00:00:00 IGIHE NETWORK KN KINYARWANDA EN ENGLISH FR FRANCAIS

Cabo Delgado: Ibyabereye muri Amarula, Hotel y’i Palma yatumye Isi imenya ishyano ry’ibyihebe byahayogoje

Yanditswe na Philbert Girinema
Kuya 28 Nzeri 2022 saa 07:46
Yasuwe :

Kuwa Gatatu tariki 24 Werurwe 2021, mu gihe i Kigali bibukaga umwaka n’iminsi icumi bishize icyorezo cya Coronavirus kigeze mu Rwanda, mu mujyi wa Palma uherereye mu Majyaruguru ya Mozambique, ubwoba bwari bwose.

Uwo munsi nibwo sosiyete y’Abafaransa, Total Energies yari yatangaje ko igiye gusubukura ibikorwa byayo byo gucukura gaz muri ako gace k’intara ya Cabo Delgado, nyuma y’igihe bisubitswe kubera ibitero by’imitwe y’iterabwoba byatangiye mu 2017.

Uyu mushinga wa mbere uhenze muri Afurika, ubarirwa agaciro ka miliyari 20 z’amadolari ya Amerika. Ubunini bwawo bwatumye mu mujyi wa Palma haba ihuriro ry’abakozi benshi baba ab’ibigo byigenga, abanyamahanga n’abandi.

Ahagana saa yine z’igitondo kuri uwo wa Gatatu wirabura, Thimoty Christian Robbins yari mu kazi ke bisanzwe nk’Umuyobozi wa Amarula Palma hotel, imwe mu zakundwaga bikomeye n’abakozi ba Leta ndetse n’ab’ibigo byigenga.

Mu kiganiro cyihariye na IGIHE, Robbins yagize ati “Wari wakeye nk’umunsi usanzwe. Ahagana saa yine n’iminota 15 nibwo bambwiye ko hari ikibazo mu Majyaruguru ashyira uburengerazuba bwa Palma, bambwira ko abantu bari kuraswa, abandi bari gushimutwa. Narahamagaye ngo numve niba hari andi makuru namenya ariko biranga.”

Ubwo Palma yagabwagaho ibitero, ibyihebe byaturutse mu byerekezo bitatu by’umujyi harimo n’ahari ikibuga cy’indege, kugira ngo hatagira ababasha guhunga bakoresheje indege.

Kubera agace iherereyemo, uko yubatswe n’uburinzi yari ifite, Amarula Hotel niyo yabaye ubungiro bwa benshi cyane cyane abari basanzwe bayizamo cyangwa abaturage batekerezaga ko ariho baza kubonera amakiriro. Ni mu gihe abandi bahungiye mu mashyamba.

Robbines ati “Ahagana ku mugoroba abantu bari bakiri kuza ari benshi , mu mujyi abantu bari bagize ubwoba kandi ariko bikomeza kumera nabi mu bice by’amajyaruguru y’Uburengerazuba bw’umujyi. Ibyihebe byari biri kurasa bigana rwagati mu mujyi.”

Yakomeje agira ati “Byaje kuba ngombwa ko mfata umwanzuro kuko aha hari huzuye abantu, ubushobozi bwo kubitaho bwari buke nta n’abashinzwe umutekano bahagije twari dufite babasha kwita kuri icyo kivunge cy’abantu. Twafashe umwanzuro wo guhagarika kwakira abantu.”

Bivugwa ko Amarula Hotel yari yahungiyemo abantu basaga 180. Mu minota ya mbere abari muri hoteli babashaga kuvugana n’imiryango yabo bayimenyesha ko ibintu bimeze nabi, ariko ihuzanzira rya telefone na Internet ryageze aho rirafungwa, ibiryo hoteli yari ifite birashira abantu basigara bategereje ubutabazi.

Basohotse muri hoteli bahunze, bicirwa mu nkengero zayo....

Umunsi wa mbere, ibyihebe byarasiraga kure mu bindi bice by’umujyi ariko ku munsi wa kabiri tariki 25 Werurwe, batangira kurasa ibisasu biremereye ku gipangu cya Amarula Hotel.

Icyatindije ibyihebe kugera kuri hoteli, ni imirwano byabanje guhuriramo n’abashinzwe umutekano b’ikigo Dyck Advisory Group cyo muri Afurika y’Epfo, cyari cyarahawe akazi na Leta ya Mozambique ngo bayifashe guhashya ibyihebe.

Kuwa Gatanu ubwo hari hashize iminsi ibiri hoteli igoswe, hashatswe uburyo bamwe bashyirwa mu modoka bagaherekezwa kugera ku cyambu kiri hafi aho, aho bari gufatira ubwato bubageza mu mujyi wa Pemba.

Muri hoteli hari hari imodoka ya gisirikare idatoborwa n’amasasu ifite imyanya icumi, hajyamo abaturage bake, ikurikirwa n’izindi 17 za gisivile nazo zirimo abaturage.

Zigisohoka muri hoteli zagabweho igitero, BBC ivuga ko izabashije kugeza abantu ku cyambu ari imodoka icumi, izindi zarashweho abarimo baricwa.

Guverinoma ya Mozambique ivuga ko uwo munsi hapfuye abantu barindwi muri ibyo bitero gusa ababirokotse bemeza ko hapfuye benshi.

Muri Amarula Hoteli hari hari ikibuga gito cyagwaho kajugujugu, ari nacyo cyatumye abanyamahanga benshi bahahungira.

Robbins avuga ko basabye ubufasha mu nzego zose ariko bagaheba, indege za mbere zahageze ku munsi wa kabiri nabwo zitwara abakeneye ubutabazi kurusha abandi.

Ati “Twahamagaye za ambasade, duhamagara Loni, duhamagara Guverineri akora uko ashoboye ngo bafashe abaturage, igisirikare cyarafashije ariko uburyo twari twagoswe, byari bigoye ngo hagire ubasha kwinjira aduhe ubutabazi. Niyo mpamvu twishatsemo uburyo bwo kwirwanaho kuko uko byagaragaraga, twari gushirira hano.”

Ibyihebe byashakaga kugera muri hoteli kuko byari bizi neza ko hahungiye abayobozi muri Leta, nubwo Robbins avuga ko abo bayobozi bari mu buriye indege bwa mbere.

Robbins ni we wari uyoboye Amarula Hotel ubwo yagabwagaho ibitero. N'ubu aracyari ku buyobozi bwayo

Robbins avuga ko ibyihebe bitabashije kwinjira muri iyo hoteli hakirimo abantu, ari nayo mpamvu ashimangira ko nta muntu wahaguye.

Ati “Nta muntu n’umwe waguye muri hoteli Amarula, nta n’umwe. Nta n’umwe wakomerekeye hano muri Amarula, abakomeretse cyangwa abapfuye byabaye bamaze kuva hano. Hari abagerageje guhunga niho benshi biciwe.”

Ababashije kugera ku cyambu bahamaze amanywa nijoro bategereje ubutabazi, bacengana n’ibyihebe. Kuwa Gatandatu nibwo ubwato bwa mbere buzanye ubutabazi bwahageze, ubwinshi bwari ubw’abaturage basanzwe, bari bamaze kumva ibyabaye muri Palma, bakiyemeza kujya gutanga umusanzu.

Muri Nyakanga 2021, ingabo z’u Rwanda n’iz’Umuryango uhuza ibihugu byo muri Afurika y’Amajyepfo (SADC) zageze muri Cabo Delgado, gufasha iza Mozambique guhangana n’ibyo byihebe.

Mu mezi make ya mbere mu gace ingabo z’u Rwanda zari ziherereyemo, zari zamaze gutsinsura ibyihebe, bihungira mu mashyamba.

Mu mijyi imwe n’imwe irimo na Palma, umutekano waragarutse ibigo by’ubucuruzi byongera gufungura, ndetse hashize iminsi n’abaturage bari barahunze bafashwa kugaruka mu byabo.

Robbins yavuze ko mu Ugushyingo 2021, aribwo Amarula Hotel bongeye kwisuganya kugira ngo basubukure ibikorwa. Mu ibarura bakoze, basanze barahombye byinshi.

Ati “Iyo ahantu hari amakimbirane cyangwa intambara, haba byinshi. Ntabwo njye nakwivugira kuko hari izindi sosiyete zari zifite ishoramari muri Palma zahombye cyane. Si igihombo cyo kubura imitungo cyangwa ibikoresho gusa, ahubwo twatakaje n’abakozi.”

Yakomeje agira ati “Twatakaje abantu kuk n’iyo waba ufite amafaranga angana ate, ntiwagarura ubuzima bw’umuntu wamaze kwicwa. Amafaranga yo hazaza n’abandi bayazane ibikorwa bikomeze, icyakora twabonye intangiriro.”

Robbins uvugana ikiniga, yagaragaje ko gusubukura ibikorwa batabikoze kuko hari inyungu zikomeye bategereje, ahubwo byari ugutera akanyabugabo abandi.

Ati “Twabikoreye abaturage ba Palma no kubizeza ko inzego z’umutekano ziri hano zifite ubushobozi bwo kubarinda ku buryo bagaruka mu byabo.”

Yashimye umusanzu w’ingabo z’u Rwanda mu kugarura amahoro muri Cabo Delgado ziri gutanga ubufasha ngo amahoro agaruke.

Ati “Kuva ingabo z’u Rwanda zaza hano, ubona ko abantu bagaruye icyizere icyakora ingabo za Mozambique na Polisi nabo barahari, bakorana n’ingabo z’u Rwanda. Hari icyahindutse kuko ingabo z’ibihugu bitatu ntiwazigereranya n’ingabo z’igihugu kimwe.”

Ibitero by’ibyihebe mu ntara ya Cabo Delgado ikungahaye ku mutungo kamere, guhera mu 2017 bimaze guhitana abaturage basaga ibihumbi bitatu mu gihe abasaga ibihumbi 800 bavuye mu byabo.

Ibiti by'inganzamarumbo rwagati muri iyi hoteli
Iyi hoteli ibyihebe byayigezeho ku munsi wa kabiri w'ibitero muri Palma
Amarula hoteli yubatse mu buryo bugaragaza ishusho gakondo
Ubwo ibitero byabaga, internet n'ihuzanzira rya telefone byarahagaritswe, ibiribwa nabyo ntibyongera kuhagera
Imyubakire ya hoteli Amarula iri mu byatumye bigora ibyihebe kuyinjiramo
Iyi hoteli ibarizwamo ibiti byinshi
Amarula Hotel ni umwe muri hoteli zihagazeho muri Palma
Iyi hoteli yari icumbikiye abantu basaga 180 ubwo yagabwagaho ibitero muri Mata 2021
Palma ni umujyi uri hafi y'inyanja y'abahinde mu Majyaruguru ya Mozambique
Abaturage bahungishijwe muri Palma bajyanwa Pemba mu Majyepfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .