Ni iki cyatumye aba banyamahanga baba impirimbanyi mu guhakana Jenoside no kwijundika Guverinoma y’u Rwanda?

Yanditswe na Bukuru JC
Kuya 25 Kanama 2020 saa 09:48
Yasuwe :
0 0

Bahuriye kuri byinshi; ni abanyamahanga bakunze kwitwara nk’inararibonye ku Rwanda nubwo muri bo ntawe urarukandagiramo kuva mu myaka 26 ishize. Bose bakerensa Jenoside yakorewe Abatutsi, ndetse ugasanga baracuditse n’abarwanya leta y’u Rwanda b’imihanda yose. Ibibazo bibazwaho hanze aha ni byinshi, ariko icy’ibanze ni ukumenya icyateye buri umwe kwijundika Leta y’u Rwanda.

Banditse ibitabo bisebya u Rwanda cyangwa bihakana jenoside yakorewe Abatutsi, bitabiriye cyangwa bategura ibiganiro mbwirwaruhame bikerensa jenoside yakorewe Abatutsi, banditse inkuru nyinshi ariko zose zifite umujyo umwe ku Rwanda.

Hari bamwe mu basesenguzi baragaza ko iby’aba banyamahanga ari bimwe byo kwishakira amaramuko gusa, bityo ugasanga barabonye mu kurwanya Leta y’u Rwanda akaryo ko kwishakira umugati, ariko hari n’ababibona ukundi.

Filip Reyntjens

Prof Filip Reyntjens ni Umubiligi wigize inzobere ku Rwanda, aho usanga ikintu cyose gisebya u Rwanda, abatamuhaye rugari ngo asesengure uko yumva ibintu bumva batanyuzwe.

Ni umwe mu bantu bakurikiranye cyane u Rwanda mbere ya Jenoside yakorewe Abatutsi mu 1994, ndetse inyandiko nyinshi zigaragaza ko ari we wayoboye itsinda ryanditse Itegeko Nshinga ry’u Rwanda mu 1978.

Reyntjens yakomeje kuba umuntu wa hafi w’ubutegetdi bwa Juvenal Habyarimana, ku buryo ubwo RPF yari ikajije ibitero byo kubohora igihugu mu Ugushyingo 1990, ubutegetsi bwe bwohereje amatsinda abiri, rimwe rigenewe u Burayi, irindi Amerika ya Ruguru.

Ayo matsinda yagombaga gushakira Habyarimana ubufasha, no guhangana n’icyo bitaga icengezamatwara rya RPF.

Icyo gihe Reyntjens yari mu itsinda ryagiye i Genève, mu izina rya Perezida Habyarimana, riyobowe na Ferdinand Nahimana, iryagiye muri Amerika ya Ruguru riyoborwa na Dr Leon Mugesera uheruka gukatirwa gufungwa burundu, ubu arimo kuburana mu bujurire.

Nahimana we yakatiwe gufungwa imyaka 30 nyuma yo guhamwa no kugira uruhare muri Jenoside yakorewe Abatutsi. Yabaye umwalimu muri Kaminuza Nkuru y’u Rwanda i Butare, ndetse ni umwe mu bashinze Radio RTLM yamamaje bikomeye urwango n’amatwara yo gukora Jenoside, yashinzwe n’abarimo Felicien Kabuga, ufungiwe mu Bufaransa.

Umusesenguzi Tom Ndahiro, aheruka kwandika ko aho kuba Reyntjens mu basesenguzi b’inzobere ku Rwanda, “ari umwe mu bacurabwenge ba Jenoside yakorewe Abatutsi, kimwe na Ferdinand Nahimana na Leon Mugesera.”

Ibyo byose ngo ntibimugira inzobere ku Rwanda rwa nyuma ya Jenoside, ahubwo ibikorwa bye bishobora kugaragaza urwango afitiye RPF Inkotanyi, yakuyeho ubutegetsi yakoreraga, bwamutoneshaga.

Itegeko Nshinga yanditse ryo mu 1978 ryimakaje politiki y’ivangura n’amacakubiri ya MRND yakumiraga Abatutsi mu mashuri no mu kazi. Iryo tegeko nshinga kandi ryemezaga ko u Rwanda rugomba kuyoborwa n’ishyaka rimwe rukumbi rya MRND kandi Abanyarwanda bose bakarijyamo kuva bavutse. Iyo politiki ni imwe mu zagejeje kuri Jenoside yakorewe Abatutsi mu 1994.

Prof Filip Reyntjens akunze kwifashishwa n'abarwanya u Rwanda nk'impuguke

Peter Verlinden

Umunyamakuru Peter Verlinden ni Umubiligi ariko afite umugore w’Umunyarwandakazi, Marie Bamutese. Bombi bazwiho gutangaza inkuru zipfobya Jenoside yakorewe Abatutsi, zikanashaka kumvikanisha ko habayeho Jenoside yakorewe Abahutu yakozwe na FPR Inkotanyi.

Byoroshye kumvikana ko impamvu Verlinden yibasira u Rwanda, bifitanye isano n’umugore yashatse w’Umunyarwandakazi, aho amakuru ahamya ko yanihinduye amazina, kuko iwaho mu Bugesera mu Kagari ka Ngenda, bamuzi nka Marina Bamurebe.

Verlinden yakunze kuvuga ko ababyeyi b’umugore we bishwe na RPF, ko se wa Bamurebe yishwe muri Mata 1994 ageze mu Ruhango, nyina akicwa atahutse avuye muri Zaire muri Nyakanga 1997. Ni mu gihe amakuru avuga ko yishwe n’uburwayi, mu gihe ubwo buhamya bufifitse yanabutanze muri filime itaravuzweho rumwe, “Rwanda’s Untold Story”, yakozwe na BBC.

Bamurebe wari ufite imyaka 12, hamwe n’ababyeyi be bavuye mu Bugesera bagana muri Zaire. Se witwaga Tharcisse Sempura ngo yishwe mu mpera za Mata 1994 ageze mu Ruhango nk’uko Peter Verlinden abivuga, ndetse ko bishoboka ko yishwe na RPF.

Nyamara hari amakuru ko yaguye mu Ruhango kubera igicuri yarwaraga, bananirwa kumugendana arasigara, ntiyanarenga ako gace. Nyamara amateka y’urugamba rwo kubohora u Rwanda agaragaza ko Ingabo za RPF zageze mu Ruhango mu mpera za Gicurasi 1994.

Verlinden ahuza neza n’abandi bahakana Jenoside - ibintu adatangira ibimenyetso - ko hari abasirikare ba FPR babaga mu Nterahamwe, ibintu byashyira urujijo ku buryo interahamwe zari kwica Abatutsi harimo bene wabo.

Umunyamakuru Peter Verlinden n'umugore we Marie Bamutese

Judi Rever

Judi Rever ni umunyamakuru ukomoka muri Canada, umaze kumenyekana cyane mu bikorwa byo guhakana Jenoside yakorewe Abatutsi, by’umwihariko mu gufata amabi yose u Rwanda rwanyuzemo akayegeka kuri FPR Inkotanyi, yagize uruhare mu guhindura icyerekezo cy’igihugu.

Uyu yanditse igitabo yise ‘In Praise of Blood, The Crimes of the Rwandan Patriotic Front’, avugamo ko mu iperereza yakoze mu myaka isaga 20, yasanze FPR ariyo yatangije Jenoside yakorewe Abatutsi ndetse ikanakora iy’abahutu.

Ni ibintu avuga ko ashingira ku buhamya bwatanzwe n’abantu badatangazwa n’inyandiko zitagaragarizwa umwimerere, avuga ko yahawe mu ibanga n’Urukiko Mpuzamahanga Mpanabyaha rwashyiriweho u Rwanda.

Bamwe mu basesenguzi bagaragaza ko ibi bikorwa kenshi birangajwe imbere n’inyungu bwite, zijyanye no gushaka amaramuko kurusha kugaragaza ukuri, byose biri mu nyungu z’abagize uruhare muri Jenoside yakorewe Abatutsi cyangwa izindi nyungu batumbereye ku rwego mpuzamahanga.

Judi Rever amaze kumenyekana mu bikorwa byinshi birwanya FPR Inkotanyi

Patrick Mbeko

Patrick Mbeko ni umunyamakuru ukomoka muri Repubulika ya Demokarasi ya Congo, ufite ubwenegihugu bwa Canada. Iyo abanditsi bamwe bamusobanura, bavuga ko ari impuguke ku bibazo bya Afurika, by’umwihariko mu karere k’ibiyaga bigari.

Kimwe n’abandi banye-Congo benshi, Mbeko ni umwe mu bakomeje guharabika u Rwanda, bakarwitirira ibibazo byose byugarije icyo gihugu cya kabiri mu bunini muri Afurika. Ubu ikibazo kigezweho ni “ubwoba” burimo gutwererwa Dr Denis Mukwege, kubera ubusabe bw’uko muri RDC hashyirwaho urukiko rwihariye rwakurikirana ibyaha byahakorewe guhera mu 1996.

Ni igikorwa avuga ko ashingira ku myanzuro ya Mapping Report (u Rwanda ruyikemanga byinshi), igaruka ku byaha byakorewe muri RDC hagati ya 1993 na 2003.

Mbeko yashinjwe kenshi kugira uruhare mu guhakana Jenoside yakorewe Abatutsi, ndetse inyandiko ye iheruka ibikomozaho ubwo yavugaga ku ifatwa rya Kabuga, ko habahayeho gukabiriza ibintu mu bitangazamakuru kurusha ukuri kw’ibyo ashinjwa.

Ni inyandiko yise "Félicien Kabuga, "génocidaire rwandais"? Entre divagation médiatique et réalité des faits", yasohotse muri Sputnik News ku wa 22 Gicurasi 2020.

Agaruka kuri ICTR yashyizeho impapuro zifata Kabuga, ati "Nubwo ibyo rwagezeho byashimwe n’umuryango mpuzamahanga n’imiryango itari iya leta, ntabwo rwabuze kunengwa kubogama, haba mu buryo bwo gufata amateka ya Jenoside no mu mitangire y’ubutabera, aho rwaciriye imanza abatsinzwe gusa, ni ukuvuga Abahutu, rukabererekera abagize RPF bayobowe na Perezida uriho, Paul Kagame."

Ku bwe, ngo amateka ya Jenoside muri icyo gihe yarangijwe, kuko abashinjacyaha batabashije kugaragaza ko Jenoside yateguwe n’ubutegetsi bwakuweho. Mu yandi magambo, "gihamya y’itegurwa ry’ubwicanyi bwo shingiro rya Jenoside, ntiyagaragajwe nyuma y’imyaka myinshi y’imanza zatumijwemo amagana y’abatangabuhamya."

Yakomeje ati "Imbere ya ICTR, byagaragajwe ko Akazu ari ikintu cyahimbwe n’abarwanyaga Perezida Habyarimana, ko ubutumwa bwoherejwe na General Romeo Dallaire wayoboraga Minuar, buburira Umuryango w’Abibumbye kuri Jenoside yarimo yibasira Abatutsi, bwari baringa, ko Radiotélévision des mille collines (RTLM) itashinzwe mu mugambi wo gushishikariza abantu gukora Jenoside". Ku bwe ngo "Jenoside yo mu Rwanda" nta shingiro yagaragarijwe.

Yakomeje ati "Bijyanye n’ibyemezo byafashwe n’urukiko rwa Loni, ni gute twagira Félicien Kabuga umucurabwenge wa Jenoside, kandi nta gihamya yagaragajwe ku itegurwa ryayo? Ni gute twakwemeza ko yari umwe mu bagize Akazu katarigeze kabaho?"

Avuga ko Kabuga azira ubusa, ku buryo n’imihoro yatumije mu mahanga yakoresjekwe muri Jenoside, nta kigaragaza ko yaguzwe ari iyo kwica Abatutsi, kuko abantu benshi babaga bayitunze mu ngo zabo.

Mbeko ukomoka muri Congo akunze kuvuga nabi u Rwanda

Charles Onana

Charles Onana ni umunyamakuru ukomoka mu gihugu cya Cameroun, afite n’ubwenegihugu bw’u Bufaransa, wakunze kugira uruhare mu bikorwa bipfobya Jenoside yakorewe Abatutsi mu 1994.

Umuryango w’Abanyarwanda baba mu Bufaransa uheruka kumujyana mu nkiko, ugaragaza ko guhera kera na kare yakomeje guhakana Jenoside yakorewe Abatutsi, ku buryo "wagira ngo ubuzima bwe yabuhariye icyo gikorwa cyo guhakana Jenoside yakorewe Abatutsi."

Onana yigeze kuvuga ko Jenoside yakorewe Abatutsi ari cyo kinyoma kinini cyakozwe muri Afurika. Ni umugabo wigaragaza nk’impuguke ku Rwanda, nyamara nta mateka yarwo azi ku buryo ibyo akora byagereranywa n’amaco y’inda.

Kubera uburyo ibinyoma bye byamaze kujya hanze, Umunyamakuru wa BBC ishami rya Afurika mu rurimi rw’Igifaransa, Jacques Matand Diyambi, aheruka kwirukanwa azira ikiganiro yagiranye na Onana.

Kuwa 7 Gashyantare, Umunye-Congo, Diyambi wakoreraga muri Sénégal, yakiriye ibaruwa ivuye ku mwanditsi mukuru imuhagarika mu kazi, ivuga ko yirukanywe kubera ’amakosa akomeye yakoze’.

Onana niwe wanditse igitabo ku Rwanda kivuga kuri Operation Turquoise yise “Rwanda, la vérité sur l’opération Turquoise: Quand les archives parlent”.

Uwo mwanditsi kuva mu 2002, yaranzwe no kwandika inyandiko zipfobya Jenoside yakorewe Abatutsi, Charles Onana yigaragaje nk’umuhakanyi aho ashinja ingabo zabohoye u Rwanda ziyobowe na Perezida Kagame, gukora Jenoside ebyiri no kuba inyuma y’ihanurwa ry’indege ya Perezida Juvénal Habyarimana ku wa 6 Mata 1994, akavuga ko ariyo yabaye imbarutso ya Jenoside yakorewe Abatutsi.

Charles Onana kandi yakoranaga bya hafi na Pierre Pean na we wakoreshwaga n’inzego z’iperereza z’u Bufaransa kimwe na Bernard Lugan. Pierre Pean niwe usa nkaho ari mwarimu wa Charles Onana ni nawe wamuhuje n’abasirikare bakuru b’Abafaransa bayoboye ibikorwa bitandukanye bya gisirikare mu Rwanda ku butegetsi bwa Habyarimana bakaba bibumbiye mu ishyirahamwe ryitwa France Turquoise.

Iri shyirahamwe riha inkunga bamwe mu banditsi n’abanyamakuru bapfobya Jenoside yakorewe Abatutsi. Charles Onana kandi ni inshuti magara y’abandi bakomoka kimwe nawe muri Cameroun babaye inshuti zikomeye za Leta ya Habyarimana bakarwanya FPR. Barimo Jacques Roger Booh-Booh wabaye intumwa y’Umuryango w’Abibumbye mu Rwanda hagati ya 1993 na 1994.

Hari kandi umunyamakuru Marie Roger Biloa uba mu Bufaransa nawe ukomoka muri Cameroun akaba yari inshuti ikomeye ya Perezida Habyarimana. Ubwo bucuti bwose ni imwe mu mpamvu yateye Onana kuba igikoresho cy’abanga Perezida Paul Kagame, bapfobya Jenoside yakorewe Abatutsi.

Charles Onana yanenzwe kenshi guhakana Jenoside yakorewe Abatutsi mu 1994

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .