire nabwo yahamagajwe na RIB mu iperereza ku ruhare rwe muri iki gitero ndetse iminsi mike nyuma yacyo, yahise ahindura izina ry’ishyaka rye aryita, Development and Liberty For All (DALFA-Umurinzi).

Mu Ugushyingo 2019, Umuvugizi w’ibikorwa byiswe Sokola 2 by’ingabo za Congo, FARDC, bigamije guhiga inyeshyamba zayogoje umutekano mu Burasirazuba bwa Congo, Major Ndjike-Kaiko Guillaume, yabwiye IGIHE ko Gen Musabyimana Juvenal wari uzwi nka Jean Michel Africa, yishwe n’ingabo za Congo.

Gen. Musabyimana yari amaze iminsi ari umuyoboke wa FDU-Inkingi aho yari ashinzwe ibikorwa bijyanye n’igisirikare.

Icyo gihe Umuyobozi Mukuru wa RUD-Urunana, Dr Jean Marie Vianney Higiro, yihakanye Gen Afurika, avuga ko atakibarizwa muri uwo mutwe ahubwo bayobotse FDU Inkingi ya Victoire Ingabire.

Ati “Major Ntilikina Faustin na Gen Jean Michel Afurika bahisemo kuva muli RUD-Urunana binjira muri FDU Inkingi. Bityo rero ibikorwa byabo byose nibo bireba hamwe n’ishyaka bakorera.”

"Ingabire asa n’uwifitemo ubutagondwa"

Umwe mu bakurikiranira hafi ibijyanye n’iyubahirizwa ry’amategeko mu Rwanda utashatse ko amazina ye agaragara muri iyi nkuru, yabwiye IGIHE ko urebye ibikorwa bya Ingabire kuva yafungurwa, nta kintu na kimwe yigeze ahindukaho ndetse ko urebye ibikorwa bye asa n’umuntu "wifitemo ubutagondwa".

Ati “Iyo uhawe imbabazi uba ugomba kuba intangarugero mu kubiba amahoro, mu gukumira ibyaha n’ibindi. Kuri ingabire, njye mbona Ingabire ari umuntu ugoye, wasaritswe n’ingengabitekerezo utamenya iyo ariyo. Ntabwo ushobora kuba warakatiwe, warafunzwe hanyuma ugahabwa imbabazi ngo witware nk’uko yitwara.”

“Birasa n’aho Ingabire atigeze atezuka ku mugambi we wo guhungabanya umutekano w’igihugu. Kuva yafungwa na mbere y’uko afungwa, imyitwarire ye, mbona itarigeze ihinduka. Kuba RIB uyu munsi ikijya kumusaka, ni ikigaragaza ko hari ibyo bamukekaho.”

Iyi nzobere ivuga ko Ingabire akwiye kumera nk’abandi banyarwanda, niba ari politiki ashaka gukora, akayikora mu buryo buboneye agatanga umusanzu mu iterambere ry’igihugu kimwe n’abandi.

Ati “Ni umunyarwanda nk’abandi, ibyo ashaka bya politiki bigomba kugira umurongo bigenderamo, hari amashyaka akora neza, atanga umusanzu w’ubumwe n’ubwiyunge. Ariko we niba ashyigikiye ubugizi bwa nabi inzego zirahari, bafite uburenganzira bwo kumukurikirana mu gihe babonye ibimenyetso.”

Akomeza avuga kandi ko Ingabire yitwaza ko “ari umugore”, agahora ashaka ko amahanga avuga ko mu Rwanda hari umugore “w’impirimbanyi” ukora politiki utameranye neza na leta, uhohoterwa n’ibindi.

Ubwo yavaga muri Gereza, yavuze ko ‘uko ninjiyemo niko nsohotse” kuko ngo n’ubundi yari yafunzwe nta mpamvu. Ni imvugo yanyuranyaga n’ubusabe bwe bw’imbabazi, aho yari yemereye Umukuru w’Igihugu ko aramutse ababariwe agafungurwa, yazaba intangarugero muri sosiyete nyarwanda, gusa byose yaje kubyigarika, avuga ko nta mbabazi yigeze asaba.

Umwunganizi wa Ingabire, Me Gatera Gashabana, yabwiye IGIHE ko ntacyo yavuga ku byo umukiliya we akekwaho. Gusa ishyaka rya Ingabire ryo ryatangaje ko “ari amahire n’abo bari kumwe bose” ndetse ko RIB yasatse igatwara ibikoresho byose by’itumanaho n’inyandiko zose zari zihari.

Ingabire Victoire kuva yafungurwa ahawe imbabazi za Perezida wa Repubulika, yakunze gutumizwa na RIB agakorwaho iperereza

Ikiganiro Alain Mukurarinda wabaye Umuvugizi w’Ubushinjacyaha yigeze kugirana na IGIHE avuga kuri Ingabire Victoire


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .