00:00:00 IGIHE NETWORK KN KINYARWANDA EN ENGLISH FR FRANCAIS

Ba Meya 14 bashya na 13 basanzwe mu biro: Imihigo ku bayobozi bahanzwe amaso

Yanditswe na Akayezu Jean de Dieu
Kuya 24 Ugushyingo 2021 saa 07:21
Yasuwe :
0 0

Icyumweru ntikirashira hamenyekanye abayobozi bashya b’uturere, bagomba kwigaragaza bashyira mu bikorwa ibyo bemereye abaturage mu myaka itanu iri imbere. Batowe mu bihe bidasanzwe aho ubukungu bw’igihugu n’imibereho y’abaturage muri rusange yasubijwe inyuma n’icyorezo cya Covid-19.

Si ibyo gusa kuko bakeneweho umuvuduko udasanzwe mu myaka itatu isigaye ngo manda Perezida Paul Kagame yatorewe mu 2017 irangire. Nibo bahanzwe amaso mu kumufasha guhigura ibyo yemereye abaturage nko kuba bose barerwaho n’amashanyarazi, amazi meza, amashuri n’ibindi.

Aba bayobozi bashya b’uturere 27 barahiriye inshingano zabo kuri uyu wa Mbere, banzika bajya mu mwiherero kugira ngo bamenye uburemere bw’inshingano zibategereje n’uburyo bazabyitwaramo ngo bazigereho.

Abatowe ni Komite igizwe n’Umuyobozi w’Akarere, Umuyobozi Wungirije Ushinzwe Ubukungu n’Iterambere ndetse n’Umuyobozi Wungirije Ushinzwe Imibereho myiza y’Abaturage.

Mu bayobozi b’uturere batowe [ba Meya] harimo abashya 14, mu gihe abandi 13, bari basanzwe muri iyi mirimo aho bari bayimazemo imyaka igeye itandukana bitewe n’igihe bagiriyeho.

Gicumbi, Rulindo, Gakenke, Musanze, Rubavu, Rutsiro, Ngororero, Rusizi, Nyamagabe, Nyaruguru, Kamonyi, Nyagatare, Ngoma na Kirehe nitwo turere dufite abayobozi bashya.

Bose bafite ubunararibonye kubera imirimo itandukanye bari basanzwe bakora, nk’aho babiri muri bo bafite Impamyabumenyi y’Ikirenga (PhD), 14 bafite Master’s na 11 Bachelor’s. Umuto muri bose afite imyaka 35, umukuru akagira 53.

IGIHE yaganiriye na bamwe mu bayobozi b’uturere by’umwihariko abatorewe izi nshingano ku nshuro ya mbere, bagaruka ku migabo n’imigambi bazanye ndetse n’uko biteguye gukorana n’abandi mu guteza imbere abaturage.

Mu Majyaruguru, imihigo ni yose

Intara y’Amajyaruguru igizwe n’uturere dutanu, aho uretse Musanze ifatwa nk’igicumbi cy’Ubukerarugendo mu Rwanda, utundi turere twose ari utw’imisozi miremire ikorerwamo ibikorwa by’ubuhinzi.

Uretse Uwanyirigira Marie Chantal wari usanzwe ayobora Burera akaba yarongeye gutorerwa izi nshingano, abandi bose ni bashya mu nshingano barimo Ramuli Janvier wa Musanze, Nizeyimana Jean Marie Vianney wa Gakenke, Nzabonimpa Emmanuel wa Gicumbi, na Mukanyirigira Judith wa Rulindo.

Aba bose baganiriye na IGIHE bahuriza ku kuba baje gufatanya n’abandi bakozi basanze mu turere, abayobozi mu nzego zitandukanye, abikorera ndetse n’abaturage mu kwihutisha iterambere.

Ramuli Janvier yavuze ko kuba yari amaze imyaka itandatu ashinzwe serivisi z’abinjira n’abasohoka ku rwego rw’Intara, byamufashije gukorana bya hafi n’akarere dore ko ari naho asanzwe atuye.

Ati “Nari nsanzwe ndi mu nama y’umutekano itaguye y’Intara, kandi mu nshingano zacu harimo gukurikirana no kugira inama uturere tugize intara muri gahunda za buri munsi, twibanda ku kuzamura ibipimo muri gahunda za leta by’umwihariko gahunda y’imyaka irindwi.”

“Haba mu bukungu, imibereho myiza n’imiyoborere. Iryo jisho niryo ryamfashaga kureba uko ibintu bigenda. Harimo ibyo nari nsanzwe mbona. Habagamo no kureba umuvuduko imihigo y’uturere igenderaho niba harimo ukwihuta cyangwa kugenda buhoro.”

Meya wa Musanze, Ramuli Janvier avuga ko mubyo azihutira gukemura harimo imihigo yari ikiri kuri 0%, ibintu abona ko ari ikibazo cyo kudakurikirana.

Ati “Muby’ukuri hari ibipimo bimwe twabonaga bikiri inyuma cyane kandi wabaza ugasanga nta mpamvu yo kubisobanura ari ikibazo cy’imikorere n’imikoranire mu bakozi bandi baba babishinzwe,ariko noneho iyo bitagenze neza, ubibazwa ni Nyobozi [Meya n’abamwungirije].”

Yakomeje agira ati “Ugasanga nk’imihigo imwe n’imwe ikiri ku kigero cyo hasi kandi iri muri ya yindi igamije kuzamura nk’ubuzima bw’abaturage,. Ugasanga nko muri gahunda ya Girinka, igihembwe gishize nta ziratangwa, byose wareba ugasanga habuze ijisho ry’ubuyobozi ryo kubaza icyagiye kibura.”

Musanze nk’Umujyi watoranyijwe kunganira Kigali, Rumuli avuga ko agiye kwibanda ku gukorana n’abikorera mu kugera kubyo ubuyobozi bukuru bw’igihugu bwatanze nk’umurongo.

Nizeyimana Jean Marie Vianney watorewe kuyobora Akarere ka Gakenke, we avuga ko karimo kwihuta mu iterambere, ibintu avuga ko ari amahirwe bagiye kubyaza umusaruro.

Ati “Gafite amahirwe menshi, kari muri dutanu ducukurwamo amabuye y’agaciro, gahingwamo kawa cyane, gafite inanasi, urutoki, ibishyimbo, dufite ibintu byinshi byiza iwacu.”

Yakomeje agira ati “Ibyo bikorwa byose bitanga akazi ku baturage ariko noneho icyo tuzibandaho ni ukubashishikariza kwizigama kugira ngo ayo mafaranga bakorera abagirire akamaro.”

Nizeyimana yavuze ko muri aka karere hari umushinga wo kubaka uruganda rutunganya kawa ndetse no kureba uko umusaruro w’ibindi bihingwa wakongerwa kandi ukaba mwiza.

Ati “Ariko nanone dutekereza uburyo bw’inganda ziciriritse zajya zifasha mu kwakira wa musaruro,ugatunganywa ndetse ubwo birumvikana ko n’amasoko azajya aboneka.”

Yakomeje agira ati “Ntabwo ushobora gukora wenyine ngo utsinde, n’ubwo waba uri umuhanga inshuro igihumbi, bisaba gusangira amakuru, gusangira gutekereza no kujya inama bigashingira mu nzego zose n’abaturage.”

I Burengerazuba ,ubufatanye nibwo bashyize imbere

Igice kinini cy’Intara y’Uburengerazuba, usanga abaturage bacyo ubuzima bwabo bushingiye ku buhinzi n’ubworozi, ubucukuzi bw’amabuye y’agaciro ndetse n’ibikorwa by’ubukerarugendo.

Murekatete Triphose watorewe kuyobora Akarere ka Rutsiro, yabwiye IGIHE ko ibyo azibandaho ari ukwihutisha iterambere ry’ubukungu rishingiye ku bikorera.

Yakomeje agira ati “Kwita ku buhinzi nabyo bizashyirwamo imbaraga kugira ngo twihaze dusagurire n’amasoko.”

Murekatete avuga kandi ko bazita cyane ku mibereho myiza y’abaturage ba Rutsiro, bashyiraho uburyo bufasha bose kugira ubwisungane mu kwivuza kandi ndetse hakitabwa ku kwimakaza uburezi budaheza.

Ati “Ibikorwa byose ntabwo ubuyobozi bwabigeraho bukora bwonyine, bisaba gufatanya n’izindi nzego uhereye ku rwego rw’Isibo. Muri ubwo bufatanye tuzaharanira ko inzego zatowe habaho kuzegera, hakabaho no guhugura abo bayobozi kugira ngo ibyo twifuza kugeraho tuzabigereho.”

Murekatete avuga kandi ko hari gahunda y’ibikorwa Umukuru w’Igihugu yemereye abaturage, ari nayo mpamvu bazashyira imbaraga mu guharanira ko ibitaragerwaho bigerwaho mbere y’uko imyaka ibiri irangira.

I Burasirazuba, umuturage azahora ku isonga

Abaturage b’i Burasirazuba babarizwa mu bikorwa by’ubuhinzi n’ubworozi bwaba ubw’amatungo maremare nk’inka ndetse n’andi matungo magufi atandukanye.

Akarere ka Ngoma gafite amahirwe mu bijyanye n’ubuhinzi n’ubworozi, abaturage usanga bahinga urutoki n’inanasi ari nabyo Niyonagira Nathalie watorewe kukayobora asanga azibandaho mu kubikora neza.

Ati “Andi mahirwe akarere ka Ngoma gafite ni ibiyaga. Ni ibiyaga bishobora gutunganywa bikaba isoko y’ubukerarugendo ku buryo byakwinjiriza abaturage n’igihugu muri rusange cyane cyane ko ari ibiyaga byegereye ahazanyura ikibuga cy’indege cya Bugesera.”

Niyonagira avuga ko imikoranire hagati ya Nyobozi n’izindi nzego ari intwaro izafasha mu kwihutisha iterambere n’ibikorwa Umukuru w’Igihugu yemereye abaturage.

Amajyepfo, bashyize imbere gusigasira ibyagezweho no kwihutisha iterambere

Abayobozi bashya batorewe kuyobora uturere two mu Majyepfo baganiriye na IGIHE, bagaragaje ko mubyo bashyize imbere harimo gusigasira ibyagezweho n’abo bakoreye mu ngata ariko banimakaza ubufatanye mu gukora byinshi birushijeho.

Murwanashyaka Emmanuel uherutse gutorerwa kuyobora Nyaruguru, yavuze ko hari umurongo mugari w’igihugu ari nawo azagenderaho.

Ati “Hari umurongo igihugu gisanzwe kigenderaho, hari politiki ngari zireba iterambere, imiyoborere myiza, ubutabera n’ibindi, izo nizo mu bufatanye n’izindi nzego tugomba gushyira mu bikorwa.”

Yakomeje agira ati “Nzibanda cyane ku ho nzasanga harimo intege nke, ariko uko biri kose iyo umuturage wamuhaye agaciro, ibyagezweho ashobora kubirinda mu rwego rwo kubisigasira.”

Murwanashyaka avuga ko azibanda cyane ku gushyira umuturage ku isonga, guteza imbere ibikorwa by’ubuhinzi ndetse n’ubukerarugendo bushingiye ku Iyobokamana.

Minisitiri w’Ubutegetsi bw’Igihugu, Gatabazi Jean Marie Vianney, aherutse gusaba abayobozi bashya mu nzego z’ibanze ko igihe bazaba bemejwe bagomba kuzarangwa n’imyitwarire myiza mu nshingano bazaba bahawe.

Uretse gufata ibyemezo no kubishyira mu bikorwa, yavuze ko bayobozi bagomba no kuzirikana gukemura ibibazo by’abaturage no kubaha serivisi nziza, bityo bakumva babibonamo.

Minisitiri Gatabazi yavuze ko iyo abayoborwa bibonamo ababayobora bakumva ko ubafitiye akamaro, bifasha mu kubakemurira ibibazo, kubarenganura, no kubagezaho ibyo bagenewe bidaciye ku ruhande bityo abaturage bakagirira icyizere ababayobora.

Rangira Bruno niwe muyobozi mushya uherutse gutorerwa kuyobora Kirehe
Gasana Steven watorewe kuyobora Nyagatare
Niyomwungeri Hildebrand ni we watorewe kuba Meya wa Nyamagabe
Mukanyirigira Judith yatorewe kuyobora akarere ka Rulindo
Kambogo Ildephonse watorewe kuyobora Rubavu
Murwanashyaka Emmanuel , Meya mushya wa Nyaruguru
Dr Sylvere Nahayo, Meya wa Kamonyi
Niyonagira Nathalie yatorewe kuyobora Akarere ka Ngoma
Nyemazi John Bosco wa Kayonza
Nzabonimpa Emmanuel yatorewe kuyobora Gicumbi
Ramuli Janvier yatorewe kuyobora akarere ka Musanze
Umuyobozi mushya w'akarere ka Rutsiro, Murekatete Triphose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .