Centrafrique, igihugu cyasaritswe n’ibihuha

Yanditswe na Philbert Girinema
Kuya 18 Mutarama 2021 saa 01:23
Yasuwe :
0 0

Imyaka ikomeje kwihirika Centrafrique yarabaye isibaniro ry’intambara na za Coup d’état ndetse byakajije umurego mu mwaka ushize ubwo imitwe yitwaje intwaro yishyiraga hamwe, ikiyemeza guhirika ubutegetsi bwa Faustin-Archange Touadéra kugira ngo François Bozizé yongere ayobore. Imwe mu ntwaro yifashishijwe muri uru rugamba usibye amasasu ni ibihuha.

Ibihuha mu bice nk’ibi birimo umutekano muke, biyobya benshi ndetse bigatuma abaturage bahora mu bwoba, byagera no mu gisirikare kidakomeye bikaba ibindi bindi. Nta munsi wira muri Centrafrique nta gihuha gikangaranyije abantu, gusa igitangaje ni uko kiba giturutse mu bantu bakomeye kandi bo hejuru yaba muri Guverinoma cyangwa muri Minusca.

Hakwiriye igihuha ko Perezida yahunze

Ku wa Gatatu tariki ya 06 Mutarama 2021, muri Centrafrique hakwiriye igihuha gikomeye ko Perezida Faustin-Archange Touadéra yahunze akava mu Murwa Mukuru akerekeza muri Perefegitura ya Ouaka muri Komine Lissa ahari inkambi ya gisirikare yitwa Belengo.

Iby’uguhunga kwa Perezida byatangiye gukwirakwira mu masaha y’ijoro rishyira ku wa Gatatu tariki ya 06 Mutarama 2021, aho byavugwaga ko umutekano muri Bangui utameze neza, ndetse ko abarwanyi b’imitwe yitwaje intwaro batangiye kwigabiza umujyi.

Kuri uwo munsi, ubuzima bwari nk’ubusanzwe mu Mujyi wa Bangui, nta kintu cyagaragazaga ko hari urunturuntu ndetse ahubwo abazi iki gihugu ugereranyije n’indi minsi bakibonaga nka Paradizo.

Hari umwe mu banyarwanda twaganiriye uhakorera ubucuruzi, avuga ko bitangaje kubona muri iki gihe umunsi ushobora kwira nta sasu na rimwe ryumvikanye, ko ari ikimenyetso cy’uko umutekano watangiye kugaruka.

Ati “Njye bisigaye bintangaza, mbere nta munsi wiraga nta masasu yumvikanye. Wasangaga ijoro ryose ari amasasu, abantu barasana mu bice bya PK5 ahari Abayisilamu no muri Marché de Combattant.”

Hari umwe mu basirikare b’u Rwanda twaganiriye anyuriramo uburyo mu myaka ya 2014 Abayisilamu n’Abakirisitu bicanaga ku manywa y’ihangu, ku buryo rimwe na rimwe bafataga nk’umuntu bakamukata umutwe mu maso y’abasirikare. Icyo gihe ingabo zari ziriyo zari iza Afurika Yunze Ubumwe.

Tugaruke kuri cya gihuha cy’uko perezida yahunze. Abaturage bakibita mu matwi, batangiye kuzinga utwangushye, bashaka kuva mu murwa mukuru ngo berekeze mu yindi mijyi.

Hari amakuru IGIHE yamenye ko muri iryo joro, hari abasirikare bari ku burinzi batunguwe no kubona igihiriri cy’abaturage mu nzira bari kugenda, maze bababaza bakababwira ko nabo bahunze nyuma y’uguhunga kwa perezida. Bivugwa ko hahunze nk’abagera mu magana muri ayo masaha ariko bakaza gusubira mu ngo zabo nyuma yo guhumurizwa n’abasirikare.

Kuri uwo wa Gatatu, nageze muri Perezidanse ya Centrafrique, nta kintu na kimwe cy’umutekano muke cyaharangwaga cyangwa se ubwoba runaka. Ubuzima bwari bukomeje nk’ibisanzwe, Ingabo z’u Rwanda zirinda Perezida wa Repubulika ziri mu kazi nk’ibisanzwe. Iza leta nazo nta kibazo zari zifite, zakoraga imirimo y’umunsi isanzwe.

Hirya gato ya Perezidanse muri État-major ubuzima bwari ubusanzwe, abasirikare bakina amakarita abandi batetse hanze amafunguro ya saa sita. Nabonye imodoka ya Perezida wa Repubulika iparitse ku muryango w’ibiro bye, bwari ubwa kabiri nyihabonye, mbaza umwe mu basirikare nijijisha nti kuki iriya modoka iparitse aha, ambwira ko buri gihe iyo perezida ari mu biro ariho iba iparitse, ko ariyo agendamo.

Iki gihuha cyaje gikurikira ikindi cyakwiriye ku mbuga nkoranyambaga cyavugaga ko muri Centrafrique ku Kibuga cy’Indege hageze ingabo 2600 zinjiye biturutse ku bufatanye ngo bwari bwasinywe umunsi umwe mbere hagati ya Guverinoma ya Centrafrique na Tchad bugamije ibikorwa byo gushaka amahoro.

Ni iyihe nkomoko y’iki gihuha?

Inkuru y’uko Perezida yahunze yakwiriye biturutse mu bayobozi bo hejuru, bo mu Ntumwa za Loni ziri mu bikorwa kubungabunga amahoro Minusca. Amakuru IGIHE yamenye ni uko hari Umunyaburayi ukora muri Minusca, wandikiye abantu benshi kuri email ababwira ko afite amakuru yizewe ko umutekano wa Perezida utameze neza ndetse ko yahunze.

Muri ubwo butumwa yavugaga ko Perezida yahunze kuko umutekano mu Mujyi wa Bangui utifashe neza. Ibi n’ibindi nk’ibyo byahise bikwirakwira mu itangazamakuru cyane irikoresha ururimi rw’Igifaransa.

Umwe mu basirikare baganiriye na IGIHE yavuze ko aba ari ibintu bitangaje kumva ko Umukuru w’Igihugu yahunze mu gihe arinzwe neza.

Ati “Nitwe tumurinze, none se yahunze ntitwabimenya kandi turi kumwe nawe? Ni nka biriya byo kuvuga ngo abasirikare baturutse muri Tchad binjiye mu gihugu, banyuze he? Ko ikibuga cy’Indege kirinzwe n’Ingabo z’u Rwanda, ingabo 2600 ntizaza mu ndege imwe, ntibyanashoboka ko ziza umunsi umwe keretse ubwo haje indege nini nk’icumi.”

“Ubwo se zagwa ku kibuga ntihagire ubimenya? Ibi ni ibihuha bihimbwa n’abantu bafite icyo bagambiriye, ni abantu badashaka ko iki gihugu gitekana, bahora barekerereje bashaka icyateza umutekano muke.”

Inenge mu makuru y’ubutasi

Ibihugu byose usanga bishyira imbaraga mu nzego z’ubutasi ku buryo iteka zibona amakuru yose acaracara mbere, zikayasesengura, zikareba ukuri kwayo, hanyuma zikayageza ku bo bireba ari nabo baba bagomba gufata umwanzuro w’ikigomba gukorwa.

Umwe mu basirikare b’u Rwanda baganiriye na IGIHE yavuze amwe mu mahame agenderwaho mu butasi bwa Gisirikare ashingiye ku ijambo rikoreshwa cyane “SALUTE”.

Ati “Mu Gisirikare SALUTE ni ijambo rifite akamaro cyane. S ibanza ivuga “Size”. Ese niba ari abantu binjiye mu gihugu ni bangahe, A ivuga “Activity”, baje gukora iki? L ivuga “Location”, bari he? Ubu umuntu ubashaka wabasangaho, U ni Unit, T isobanura “Time” abo bantu baje ryari hanyuma E, ni Equipment, bafite ibikoresho bihe, bimeze bite, bingana bite?”

“Iryo ni ihame rikomeye, nicyo kintu cya mbere abantu baba bakwiye kwitaho iyo babonye amakuru ajyanye n’igisirikare, ni aho umuntu ahera ayasesengura.”

Igisirikare cya Centrafrique ni kimwe mu bicyiyubaka, kiracyari kure mu ngeri zose. Abasirikare b’iki gihugu, abenshi baba bambaye inkweto zisanzwe za Souplesse, hanyuma hejuru bakarenzaho impuzankano.

Ushobora gukubitana nabo mu muhanda, ukabona nk’imbunda yayihetse mu mugongo ubundi agatega moto nk’abandi baturage basanzwe. Hari umuntu twaganiriye ambwira ko impamvu baba bambaye Souplesse ari uko imbere y’impuzankano baba bambariyemo imyenda isanzwe.

Muri make baragondeka, akambara nk’itiriningi n’umupira ubundi akarenzaho impuzankano ya gisirikare. Iyo isasu rivuze akumva atiteguye kurwana, ngo ahita akuramo impuzankano, imbunda akayirambika hasi ubundi akayabangira ingata.

Abasirikare ba Centrafrique bamwe usanga bambaye inkweto zisanzwe, bazambariye ku matiriningi. Bivugwa ko hari ubwo iyo amasasu avuze, bamwe bakuramo impuzankano bakiruka

Usibye iki kibazo, hari n’ikindi cy’amakuru agera ku Mukuru w’Igihugu. Umwe mu baganiriye na IGIHE yagize ati “Nta rwego rukomeye ruhari rushinzwe ubutasi ku buryo ruyungurura amakuru yose mbere yo kuyaha Umukuru w’Igihugu, usanga inzego zose zirirwa zitanga amakuru y’ibihuha.”

IGIHE yamenye ko hari umunsi umwe abantu babwiye Perezida ko abasirikare b’igihugu cye banze kurwana, kandi atari ko bimeze. Icyo gihe ngo yabagezeho asanga nta kibazo ahubwo atungurwa no gusanga umwe mu basirikare be bakuru yasinze ku buryo bukabije.

Minisitiri w’Ingabo wa Centrafrique, Marie-Noëlle Koyara, yabwiye IGIHE ko mu bihe bitandukanye hagiye hakwira ibihuha bigamije gutera ubwoba abaturage. Yatanze urugero rw’ibyavugaga ko amatora atazaba, arangiye hakurikiraho ibindi bivuga ko umwaka utazarangira amahoro n’ibindi nk’ibyo.

Magingo aya, ingabo za Loni ziri muri Centrafrique ziryamiye amajanja by’umwihariko ziteze ikintu cyose gishobora guhungabanya umutekano kikanaburizamo irahira ryo muri Werurwe rya Perezida watowe.

Uyu ni umusirikare w'Igihugu, FACA, ahetse imbunda ye ubundi yurira moto. Hari abatahana imbunda mu ngo zabo
Amarembo yinjira muri État-major ya Centrafrique. Iyo winjiyemo ukagana aho iburyo, hari agashyamba usangamo abasirikare batetse ubugari ku manywa y'ihangu
Mu Mujyi rwagati, iyo hari igihuha cyakwiriye utangira kubona moto nyinshi zicicikana
Uyu ni umusirikare w'u Burusiya, yari yicaye acunze umutekano ahantu ku muhanda
Aha ni muri Palais de la Renaissance, Ingoro y'Umukuru w'Igihugu
Uhagaze ku musozi wa Gbazabangui, uba witegeye Umurwa Mukuru wose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .