2017-2020: Impinduka zimaze kuba muri Guverinoma ya manda ya gatatu ya Perezida Kagame

Yanditswe na Philbert Girinema
Kuya 13 Nyakanga 2020 saa 07:15
Yasuwe :
0 0

Harabura igihe gito ngo imyaka itatu igere uhereye ku wa 30 Kanama 2017, ubwo Perezida Kagame yatangazaga abagize Guverinoma ye nshya muri manda ya gatatu. Kuva uwo munsi, benshi mu bari bayirimo barasimbujwe. Bigaragazwa n’uko Minisiteri enye gusa muri 19 ari zo zitahinduye abayobozi, mu gihe hari izahinduriwe abayobozi inshuro eshatu.

Ni impinduka abasesenguzi basanga zifite ishingiro kuko kuva ku munsi wa mbere ubwo Perezida Kagame yatorerwaga kuyobora u Rwanda, yikije cyane ku musaruro w’abayobozi, ko bakwiriye kuzuza inshingano zabo nk’uko baba barazirahiriye.

Mbere gato y’uko amatora y’Umukuru w’Igihugu aba mu 2017, Perezida Kagame yigeze kuvuga ati “Hari ikintu ntarumva neza. Mwicaye n’abantu mwaganiriye, mwavuze dukore iki, gushaka umuti w’iki kibazo. Mwanabiganiriye mwese murasa n’ababyumvikanaho. Ndetse bimwe byabavuyemo baravuga ngo dukore dutya kandi kubera impamvu, kubera ko babyumva."

“Hashira amezi atatu cyangwa atandatu, hari ubwo nsubira inyuma gushaka kumenya aho tugeze ukabaza ba bandi mwari kumwe ukagira ngo ntiyari ahari, ukabona arabyibutse ati harya! N’undi nawe akabaza undi ati harya, ugasanga ati ’naribagiwe cyangwa se narabikoraga ngezaho mpura n’ikibazo’, arangije aricecekera ntiyanavuga.”

Ibi byose bigaragaza ko nta gitunguranye mu mpinduka ziba, ahanini ikigamijwe ari iterambere ry’igihugu, aho unaniwe gutanga umusanzu we, aharira abandi.

Guverinoma yatangajwe ku wa 30 Kanama 2017 ubwo Perezida Kagame yari amaze kurahira, yari irimo abaminisitiri 20 n’abanyamabanga ba leta 11, mu gihe iyari yayibanjirije yo yari igizwe n’abaminisitiri 19 n’abanyamabanga ba leta 10, ari nako bimeze ubu. Muri aba bagize guverinoma hiyongeramo babiri bayobora inzego za leta nk’Urwego rw’Igihugu rushinzwe Iterambere, RDB, n’Ikigo cy’Igihugu gishinzwe Mine, gaz na Peteroli.

Guverinoma y’uyu munsi yiganjemo abize ubukungu n’abize siyansi, bishimangira na none icyerekezo cy’igihugu. Babiri mu bayirimo ubu nibo batize ayo masomo kuko bize itangazamakuru n’imiyoborere na politiki.

Minisiteri y’Imari n’Igenamigambi n’iy’Uburezi nizo zifite abanyamabanga ba leta benshi kuko buri imwe ifite babiri. Ni mu gihe hari izindi icumi zidafite n’umwe.

Guverinoma yo mu 2017 yari igizwe n’abaminisitiri b’abagore 11, mu gihe abanyamabanga ba leta bari babiri. Uyu munsi guverinoma igizwe n’abagore 16 [ubaze abaminisitiri n’abanyamabanga ba leta] mu gihe abagabo ari 13.

Mu baminisitiri 20 bashyizweho mu 2017, 12 ntibakiri kuri iyo myanya mu gihe abanyamabanga ba leta bose bahindutse. Ni ukuvuga ngo 23 batangajwe muri iyo guverinoma, ntibakiri mu myanyabahawe icyo gihe.

Impinduka za mbere nyuma y’itangazwa ry’iyo guverinoma zabaye mu Ukuboza 2017 ubwo hashyirwaho abaminisitiri babiri, ari bo uw’uburezi, Dr Eugene Mutimura na Rurangirwa Jean de Dieu wagizwe Minisitiri w’Ikoranabuhanga. Bombi nabo barasimbuwe.

Kuva mu 2018 hamaze gukorwa impinduka muri guverinoma inshuro zigera kuri eshanu, ariko impinduka zikomeye zabaye mu Ukwakira 2018, icyo gihe muri Guverinoma yagiyeho, abaminisitiri umunani bari bashya.

Kuva muri izo mpinduka [zo mu 2018] kugeza ubu, abaminisitiri batanu bamaze gusimburwa mu gihe abanyamabanga batandatu muri barindwi bariho icyo gihe nabo bavuye muri iyi myanya.

Muri iyi myaka yose, Minisiteri y’Uburezi ni imwe mu zakunze kurangwamo impinduka, aho imaze kugira abaminisitiri batatu n’abanyamabanga ba leta batatu.

Mu baminisitiri bariho muri iki gihe, Dr Vincent Biruta ni we umaze igihe kinini muri Guverinoma kuko yayinjiyemo bwa mbere mu 1997 nka Minisitiri w’Ubuzima, nubwo hagati aho yagiye muri Sena.

Undi ni Johnston Busingye winjiye muri Guverinoma bwa mbere muri Gicurasi 2013 nka Minisitiri w’Ubutabera, umwanya amazeho imyaka irindwi. Nyuma ye hari Mukeshimana Geraldine winjiye muri Minisiteri y’Ubuhinzi n’Ubworozi muri Nyakanga 2014.

Ba Minisitiri bamaze igihe gito kurusha abandi muri Guverinoma ni bane, Daniel Ngamije, Inès Mpambara, Valentine Uwamariya na Jeannette Bayisenge bose bagiye kuri iyi myanya muri Gashyantare uyu mwaka.

Izindi mpinduka zigaragara muri iyi guverinoma zishingiye kuri minisiteri zagiye zishyirwaho nyuma zikongera zikavanwaho.

Urugero ni nka Minisiteri y’Umutekano yashyizweho ariko ubu ikaba itagifite umuyobozi, nyuma y’uko Gen Patrick Nyamvumba akuweho muri uyu mwaka. Ni minisiteri yagombaga kuba ifite abakozi 30 utabariyemo Minisitiri.

Urebye uko guverinoma yo mu 2017 yari imeze, abaminisitiri umunani nibo bonyine bari mu batangajwe icyo gihe, nubwo harimo abagiye bahindurirwa imirimo bagakurwa muri minisiteri imwe bajya mu yindi. Batanu nibo bonyine bagumye kuri minisiteri barimo icyo gihe.

Impuguke muri politiki zisobanura ko kuba muri Guverinoma habamo impinduka za hato na hato bishingiye ku ishyirwa mu bikorwa ry’ibyo Perezida Kagame yemereye abaturage, bishingiye ahanini ku kuba itorwa rye ryarabaye ku busabe bw’abaturage.

Umwarimu muri Kaminuza y’u Rwanda, Buchanan Ismael, asobanura ko icyo cyizere Perezida Kagame yagiriwe n’abaturage, cyasabye ko habaho imbaraga zidasanzwe kugira ngo iyi manda ibe indorerwamo y’icyerekezo u Rwanda rushaka kugeramo.

Ati “Na Perezida wa Repubulika amaze gutorwa, yagaragarije abantu ko ibintu bigomba guhinduka, uko byakorwaga n’imbaraga zigomba gushyirwamo. Byagiye binagaragara. Ni guverinoma yagiyemo urubyiruko, uruhare rwarwo rwaragaragaye, hitawe ku buringanire, n’ubunararibonye.”

Buchanan asobanura ko abavanwa ku myanya, nubwo haba hari abakoze amakosa, bidasobanuye ko usimbuwe aba adashoboye kuko aba ashobora kujya ahandi agakora neza.

Ati “Iyi guverinoma twavuga ko igomba gukoresha ubunararibonye bwa buri wese. Ntabwo ari Minisitiri uje kwiga ahubwo ni uje gukora, umuvuduko ukajya imbere, ayo maraso mashya avuye hirya no hino araza ukabona impinduka nubwo hagiye habaho n’abatana. Ni abantu bagomba gukora aho kuvuga.”

Asobanura kandi ko kuba muri iki gihe hari abaminisitiri bake kurusha mbere, ari ikintu cy’ingenzi kuko kubasha guhuza imirimo igakorwa n’abantu bake aho kuba benshi, bituma n’umutungo ukoreshwa uba muke.

Guverinoma iriho muri iki gihe itandukanye cyane n'iyashyizweho mu 2017 ubwo Perezida Kagame yari amaze kurahirira manda ya gatatu

Usibye izi mpinduka, hari n’ibindi byagiye bihinduka birimo ko nka mbere wasangaga abaminisitiri bagenerwa abapolisi babacungira umutekano. Muri iki gihe ntibakiri mu bahabwa ubu burinzi kuva mu mwaka ushize.

Amakuru IGIHE ifite yizewe ni uko uyu mwanzuro wafashwe bishingiye ku kuba u Rwanda ari igihugu gitekanye, ku buryo bidakwiye ko Minisitiri agendana n’umurinzi aho agiye hose.

Gusa nubwo Minisitiri atagifite umupolisi umugenda iruhande ahantu hose, uburinzi bwakomeje gutangwa ku rugo rwe mu masaha y’ijoro kuko aribwo abantu bashobora kwitwikira umwijima bakaba bahungabanya umutekano byoroshye, kurusha amanywa.

Iyi guverinoma ishingiye ku gushyira mu bikorwa gahunda ya Guverinoma y’imyaka irindwi igamije kwihutisha iterambere rirambye, rigera kuri bose kandi rishingiye ku bufatanye bwa leta n’abikorera.

Itegerejweho kugira uruhare mu kwihutisha iterambere ry’ubukungu bushingiye ku ishoramari ry’abikorera, ubumenyi n’umutungo kamere w’Igihugu. Mu 2017 kugera mu 2024 igomba kugira uruhare mu ihangwa ry’imirimo mishya miliyoni 1.5, gutunganywa kw’ibikomoka ku buhinzi n’ubworozi, ubuhinzi bw’indabo imboga n’imbuto, ubukerarugendo, ubwikorezi na serivisi.

Muri iyo gahunda harimo ko mu mujyi wa Kigali hazubakwa inzira zihariye za bisi zitwara abagenzi zireshya na kilometero 22, zigabanye igihe abantu bamaraga bazitegereje; mu mijyi hazahangwa imihanda ireshya na kilometero 288 ndetse hongerwe n’amatara ku mihanda.

Mu 2024, ibyoherezwa mu mahanga bizagera kuri 17% buri mwaka, hazatezwa imbere gahunda ya Made in Rwanda bitume n u Rwanda ruzigama miliyari 400 z’amadolari, haboneke inzu zihendutse bitewe n’iterambere ry’inganda zikora ibikoresho by’ubwubatsi.

Umusaruro w’ibikomoka ku bukerarugendo uzikuba kabiri uve kuri miliyoni 403 z’amadolari ugere kuri miliyoni 800 z’amadolari bitewe n’ishoramari rizakorwa mu bikorwaremezo byorohereza ba mukerarugendo, kubyaza umusaruro inkengero z’ikiyaga cya Kivu n’amahugurwa ku batanga serivisi.

Hazakorwa imihanda ya kaburimbo ihuza uturere ireshya na Kilometero 800, iy’ubuhahirane ireshya na kilometero 3000, n’imihanda ireshya na kilometero 350 ya kaburimbo izubakwa i Kigali no mu yindi mijyi iwunganira.

Agaciro k’amabuye y’agaciro yoherezwa mu mahanga n’ibiyakomokaho kaziyongera kagere kuri miliyari 1.5 z’amadolari avuye kuri miliyoni 200 z’amadolari.

Muri iki gihe benshi mu bari kuvanwa mu myanya itandukanye ku buyobozi bukuru bw’igihugu, ukunze gusanga bakurikiranyweho kugira uruhare mu makosa atandukanye, cyangwa se no mu bindi bishingiye ku kutubahiriza inshingano.

Mu mbwirwaruhame ze, Perezida Kagame akunze kwitsa ku ngingo yo kubazwa inshingano ku bayobozi, ko rimwe na rimwe hari ababazwa ibijyanye n’akazi bashinzwe ugasanga batunguwe n’icyo gikorwa.

Ubwo muri Kanama yakiraga indahiro z’abayobozi bashya muri guverinoma yagize ati “Niko kubazwa inshingano bimera ariko akenshi hari ubwo abantu bakurikiranwa, kubazwa iby’inshingano, ndetse aho byagaragaye ko bitagenze neza, mu nzego zitandukanye hari ibiba biremereye kurusha ibindi, ukabona abantu barikanze, ahubwo abo bafite izo nshingano ni twe [abayobozi]".

"Ntabwo wamara imyaka itanu, 10, 20 uri mu nshingano wemeye gukora, twese tukumvikana uko twubahiriza amategeko, hanyuma ejo nihagira ubibazwa kuko agomba kubibazwa, ubwo abantu bikange, ari we yikange n’abandi bikange kandi twarigeze guhurira ahantu nk’aha tukabirahirira.”

Perezida Kagame yavuze kubazwa inshingano ari “uwo muco ugomba gukomeza”, kuko abantu badakwiye kunyuranya n’ibyo biyemeje.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .