Akanyamuneza ku banyempano batoranyijwe mu irushanwa ArtRwanda-Ubuhanzi i Kayonza

Yanditswe na Ishimwe Israel
Kuya 8 Nzeri 2018 saa 05:40
Yasuwe :
0 0

Irushanwa ArtRwanda- Ubuhanzi rizahishura impano z’urubyiruko ndetse zikabyazwa umusaruro, ryatangiriye mu Karere ka Kayonza kuri uyu wa 8 Nzeri 2018.

Muri aka gace hiyandikishije abanyempano 409 mu ngeri zirimo Ubugeni, Indirimbo n’Imbyino, Imideli, Ikinamico n’Urwenya, Filimi no Gufata Amafoto, Ubusizi n’Ubuvanganzo, baturutse mu turere 11 tw’igihugu.

Amarushanwa y’ibanze yafunguriwe muri Midland Motel i Kayonza, ahahuriye abanyempano bashaka kwigaragaza no kugerageza amahirwe bashyiriweho.

Bamwe bitwaje ibihangano bikoze nk’abashushanya mu gihe abandi bitwaje ibikoresho birimo ibya gakondo nk’imiduri ndetse n’inanga za kizungu bibafasha.

Ndayishimiye Samuel umaze umwaka abara inkuru yifashishije amafoto yakomeje mu kindi cyiciro. Yatangarije IGIHE ko iri rushanwa ari amahirwe yo kugaragaza impano zari zarapfukiranywe.

Yagize ati “Turacyakeneye ahantu ho kwigaragariza ngo twerekane impano zacu, abantu badufashe kuzamuka.”

Ndayishimiye w’imyaka 21 uvuka mu Bugesera yamuritse amafoto yafatiye mu bice bitandukanye by’igihugu.

Ati “Amafoto nagiye nyafatira mu bice bitandukanye by’igihugu bitewe n’aho nagendaga nkabona inkuru nakoraho. Ifoto nafashe y’umugabo wikoreye ifumbire mu gishanga cya Shyorongi nabonaga hari ubutumwa yatanga.”

Muhorakeye Yvette uvuka mu Bugesera yasazwe n’ibyishimo nyuma yo kubwirwa ko yatsinze.

Uyu mukobwa w’imyaka 23 yagize ati “Ndi kumva nta gahunda mfite yo guhagarika kuririmba. Naje hano ngerageza amahirwe ngo ndebe icyerekezo cy’ubuzima. Biciyemo ubu gahunda ni ugukomeza.”

Mazimpaka Jones Kennedy wagize uruhare mu itunganywa rya “Seburikoko”, uri mu kanama nkemurampaka yavuze ko impano zihari zikeneye gushyigikirwa.

Yagize ati “Abana bafite impano zibarimo. Imana yatanze impano ku buryo buri wese ayivukana ariko uburyo bwo kuyishyira hanze no kuyerekana ni bwo butandukanye. Abaririmbyi ni bo benshi tumaze kwakira.”

Yakomeje ati “ Bose bafite icyo bakeneye ngo impano zabo zigire aho zibageza. Impano zabo zikeneye gufumbirwa. Hari abafite impano ariko zicariwe kuva bakivuka, ugasanga bazimenye bakuze, si kimwe na wa wundi wayimenye akiri umwana, umubyeyi we akamufasha kuyagura.”

Art Rwanda-Ubuhanzi iri muri gahunda ya Guverinoma y’imyaka irindwi yo guhanga imirimo ibihumbi 70 mu rubyiruko kugeza mu 2024.

Amarushanwa y’ibanze azakorerwa mu duce dutandatu tw’igihugu tuzasozwa hamenyekanye abahanzi 120 bazakomeza mu kindi cyiciro.

ArtRwanda - Ubuhanzi yibanze ku rubyiruko rugize igice kinini cy’Abanyarwanda kuko rungana na 70%.

I Kayonza, abahanzi barenga 400 bitabiriye umunsi wa mbere wa ArtRwanda- Ubuhanzi
Abagize akanama nkemurampaka (uhereye ibumoso) ni Kabakera Jean Marie Vianney usanzwe ari umunyabugeni, Mazimpaka Jones Kennedy ukina filimi by’umwuga, Eric Kabera utunganya filimi, umunyamakuru Sandrine Isheja n’umuhanzi Danny Vumbi
Umuntu wagaragazaga impano ikomeye, abagize akanama nkemurampaka bamuhaga amahirwe yo gukomeza mu kindi cyiciro
Muhorakeye w'imyaka 23 araririmba, yahawe amahirwe yo gukomeza ahita yanzura kutazahagarara kugeza yushije ikivi
Patience Uwiringiyimana uzwi Papa Golizo mu rwenya, yakomeje mu kindi cyiciro
Uyu musore yagaragaje ubuhanga mu kuririmba akanicurangira
Abahanzi batandukanye bigaragaje ku munsi wa mbere w'irushanwa
Ndayishimiye Samuel ubara inkuru yifashishije amafoto yahawe Yego eshanu; imwe mu mafoto atangaje ni iy’umugabo wikoreye ifumbire, yafatiye mu gishanga cya Shyorongi
Umunyempano Munyabugingo Théoneste uzwi nka “Bakimbagizintore”, ahuza ubugeni n’ubuhanzi, yakoze kajugujugu yifashishije ibiti n’amahema
Uyu muhanzi yishimiwe bikomeye n’akanama nkemurampaka
Uyu muhanzi yagaragaje impano idasanzwe, yemererwa gukomeza mu kindi cyiciro cy’irushanwa
Hakizimana Aphrodice ntiyagize amahirwe yo gukomeza mu kindi cyiciro, ariko yari yabyambariye
Nyirabera yagaragaje impano idasanzwe mu muvugo uteye ubwuzu yise 'Reka Murate arabikwiye'
Nyirabera Clarisse w’imyaka 31 ufite ubumuga bwo kutabona yemerewe gukomeza n’abagize akanama nkemurampaka kubera umuvugo yahimbye
Eric Kabera wari mu kanama nkemurampaka yashimangiye ko ArtRwanda-Ubuhanzi ari irushanwa rigamije gushaka abafite impano ihebuje, yizihirwa na buri wese

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza