Ibintu bitatu byitezweho mu nama ya OIF i Erevan

Yanditswe na Mathias Hitimana
Kuya 10 Ukwakira 2018 saa 10:15
Yasuwe :
0 0

Guhera kuri uyu wa Kane i Erevan muri Arménie, haratangira inama y’abakuru b’ibihugu bikoresha Ururimi rw’Igifaransa (OIF) izatorerwamo Umunyamabanga Mukuru wa OIF.

Abakandida babiri bahatana ni Minisitiri w’Ububanyi n’Amahanga w’u Rwanda, Louise Mushikiwabo n’Umunya-Canada, Michaëlle Jean usanzwe ayiyobora.

Mushikiwabo ni we uhabwa amahirwe kubera ko ibihugu hafi ya byose bigize OIF byatangaje ku mugaragaro ko bimushyigikiye.

Jeune Afrique itangaza ko abari hafi ya Michaëlle Jean bavuga ko yizeye ko kandidatire ye ishobora kuzaganirwaho mu muhezo mu nama y’abakuru b’ibihugu.

Ikindi cyitezwe ni ubwitabire bw’abakuru b’ibihugu benshi. Arménie itegereje abakuru b’ibihugu na za Guverinoma babarirwa muri 40 mu gihe inama iheruka i Antananarivo mu 2016 hitabiriye 17.

Mu bamaze kugera muri iki gihugu harimo Charles Michel (Minisitiri w’Intebe w’u Bubiligi), Patrice Talon (Perezida wa Bénin), Justin Trudeau (Minisitiri w’Intebe wa Canada), Denis Sassou Nguesso (Perezida wa Congo-Brazzaville), Emmanuel Macron (Perezida w’u Bufaransa), Paul Kagame (Perezida w’u Rwanda Rwanda), Macky Sall (Perezida wa Sénégal) na Idriss Déby Itno (Perezida wa Tchad).

Liban izahagararirwa na Perezida Michel Aoun naho Madagascar hazitabira Perezida wayo w’agateganyo, Rivo Rakotovao.

Alassane Dramane Ouattara wa Côte d’Ivoire azahagararirwa na Visi Perezida Daniel Kablan Duncan.

Mu nama y’i Erevan hanitezwe kuzamura ibihugu byari indorerezi muri OIF bikaba ibinyamuryango ariko bidafite ububasha bwuzuye. Ibyo ni Leta Zunze Ubumwe z’Abarabu, Kosovo na Serbie.

Hazanigwa ku busabe bwa Gambie, Irlande, Leta ya Louisiane yo muri Amerika na Malte bishaka kwinjira muri OIF.

Hazanasuzumwa ubusabe bwa Arabie Saoudite butizweho mu nama y’i Antananarivo mu 2016.

Iyi nama ya OIF izabera muri Complex sportif et de concert Karen Demirtchan

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza