Abavuzi gakondo basabye Leta kubafasha guca akavuyo kagaragara mu mwuga wabo

Yanditswe na Prudence Kwizera
Kuya 3 Ukuboza 2018 saa 08:08
Yasuwe :
0 0

Abavuzi gakondo bagaragarije inzego z’ubuyobozi zirimo Minisiteri y’Ubuzima ko kuba batagira amategeko n’amabwiriza agenga umwuga wabo bituma bakorera mu kavuyo bikabadindiza.

Bavivuze ubwo abagera ku 128 bari bahuriye mu Karere ka Huye ku wa 01 Ukuboza 2018 bongererwa ubumenyi ku kunoza umwuga bakora no gutanga serivisi nziza.

Bavuze ko ikibazo gikomeye gihari gituma umwuga wabo ukigaragaramo akavuyo ari uko nta mategeko n’amabwiriza ugenderaho.

Habumugisha Pascal watangiye ubuvuzi mu 1980 avuga ko bashyiriweho amategeko byakemura ibibazo byinshi bahura nabyo.

Ati “Hari ba magendu baza bakanduza umwuga wacu uko bishakiye kuko nta mategeko tugira. Nibo batwanduza isura mbi tukaba dusaba ko Minisiteri zibishinzwe zadukemurira ibyo bibazo zigashyiraho amategeko atugenga.”

Uwimana Béatha nawe avuga ko gushyirirwa amategeko n’amabwiza abagenga ari igisubizo kirambye ku bibazo bafite.

Ati “Hasohotse amategeko atungenga byaca ako kajagari twese tukagira urugaga tubarizwamo, abakora magendu bakareka kutuvangira.”

Visi Perezida wa mbere w’Urugaga rw’Abavuzi Gakondo mu Rwanda, Twambazimana Dieudonné avuga ko amabwiriza n’amategeko abagenga akenewe cyane.

Ati “Abavuzi gakondo ni abantu bafite aho bahuriye n’amagara y’abantu; iyo urebye akajagari karimo ugahura n’umuntu wese ngo aravura bituma ubuzima bw’abaturage bwononerakara.”

Umuyobozi Mukuru w’Ibitaro Bikuru bya Kaminuza bya Butare, CHUB, Dr Sendegeya Augustin, wari uhagarariye Minisitiri w’Ubuzima, yavuze ko azabigeza ku nzego zibishinzwe.

Ati “Ubuvugizi ndaza kubugeza kuri Minisiteri y’Ubuzima. Icya mbere ni ugushyiraho itegeko ribagenga n’amabwiriza ajyana nabyo. Icya kabiri ni ukubabumbira hamwe mu rugaga”.

Dr Sendegeya akomeza avuga ko ibyo biramutse bikemutse n’ibindi bibazo bajya bagira byajya bishakirwa ibusubizo binyuze mu kuganira nabo kuko bazaba bazwi ndetse bagahabwa n’amahugurwa.

Kugeza ubu urugaga rw’abavuzi gakondo mu Rwanda rumaze kwiyandikishamo abagera ku 3 450.

Abari mu rugaga bavuga ko hakiri bagenzi babo benshi bakorera mu bwihisho badashaka kwigaragaza kubera imikorere yabo idahwitse.

Visi Perezida wa mbere w’Urugaga rw’abavuzi gakondo mu Rwanda, Twambazimana Dieudonné
Umuyobozi Mukuru w’Ibitaro Bikuru bya Kaminuza bya Butare, CHUB, Dr Sendegeya Augustin yabijeje ubuvugizi kuri Minisiteri y'Ubuzima

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza