00:00:00 IGIHE NETWORK KN KINYARWANDA EN ENGLISH FR FRANCAIS

Amerika itewe impungenge n’umwuka mubi hagati y’u Rwanda na RDC

Yanditswe na IGIHE
Kuya 12 June 2022 saa 11:59
Yasuwe :

Leta Zunze Ubumwe za Amerika zatangaje ko zihangayikishijwe n’umwuka mubi hagati y’u Rwanda na Repubulika Iharanira Demokarasi ya Congo (RDC), isaba ibihugu byombi kumvikana.

RDC imaze iminsi ishinja u Rwanda gushyigikira umutwe wa M23, ibintu rwahakanye ahubwo rugashinja icyo gihugu kurasa ku butaka bwarwo no gushimuta abasirikare babiri barwo bari bari ku burinzi.

Leta Zunze Ubumwe za Amerika zatangaje ko zibabajwe n’uwo mwuka mubi. Zibinyujije kuri Twitter, Ibiro bya Leta Zunze Ubumwe za Amerika bishinzwe Afurika, byagize biti “Dutewe impungenge n’amakuru y’ibitero byambukiranya imipaka hagati ya RDC n’u Rwanda byatwaye ubuzima bw’abantu. Twizeye imiyoborere yubaka kandi ishyira mu gaciro ya Perezida wa RDC n’u Rwanda.”

Ambasaderi wa Amerika muri Loni, Linda Thomas-Greenfield, tariki 31 Gicurasi 2022 ubwo mu kanama k’umutekano ka Loni haganirwaga ku kibazo cy’umutekano mu Burasirazuba bwa Congo, yasabye Congo kugana inzira y’ibiganiro kugira ngo mu Burasirazuba bw’igihugu haboneke amahoro.

Aha yagarukaga ku masezerano ya Nairobi yasinywe mu 2013 yo guhosha imirwano na M23 ndetse n’ibiganiro biherutse mu kwezi gushize byari bigamije kurwanya imitwe yitwaje intwaro mu Burasirazuba bwa Congo.

Linda Thomas-Greenfield yagize ati “Twishimiye imbaraga za dipolomasi zakoreshejwe zirimo ibiganiro bya Nairobi kugira ngo mu karere haboneke amahoro arambye.”

Yakomeje agira ati “Turasaba abo bireba bose kurinda abasivile. Guverinoma ya RDC ikwiriye gukomeza ibiganiro n’ibihugu by’ibituranyi, by’umwihariko ku kijyanye n’ubugizi bwa nabi M23 iri gukorera abasivile.”

Bivugwa ko mu biganiro RDC yagiranye n’imitwe iyirwanya mu kwezi gushize, M23 yakumiriwe ari nacyo cyayiteye uburakari ikubura imirwano.

Leta ya Congo iherutse gutangaza ko itazongera kuganira na M23 kuko iyifata nk’umutwe w’iterabwoba mu gihe uwo mutwe nawo watsimbaraye ko utazashyira hasi intwaro ibyo wemeranyije na Congo bitubahirijwe.

Angola niyo yagenwe n’Umuryango wa Afurika Yunze Ubumwe ngo ibe umuhuza hagati ya RDC n’u Rwanda.

Umusaruro wa mbere w’ubwo buhuza wagaragaye kuri uyu wa Gatanu ubwo u Rwanda rwatangazaga ko rwasubijwe abasirikare barwo bari bamaze ibyumeru bibiri bashimuswe n’ingabo za Congo.

Amerika yagaragaje ko itewe impungenge n'umwuka mubi ukomeje hagati y'u Rwanda na RDC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .