00:00:00 IGIHE NETWORK KN KINYARWANDA EN ENGLISH FR FRANCAIS

EU ishobora gutera inkunga u Rwanda mu bikorwa byo kurwanya iterabwoba muri Mozambique

Yanditswe na Kanamugire Emmanuel
Kuya 25 January 2022 saa 06:59
Yasuwe :

Ambasaderi w’Umuryango w’Ibihugu by’u Burayi mu Rwanda, Nicola Bellomo, yatangaje ko uyu muryango uri mu biganiro n’u Rwanda harebwa inkunga ushobora gutera ibikorwa ingabo zarwo zirimo byo kurwanya iterabwoba muri Mozambique.

Yabigarutseho mu biganiro byahuje u Rwanda na EU kuri uyu wa 25 Mutarama 2022, bigamije kwiga ku bufatanye bw’impande zombi, byabereye ku cyicaro cya Minisiteri y’Ububanyi n’Amahanga y’u Rwanda.

Ibiganiro nk’ibi bizwi ku izina rya ‘article 8 political dialogue’, byaherukaga kuba muri Gashyantare 2019. Covid-19 ni yo yatumye hashira igihe kinini anahagarariye impande zombi batabasha guhura imbonankubone.

U Rwanda rwohereje abasirikare n’abapolisi 2000 batanga umusanzu mu guhashya imitwe y’iterabwoba muri Cabo Delgado, bafatanyije n’Igisirikare cya Mozambique (FADM) ndetse n’ingabo zavuye mu Muryango w’Ubukungu w’Ibihugu byo muri Afurika y’Amajyepfo (SADC).

Uru rugamba rwatangiye muri Nyakanga umwaka ushize bigera mu ntangiriro za Nzeri 2021 uduce twinshi twari mu nshingano z’u Rwanda ibyihebe byari byarigaruriye mu Ntara ya Cabo Delgado, twarasubijwe mu maboko y’Ingabo za Leta.

Iyi Ntara ifite umutungo kamere mwinshi wa gaz ari na byo byatumye Sosiyete y’Abafaransa,Total Energies ihashora asaga miliyari 20$ mu mushinga wiswe ’Liquefied Natural Gas’. Ibikorwa byawo byaje guhagarikwa kubera umutekano muke.

Iyi Sosiyete kuba yasubukura ibikorwa byayo muri Mozambique byagira inyungu atari kuri yo ubwayo gusa ahubwo no ku Bufaransa ndetse no kuri EU kuko iki gihugu kiri muri uyu Muryango.

Ambasaderi Nicola Bellomo, yavuze ko inama nk’iyi ari urubuga rwo kungurana ibitekerezo ku ngingo zitandukanye u Rwanda rufatanyamo na EU zirimo ubucuruzi n’ishoramari, ubutwererane mpuzamahanga, ibibazo bya politiki, imiyoborere ishingiye ku kubahiriza amategeko, ubumwe n’ubwiyunge n’ibindi.

Yagarutse no ku bijyanye n’ubutwererane hagati ya EU n’Umugabane wa Afurika mu iterambere ryawo muri rusange, harebwa intambwe imaze guterwa mu kwihuza kw’ibihugu, imibanire hagati y’ibihugu byaba ibituranye cyangwa ibiri kure.

Ati “Muri uru rwego ndafata urugero ku bikorwa byo muri Mozambique, nizeye ko ibi biganiro biri bugire icyo byongera ku kugaragaza aho ibiganiro bigeze harebwa inkunga EU ishobora gutera u Rwanda mu bikorwa byo guteza imbere no kubungabunga amahoro n’umutekano ku Mugabane.”

Ambasaderi Bellomo ntiyasobanuye inkunga iyo ari yo, ingano yayo n’igihe ishobora gutangirwa, gusa ashimangira ko impande zombi ziri mu biganiro.

Mu bindi, yashimye uko u Rwanda rwitwaye mu guhangana n’icyorezo cya Covid-19 habungabungwa ubuzima bw’abaturage ndetse no mu kubaka ubukungu bwagizweho ingaruka n’iki cyorezo, yizeza ko EU na yo yashyizeho ingamba zo gutera inkunga urwego rw’ubuzima n’imibereho myiza byazahajwe na Covid-19.

Yashimye kandi ibyo u Rwanda rwiyemeje mu bijyanye no kubahiriza uburenganzira bwa muntu, avuga ko EU n’ibihugu binyamuryango bizakomeza kuganira na rwo ku bijyanye n’uko rwashyira mu bikorwa ibyifuzonama rwemeye mu igenzura ngarukagihe (Universal Periodic Review: UPR).

Minisitiri w’Ububanyi n’Amahanga, Dr Vincent Biruta, yavuze ko uhereye igihe inama iheruka yabereye habayeho impinduka nyinshi ku Isi, ariko ubufatanye bw’u Rwanda na EU bwarushijeho gushinga imizi by’umwihariko muri iki gihe cya Covid-19, aho impande zombi zishaka gufatanyiriza hamwe kukirwanya.

Yavuze ko u Rwanda ruri gufatanya na EU mu gushyira mu bikorwa icyerekezo 2050 na gahunda yo kubaka ubukungu bw’igihugu (NST1), ubufatanye kandi bukaba bukomeje mu nzego zirimo uburezi, guhanga imirimo igenewe urubyiruko, iterambere ridaheza hibandwa ku buhinzi no guteza imbere imijyi, politiki n’ubukungu no gushyigikira urwego rw’abikorera.

Ambasaderi w’Umuryango w’Ibihugu by’u Burayi mu Rwanda, Nicola Bellomo, yavuze ko uyu muryango uri mu biganiro ku nkunga watera u Rwanda mu bikorwa rwitabajwemo byo kurwanya iterabwoba muri Mozambique
Ambasaderi w’Umuryango w’Ibihugu by’u Burayi mu Rwanda, Nicola Bellomo hamwe na Minisitiri w'Ububanyi n'Amahanga, Dr Vincent Biruta
Minisitiri w'Imari n'Igenamigambi, Dr Uzziel Ndagijimana na Minisitiri w'Ubuzima, Dr Ngamije Daniel bari bitabiriye iyi nama
Itsinda ry'abari bahagarariye EU muri iyi nama barimo na ba ambasaderi b'ibihugu biri muri uyu muryango
Minisitiri w'Ubutabera, Dr Emmanuel Ugirashebuja na Minisitiri w'Ubumwe n'Inshingano Mboneragihugu, Dr Bizimana Jean Damascene bitabiriye iyi nama
Inama nk'iyi yaherukaga kuba mu 2019 mu buryo bw'imbonankubone

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .