‘Nzajya i Erevan mwenyura’ - Mushikiwabo wiyamamariza kuyobora OIF

Yanditswe na Mathias Hitimana
Kuya 20 Nzeri 2018 saa 09:42
Yasuwe :
0 0

Minisitiri w’Ububanyi n’amahanga w’u Rwanda, Louise Mushikiwabo, uhatanira kuyobora Ubunyamabanga Bukuru bw’Umuryango uhuza ibihugu bikoresha ururimi rw’Igifaransa (OIF), yatangaje ko yamaze kwigirira icyizere cyo kwegukana intsinzi.

Harabura iminsi itageze ku kwezi ngo inama rusange izabera Erevan muri Arménie ku wa 11-12 Ukwakira 2018 igere, batore uzayobora OIF muri manda y’imyaka itanu.

Mushikiwabo ahanganye n’Umunya-Canada Michaëlle Jean, usanzwe uyobora OIF.

Mu kiganiro "L’Invité" (umutumirwa) cy’Umunyamakuru wa TV5, Patrick Simonin, Minisitiri Mushikiwabo yagaragaje ko yizeye intsinzi.

Yagize ati “Mfite abanshyigikiye benshi kuri uyu mwanya no ku hazaza h’umuryango.”

Minisitiri Mushikiwabo yagaragaje ko icyizere cye kidashingiye ku mugabane w’Afurika gusa, ko kinashingiye n’ahandi yazengurutse ku Isi mu gihe cy’amezi abiri, haba mu Burayi, mu bihugu by’Amajyepfo y’Uburasirazuba bw’Aziya n’ahandi.

Ati “Mfite icyizere cyinshi kubera abanshyigikiye benshi. Nzajya i Erevan mwenyura.”

Yanagaragaje ko atewe ishema no kuba ari Umunyafurika kandi umugabane wose ukaba umuri inyuma nk’uko banafatanyije mu 2017 bagashyigikira Umunya-Ethiopia, Dr Tedros Adhanom Ghebreyesus, wiyamamarizaga kuyobora Umuryango Mpuzamahanga wita ku buzima (OMS).

Icyiyongereye kuri ibi, Perezida w’u Bufaransa, Emmanuel Macron, yashyigikiye kandidatire ya Mushikiwabo, avuga ko afite ubushobozi bwo kuyobora OIF.

Muri Gicurasi uyu mwaka Macron yabwiye itangazamakuru ati “Nibaza ko Minisitiri w’Ububanyi n’Amahanga w’u Rwanda, Louise Mushikiwabo, afite ubushobozi bwose bukenewe ndetse n’ubunararibonye bwose busabwa kugira ngo akore iyi mirimo.”

Mushikiwabo yanavuze ko mu mikorere y’uyu muryango hakenewe impinduka, uyu muryango ukava mu byabaye ‘akamenyero’.

Yagize ati “Mu muryango wacu turi ibihugu birenga 80, muri iki gihe bitandukanye na kera, niko mbyemera, Isi yose ikeneye ubufatanye, ibihugu yaba bito n’ibinini, byose birasabwa guhangana n’ibibazo bitureba twese, ibibazo by’ikirere, iby’umutekano n’iby’abimukira.”

Yavuze ko ibihugu bigize uyu muryango ukomeye bigomba gushakira ibisubizo Isi ifite kandi bibifitiye ubushobozi.

Nubwo Mushikiwabo yavuze ko yirinze kwiyamamaza, anenga Michaëlle Jean uyobora OIF, yavuze ko ibyerekeye gukorera mu mucyo no gucunga neza ibya rubanda ari ihame nk’uko bimeze muri Guverinoma y’u Rwanda arimo.

Kuri Canada, Mushikiwabo yavuze ko byumvikana ko ishyigikira umuturage wayo, yongeraho ati “Mfite ubushobozi n’intego zo kuyobora uno muryango, ubwo rero ni uguhatana.”

Yanibukije ko mu Rwanda rukoresha indimi nyinshi, abenshi bavuga iz’amahanga bakaba ari abavuga Igifaransa.

Umunyamakuru yabajije Mushikiwabo niba imbabazi ziherutse guhabwa imfungwa nta sano byaba bifitanye na OIF, avuga ko nta ryo kuko imbabazi Umukuru w’igihugu atanga ziteganywa n’amategeko.

Minsitiri Mushikiwabo ashyize imbere ko naramuka atowe azazamura ururimi rw’Igifaransa, azahanga imirimo mu rubyiruko, azongerera Umuryango wa OIF icyizere ugirirwa hakabaho no gusangizanya ubunararibonye.

Minisitiri Mushikiwabo yahamije ko icyizere afite kizatuma ajya i Erevan amwenyura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza