Abantu baturutse i Burundi bateye ku birindiro bya RDF i Nyaruguru, ibicamo bane (Amafoto)

Yanditswe na Rabbi Malo Umucunguzi
Kuya 27 Kamena 2020 saa 08:45
Yasuwe :
0 0

Ingabo z’u Rwanda (RDF) zemeje ko abantu bagera ku 100 bitwaje intwaro zirimo n’inini baturutse mu Burundi, bateye ku birindiro byazo mu murenge wa Ruheru mu Karere ka Nyaruguru, zibicamo benshi zinabatesha ibikoresho birimo intwaro, mu gihe abasirikare batatu bakomeretse byoroheje.

Ni igitero cyabaye mu ma saa sita z’ijoro zo kuri uyu wa Gatandatu, kimara iminota iri hagati ya 20 na 30 nk’uko Umuvugizi w’ingabo z’u Rwanda, Lt Col Innocent Munyengango, yabitangaje, avuga ko RDF yarashe abari bateye maze bahunga basubira mu Burundi aho bateye baturutse.

Yakomeje ati "Aba bitwaje intwaro bateye baturutse mu Burundi nyuma basubirayo basiga inyuma abarwanyi babo bane bapfuye ndetse n’ibikoresho bya gisirikari birimo imbunda n’iradiyo za gisirikari. Mu guhangana n’abateye, abasirikari batatu b’u Rwanda bakomeretse ku buryo bworoheje. Turizeza Abanyarwanda ko abakoze ibi bakurikiranwa bakamenyekana."

Lt Col Munyangango yongeyeho ko aba bateye bari bagamije kugirira nabi ababa mu Mudugudu w’icyitegererezo wa Yanze urindwa n’Ingabo z’u Rwanda muri aka gace kandi uherereye mu kilometero kimwe gusa uvuye ku mbibi z’u Rwanda n’u Burundi.

Byongere, RDF yatangaje ko “Aba bateye baturutse mu Burundi ari na ho basubiye nyuma yo kuraswa berekeza mu birindiro by’Ingabo z’u Burundi biherereye ahitwa mu Gihisi ho muri Komini Bukinanyana mu Ntara ya Cibitoke.”

Mu karere ka Nyaruguru cyane cyane mu nkengero z’ishyamba rya Nyungwe, kuva mu myaka ishize hakunze kugabwa ibitero n’abantu bitwaje intwaro, Ingabo z’u Rwanda zabasubiza inyuma bagahita bahungira mu Burundi.

Rumwe mu ngero za vuba ni ubwo mu ijoro ryo ku wa 1 Nyakanga 2018 ahagana 23:30’, abagizi ba nabi bitwaje intwaro bateye mu Karere ka Nyaruguru, Umurenge wa Nyabimata. Bibye ibintu by’abaturage birimo amatungo n’ibiribwa, banarasa hejuru bagamije gutera ubwoba abaturage.

Icyo gihe Polisi y’u Rwanda yagize iti "Abo bagizi ba nabi bateye baturutse mu gihugu cy’u Burundi banyuze mu ishyamba rya Nyungwe, ari nayo nzira banyuze basubirayo. Ibi bikaba bibaye nta n’ibyumweru bibiri bishize mu karere kamwe habaye igitero nk’iki."

Icyo gihe inzego z’ibanze n’izishinzwe umutekano bakoranye inama n’abaturage barabahumuriza, ari nabyo biteganyijwe mu gitondo cyo kuri uyu wa Gatandatu.

Ni igitero kibaye nyuma y’iminsi mike mu Burundi hatowe ubuyobozi bushya burangajwe imbere na Gen Ndayishimiye Evariste, bukaba buhanzwe amaso harebwa niba buzazana impinduka ku bushotoranyi ku Rwanda bumaze igihe.

Iki gitero kandi kibaye nyuma y’amasaha make mu Burundi bashyinguye Pierre Nkurunziza wahoze ari Perezida w’icyo gihugu, witabye Imana ku wa 8 Kamena azize uguhagarara k’umutima, nk’uko Guverinoma y’icyo gihugu yabitangaje.

Aho abasirikare barasaniye hasigaye ibimenyetso by'amasasu
Abagabye igitero birutse basiga inyuma imirambo ine ya bagenzi babo
Ingabo z’u Rwanda (RDF) zemeje ko abantu bagera ku 100 bitwaje intwaro zirimo n’inini baturutse mu Burundi, bateye ku birindiro byazo mu Murenge wa Ruheru mu Karere ka Nyaruguru, zibicamo benshi zinabatesha ibikoresho birimo intwaro, mu gihe abasirikare batatu bakomeretse byoroheje. RDF yafashe bimwe mu bikoresho by'abagabye igitero
Urugo rw'umuturage umwe rwateweho igisasu
Ibyafatanwe abagabye igitero I Nyaruguru harimo n'ibiribwa n'ibikombe byanditseho ko ari iby'Ingabo z'Igihugu z'u Burundi
RDF yashushubikanye abagabye igitero, banyura mu murima w'ingano bahunga
Abasigaye birutse basiga inyuma imyenda yabo

Amafoto: Kwizera Prudence


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .