Ntabwo wakwirirwa wigisha ubuhahirane ngo aho umunyarwanda agiye bamuhige - Kagame

Yanditswe na Ferdinand Maniraguha
Kuya 13 Ukuboza 2018 saa 12:07
Yasuwe :
0 0

Perezida Paul Kagame yavuze ko bitumvikana kubana n’umuturanyi, wirirwa yigisha ibyiza byo kwishyira hamwe kw’ibihugu nyamara abanyarwanda bagera mu gihugu cye bagafungwa cyangwa bakaburirwa irengero.

Yabitangaje kuri uyu wa Kane ubwo yatangizaga ku mugaragaro inama ya 16 y’Umushyikirano, ari nabwo yatangazaga uko igihugu gihagaze.

Perezida Kagame yabanje kuvuga ko muri rusange umubano w’u Rwanda n’ibindi bihugu umeze neza, gusa avuga ko mu karere hakiri ikibazo.

Yagarutse ku byiza byo kwihuza kw’ibihugu, gusa avuga ko ikibazo ari ababyumva bakanabyigisha ariko byagera mu kubishyira mu bikorwa, bagakora ibitandukanye.

Ati “Ntabwo wavuga kubana, guhahirana, ibyo ngo nibirangira aho umunyarwanda agiye bamuhige kubera ko ari umunyarwanda, ntabwo ari byo si imibanire myiza kandi n’ababikora birirwa bigisha kwihuza kw’akarere. Babifitemo ubumenyi ariko iyo bigeze mu bikorwa biba ibindi.”

“Ikibazo ni uko biri no mu baturanyi kurusha. Tuzakomeza gushaka uko twakorana n’abo bigisha kwishyira hamwe, ntibabishyire mu bikorwa.”

Guhera umwaka ushize, hagiye humvikana abanyarwanda bafungirwa muri Uganda bakagarurwa ari intere ndetse abandi bakaburirwa irengero. Igikorwa nk’icyo cyanabaye ku Burundi cyane cyane guhera mu 2015.

Perezida Kagame yabwiye abitabiriye Umushyikirano ko ubuhahirane bugoye mu gihe abaje iwawe ubabangamira.

Ati “Ntabwo wavuga ngo ubuhahirane, imigenderanire ariko uje iwawe umutere ikibazo. Abantu bazahahirana bate batagenderana? Bazahahirana bate uwambutse umupaka afatwa agafungwa cyangwa akazimira ntibamenye aho yagiye? Abantu bahahirana bate mu kwihuza kw’ibihugu uko bamwe babyumva bigomba kuba bibabereye bikagarukira aho?”

“Twese tugomba kuba tuvuga rumwe tunakora bimwe kuko buri wese mu kwihuza kw’ibihugu ni mpa nguhe, ntabwo byaba ngo mpereza njye nkwime. Ntabwo wajya aho ngo wemerere ibikorwa bihungabanya umutekano w’abandi bishingire ku butaka bwawe, ngo ukoreshe ubusugire bw’igihugu cyawe uhungabanya ubw’abandi, iyo si imibanire.”

Mu minsi ishize kandi u Rwanda rwagiye rugaragaza ko abaturanyi babwo; u Burundi na Uganda, mu bihe bitandukanye bagiye bakingira ikibaba ibikorwa bigamije guhungabanya umutekano warwo.

Icyakora, Perezida Kagame yasabye abanyarwanda kubanza gukemura ibibazo byabo bwite mbere yo kujya gukemura ibyo bafitanye n’abandi.

Yabasabye kugira ubumwe, guharanira gushyira mu ngiro ibyo buri wese ashinzwe no gutekereza mu buryo bwagutse bufitiye bose akamaro kugira ngo igihugu kibanze kigere kubyo kiyemeje.

Ati “Biroroha kugira ngo ubwire abandi uti ‘ibyo nkugomba ndabyuzuza ariko ibyo ungomba ntabwo ubyuzuza’. Uba ufte aho washingiye kugira ngo ujye muri icyo kiganiro.”

Yavuze ko iyo umuturanyi akomeje kuba mubi amaherezo ari we bigiraho ingaruka kurusha uwo abereye mubi.

Minisitiri w'Ubuzima, Dr Gashumba Diane aganira na mugenzi we w'Ubutegetsi bw'Igihugu, Prof. Shyaka Anastase
Uhereye ibumoso: Umuyobozi Mukuru w'Ikigo gishinzwe Mine, Peteroli na Gaz, Francis Gatare; Umunyamabanga wa Leta muri Minisiteri y’Ububanyi n’Amahanga n’Ubutwererane n’ibikorwa by’umuryango w’Afurika y’Uburasirazuba, Amb. Olivier Nduhungirehe n'Umuyobozi w’Ikigo cy’igihugu cy’Iterambere, RDB, Clare Akamanzi

Amafoto: Niyonzima Moïse


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza