00:00:00 IGIHE NETWORK KN KINYARWANDA EN ENGLISH FR FRANCAIS

Ihurizo kuri Cyril Ramaphosa ushaka manda ya kabiri muri Afurika y’Epfo

Yanditswe na IGIHE
Kuya 24 May 2024 saa 02:39
Yasuwe :

Ibintu birashyushye muri Afurika y’Epfo aho ibigugu muri politiki y’iki gihugu biri kwitegura amatora y’abagize Inteko Ishinga Amategeko ari yo azagena uzatorerwa kuba Perezida tariki 29 Gicurasi 2024.

Cyril Ramaphosa usanzwe ari Perezida ku itike y’ishyaka ANC ni we uhabwa amahirwe nubwo kuri iyi nshuro ishyaka rye rishobora kuzatsinda ku bwiganze buke, ibintu bizaba bibayeho bwa mbere mu mateka y’iryo shyaka rimaze imyaka 30 ku butegetsi.

Ramaphosa w’imyaka 71 ntiyorohewe nubwo ikusanyabitekerezo rigaragaza ko ari we uhabwa amahirwe menshi ugereranyije n’abo bahanganye. Impamvu atorohewe ni uko hari byinshi byasubiye inyuma ku buyobozi bwe.

Urugero ni nk’ubushomeri bwiyongereye, izamuka ry’ibiciro ku masoko, ibura rya hato na hato ry’umuriro hirya no hino mu gihugu, ibyaha bya ruswa na we ubwe yagiye ashinjwa n’ibindi.

Mu gihe ANC yaba ibuze ubwiganze, ni ukuvuga itsinze ku majwi make, bizayisaba kwihuza n’andi mashyaka yayikurikiye mu majwi arimo ayo batumva ibintu kimwe. Ibyo bizashyira Ramaphosa ku gitutu kuko hari byinshi ashobora kujya ashaka gukora bakabyanga, cyangwa bakazana ibyo we atemera akabikora kubera amaburakindi.

Ibigugu bishobora kuzahangana na Ramaphosa mu matora harimo Julius Malema w’ishyaka EFF, utajya urya indimi iyo bigeze ku mikorere mibi ya ANC.

Malema w’imyaka 43 iryo shyaka ararizi kuko yaribereye Umuyobozi w’Urubyiruko kugeza mu 2013, ubwo yirukanwagamo ashinjwa guteza amacakubiri.

Malema yigaruriye igice kinini cy’abatuye Afurika y’Epfo cyane cyane Abirabura, kuko avuga ko natorwa azasubiza ubutaka Abirabura ndetse inzego nyinshi z’ubukungu bw’igihugu akazishyira mu maboko ya Leta kugira ngo zibyarire inyungu bose aho kuba agatsiko gato k’abaherwe.

Undi uteye ikibazo Ramaphosa ni John Steenhuisen w’ishyaka Democratic Alliance (DA). Uyu mugabo w’imyaka 48 yifuza kuzana amaraso mashya muri politiki ya Afurika y’Epfo, kikaba igihugu cyihagazeho ku ruhando mpuzamahanga.

Icyakora Steenhuisen yagowe no kuvanaho icyasha iryo shyaka rifite mu maso y’abirabura batuye Afurika y’Epfo, kuko yashinzwe n’abazungu.Benshi mu batora baribona nk’ishyaka rya ba gashakabuhake rigamije kugarura ubutegetsi bw’abazungu bukandamiza abirabura.

Undi washoboraga kubangamira Ramaphosa ni Jacob Zuma wahoze ari Perezida kugeza mu 2018. Zuma yari amaze iminsi ashinze ishyaka rishya uMkhonto we Sizwe (MK), ashaka kwiyamamaza mu matora ariko urukiko ruherutse kumwangira, ruvuga ko afite inenge kuko yigeze gukatirwa n’inkiko.

Kugeza ubu amashyaka 70 n’abakandida 11 bigenga nibo bagaragaje ko bashaka kwiyamamariza umwanya w’ubudepite mu matora rusange ateganyijwe.

Amatora ya Perezida muri Afurika y’Epfo atandukanye gato n’asanzwe hirya no hino ku Isi kuko ho Perezida atorwa n’Inteko Ishinga Amategeko. Bivuze ko tariki 29 Gicurasi abatuye Afurika y’Epfo bazajya gutora abadepite, hanyuma abo badepite akaba ari bo bazitoramo Perezida.

Bivuze ko ANC ya Ramaphosa nitsindira imyanya myinshi y’abadepite, izaba ifite amahirwe y’uko umukandida wayo ari we uba Perezida. Bidakunze ikabona imyanya mike, ubwo ishyaka ryagize abadepite benshi niryo ritanga umukandida cyangwa se amashyaka abiri cyangwa atatu akaba yawihuriza hamwe, agahundagaza amajwi yayo ku mukandida umwe akaba Perezida.

Cyril Ramaphosa arashaka manda ya kabiri nubwo ubutegetsi bwe bwashinjwe kenshi gusubiza inyuma Afurika y'Epfo
Julius Malema ahabwa amahirwe icyakora ishyaka rye ntabwo rifite abayoboke mu bice byose by'igihugu
John Steenhuisen n'ishyaka rye DA bashinjwa kugendera ku mahame y'abazungu yo gushaka gukandamiza abirabura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .