Yatanze impano ikwiye! Umutoni Mary yinjije abaturarwanda muri Noheli banezerewe (Video)

Yanditswe na Mukahirwa Diane
Kuya 25 Ukuboza 2020 saa 11:38
Yasuwe :
0 0

Ni umunyempano udasanzwe! Ijwi rye rinyura amatwi y’abamwumva, ubutumwa atanga ni inkomezi ku mitima y’abacogoreye mu nzira batarasoza urugendo, bubaremamo icyizere cy’ubuzima n’impamvu yo gukomeza kubaho. Yitwa Umutoni Mary, umukobwa ushinguye, uhorana inseko yuje ituze.

Umutoni ari mu bahanzi bahanzwe amaso mu ruhando rw’abakora indirimbo zicurangwa cyane mu nsengero no mu makoranire y’abemera Imana.

Si mukuru mu muziki bigendanye n’imyaka amazemo ariko ni mugari mu nganzo kuko uruhurirane rw’ijwi rye n’imyandikire y’indirimbo binyura amatwi y’uhirwa no kubiha umwanya akabyumva.

Umutoni Mary mu kwifatanya n’Abanyarwanda ndetse n’abakunzi b’umuziki uhimbaza Imana yasohoye indirimbo ya Noheli yise “Merry Christmas’’.

Indirimbo nshya ya Umutoni yakozwe na Nick Pro mu buryo bw’amajwi mu gihe amashusho yatunganyijwe na Bob Chris Raheem.

Ifite umwihariko kuva ku magambo ayigize agusha ku ivuka ry’Umukiza, uburyo video ikozwe bidasanzwe bimenyerewe ku isoko ryo mu Rwanda ndetse n’ijwi rihebuje ryumvikanamo ritanga ubutumwa ko ab’Isi badakwiye gukuka umutima kuko ‘ari igihe cy’umunezero, twizihize ivuka ry’umukiza wacu Yesu, ubwo Isi yari ivuye mu mwijima ibonye umucyo.’

Umutoni yabwiye IGIHE ko yahisemo gukora indirimbo ya Noheli kuko ari umunsi ufite igisobanuro gikomeye mu buzima bw’umukirisitu.

Yagize ati “Noheli kuri njyewe no ku bantu bose ni ivuka ry’Umukiza, ivuka ry’umuntu ugiye kugukiza ni ibyiringiro bishya kuri wowe. Hari aho mvuga nti ‘Nezerwa’ kuko dufite impamvu yo gushima ko tukiriho nubwo umwaka utari woroshye.’’

Umutoni yavukiye mu muryango ukijijwe ndetse akurira no muri korali y’abana, mu rugo iwabo no mu rusengero bamwigishije ndetse bamutoza gusenga n’indi mico ya Gikirisitu arayikurana.

Nubwo yakuze atozwa inzira y’Imana ariko ageze ku myaka 19 yatangiye kwibaza niba yarahisemo neza kandi niba koko ibyo akora bijyanye n’ibyo Imana ishaka.

Iri hurizo yarimazemo imyaka itanu aho yahoraga yibaza ibibazo bitandukanye ku myemerere ye ndetse atangira gushakira ukuri ahantu hatanduaknye ngo abashe gusobanukirwa.

Umutoni yavuze ko yagowe no guhuza ibyo asoma muri Bibiliya n’imyemerere ya Gikirisitu n’aho bihurira n’ubuzima bwa muntu ahitamo kubikoraho ubushakashatsi.

Yagize ati “Maze gukura natangiye kwibaza ibibazo byinshi, ntangira kujya mu matorero atandukanye no gusoma ibitabo ngo menye ese inzira nafashe koko ni yo nshaka gukomeza.”

Avuga ko hari ubwo yasomaga Bibiliya ariko yabona ibisabwa ngo abizera ijuru bazaritahe bisa nk’ibidashoboka atangira kugira ubwoba bw’uko yaba akorera ubusa.

Umutoni yavuze ko kudasobanukirwa n’ibyanditswe byera yasomaga byamuteye kugira ubwoba bwo kurimbuka.

Ati “Nasomaga Bibiliya nkagira ubwoba nkumva hari ibyo ntumva nkavuga nti kuki itubwira gukora gutya, kudakora gutya kandi uko umuntu aremetse agira intege nkeya, nkabona ibyo idusaba nta muntu uzagera mu ijuru.”

Mu gukomeza kwibaza ibibazo bitandukanye ku Iyobokamana, Umutoni yaje gusoma igitabo cyitwa Jesus is greater than religion cya Jefferson Bethke, asobanukirwa byinshi yibazaga ku itorero.

Nyuma y’icyo gihe yarabohotse arakira ndetse arihana abasha gukurikira Yesu azi ibyo arimo bimufasha kuryoherwa n’ubuzima.

Yagize ati “Nasomye iki gitabo nsanga hari itandukaniro ryo kuba uri umukirisitu no kuba umunyedini ndetse mbasha no gusobanukirwa ibyo bibiriya itubwira bituma nihana ndakizwa.”

Ibihe byo kugisha imitima inama yanyuzemo biri mu byamusunikiye gukora umuziki wo guhimbaza imana ngo aruhure imitima ya benshi bananijwe no kudasobanukirwa iby’inzira y’Imana.

Umutoni afite indirimbo eshatu zihimbaza imana arizo ‘Ubuzima’, ‘Save me Jesus’ na ‘Merry Christmas’ yahariwe Noheli.

Uyu mukobwa w’imyaka 27 yavukiye muri Uganda mu muryango wa gikirisitu. Ni umwana wa kabiri muri batanu bavukana barimo abahungu babiri n’abakobwa batatu.

-  Reba indirimbo nshya ya Noheli yakozwe na Umutoni Mary

-  Ikiganiro Umutoni yagiranye na IGIHE


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .