00:00:00 IGIHE NETWORK KN KINYARWANDA EN ENGLISH FR FRANCAIS

Abarwanyi ba FDLR bashimangiye ko barimo gukorana na FARDC

Yanditswe na Musangwa Arthur
Kuya 14 Ukuboza 2022 saa 10:08
Yasuwe :

Abarwanyi b’umutwe wa FDLR bafashwe n’umutwe wa M23 bashimangiye ko barimo gukorana n’Ingabo za Repubulika Iharanira Demokarasi ya Congo (FARDC), mu gihe uyu mutwe washinzwe n’abarimo abagize uruhare muri Jenoside yakorewe Abatutsi mu Rwanda, mu 1994.

Ni ibirego u Rwanda rwakomeje kugaragaza, nyamara RDC ikabihakana yigiza nkana.

Minisitiri w’Intebe wungirije akaba na Minisitiri w’Ububanyi n’amahanga wa RDC, Christophe Lundula, aheruka kubwira Akanama k’Umuryango w’Abibumbye gashinzwe umutekano ko basabye umuntu wese waba afite amakuru ku muyobozi wa FDLR waba uri muri Congo, aho iherereye cyangwa ubufatanye bwayo na FARDC mu bitero ku butaka bw’u Rwanda, kuyabaha.

Ati "Amezi abaye atatu, turacyategereje."

Nyamara FDLR ntiyahwemye gushimangira ubu bufatanye, bwafashe indi ntera nyuma yo kubura imirwano kwa M23.

Amashusho yashyizwe hanze n’abarwanyi ba FDLR bafashwe na M23, agaragaza byinshi ku mikorere y’uyu mutwe.

Mu bantu bafashwe harimo Adjudant Uwamungu Innocent, uvuga ko yavukiye ku Gisenyi, muri Mutura.

Avuga ko yafashwe na M23 ku rugamba rwabaye mu minsi ishize, mu Rutare ahitwa i Paris, ugana i Tongo.

Ati "Bamfashe turi kurwana, ndi umu FDLR."

Adjudant Uwamungu yakoraga mu bunyamabanga bwa Général Pacifique Ntawunguka alias Omega, uyobora ishami rya gisirikare (FDLR-FOCA) nyuma y’ukwicwa kwa Sylvestre Mudacumura.

Yavuze ko yinjiye muri FDLR avuye i Masisi, naho akaba yarahageze bavuye mu nkambi z’impunzi mu mashyamba ya Congo, mu 1996.

Arondora abayobozi ba FDLR bari muri Congo barimo umuyobozi mukuru Lt Gen Iyamuremye Gaston alias Byiringiro uzwi nka Victor Rumuri, Gen Omega, umwungiriza we Gen Mugisha, Umunyamabanga mukuru Gen Gakwerere, Gen Uwimbabazi Sebastien uzwi nka Nyembo Kimenyi ushinzwe iperereza, Gen Matovu, Gen Manzi, Gen Serge, Gen Calme na Gen Poète.

Yakomeje ati "Aho twabaga hari muri segiteri iyobowe na Circophe, ikorera i Kazaroho, hari n’indi iyobowe na Colonel Oreste ikorera i Gwindi ikaza ikagera i Paris, na batayo ya (Colonel) Ruhinda ikorera mu rutare i Rugari."

Uyu murwanyi wa FDLR yagendaga abazwa ibibazo n’abarimo Major Willy Ngoma uvugira M23, maze agasubiza mu Kinyarwanda nka bagenzi be.

Yabajijwe impamvu bambaye impunzankano ya FARDC, niba koko bakorana.

Yakomeje ati "FARDC mu gihe cy’intambara turakorana. Nyatura na yo turakorana, tukanabaha imyitozo."

Yavuze no ku bayobozi ba politiki ba FDLR barimo Perezida wayo Lt Gen Byiringiro Victor, avuga ko aba i Kazaroho, hamwe na Colonel Circophe.

Gen Omega we ngo ubu aba mu Rutare i Tongo, aho abana n’abasirikare bakeya.

Yakomeje ati "Aho muherukira yari ari kumwe n’abasirikare bakeya ariko basa n’abashwiragiye, bari kwihishahisha aho mu rutare."

Yavuze ko FDLR itunzwe no guhinga ndetse no gusoresha abaturage, ubundi amafaranga abonetse ikayaguramo imiti n’amasasu.

Premier Soldat Safari Mbitse na we yavukiye muri RDC, ku buryo atigeze agera mu Rwanda.

We yabajijwe ahantu bakura ibikoresho bya gisirikare, ati "Ni FARDC ibiduhereza."

Premier Sergeant Uwiduhaye Marie Chantal we avuga ko yavukiye ku Gisenyi. Se ngo akavuka muri Rwerere, kimwe na nyina.

Mu bandi bafashwe harimo Premier Soldat Dieumerci Birihanze Jacques, we uvuga ko yavukiye muri Congo, ababyeyi be bakavukira mu Rwanda ku buryo atahazi.

Muri aba kandi harimo Pasiteri Niyonzima Jean Damascene wafatanywe na FDLR, wavuze ko afasha FDLR mu bijyanye n’amakuru iba ikeneye.

Yavukiye mu yahoze ari Komini Kinyami muri Perefegitura ya Byumba, ahava mu 1994.

Avuga ko icyo gihe yari ’Assistant Bourgmestre’ wa Burugumesitiri Nyakamwe Antoine, wayoboraga Komini Kinyami.

Bamubajije icyo yifuza, ati "Ndashaka gusubira mu rwambyaye, ndashaka kugira ngo bamfashe kugera mu rwambyaye."

Yabajiwe ahantu FDLR yaba ikura ubushobozi bw’amafaranga butuma ibaho.

Ati "Mbona basoresha mu baturage, imyaka, iyo barimo gusarura, abaturage bagenda bariha ibishyimbo, ibigori…"

Mu bandi bafashwe harimo uwitwa Uwase Diane, Nzamwitakuze Consolata na Nyiramahirwe Esperance.

Abasesenguzi bagaragaza ko ubwo FDLR yageraga muri RDC nyuma yo gukora Jenoside, uyu mutwe wakomeje gukwirakwiza ingengabitekerezo ya Jenoside, ku buryo watije umurindi ubwicanyi muri icyo gihugu.

Kugeza ubu hari ubwoba ko muri RDC harimo gutegurwa ndetse no gushyirwa mu bikorwa umugambi wa Jenoside buhoro buhoro, wibasira Abanye-Congo b’Abatutsi.

Abarwanyi ba FDLR bafashwe na M23

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .