Ntoyimana Ananias waririmbye muri Korali Bethania yinjiranye mu muziki impano ya Noheli

Yanditswe na Uwimana Abraham
Kuya 24 Ukuboza 2020 saa 08:48
Yasuwe :
0 0

Ntoyimana Ananias w’imyaka 57 wamenyekanye cyane muri Korali Bethania yo muri ADEPR Gihundwe mu Karere ka Rusizi, yatangiye gukora umuziki ku giti cye, aho afite gahunda yo gukora indirimbo zo mu gitabo mu buryo bw’umwimerere, ku ikubitiro yatangiranye ifasha abantu kwizihiza Noheli.

Indirimbo “Kera hari abungeri” ya 238 mu gitabo cy’indirimbo zo gushimisha Imana, ni yo Ntoyimana yahereyeho, ikaba yahise isohokana n’amashusho.

Benshi bumvise ijwi rye bagaragaje ko bishimiye iyi ndirimbo ndetse bamusaba ko yakomeza akabagezaho n’izindi.

Ntoyimana Ananias wamaze imyaka igera kuri 24 aririmba muri Korali Bethania yabaye iya mbere yashinzwe muri ADEPR ndetse yakunzwe n’abatari bake, mu ndirimbo yaririmbye yerekanye ko agishoboye guhanika ijwi agahimbaza Imana n’ubwo imyaka igenda yicuma.

Uretse kuba yarabaye imyaka myinshi muri Bethania ari naho yamenyekaniye cyane, Ntoyimana avuga ko atari bwo yari agitangira kuririmba, ahubwo ko yabitangiye kera cyane akiri umwana muto.

Ntoyimana yabwiye IGIHE ko yatangiye kuririmba mu rusengero kuva kera akiri umwana mu ishuri ryo ku Cyumweru, gusa yinjiye muri korali neza ubwo yari agize imyaka 15 y’amavuko aririmbira muri Kibogora.

Yavuze ko ubwo yari avuye i Kibogora yahise yerekeza i Gihundwe ari nabwo yahise yinjira muri Korali Bethania kuva mu 1984, aha ngo niho yatangiye gukunda kuririmba cyane abikundishijwe n’abamisiyoneri.

Ati “I Gihundwe hari abamisiyoneri bavuye muri Suède nkunda ukuntu baririmba, cyane ko indirimbo nyinshi ariho zavuye, hiyongeraho ko nabaye i Gihundwe hari Pasiteri Senzige Zacharia wahinduye Indirimbo z’Agakiza mu Kinyarwanda azikuye muri Nyimbo za wokovu.”

Yakomeje avuga ko yihatiye kumenya indirimbo cyane izo mu gitabo cy’indirimbo zo Gushimisha Imana n’iz’Agakiza, kugeza ubwo higeze gutangwa ikizamini akaba uwa mbere muri Gihundwe yose, mu kumenya indirimbo nyinshi no kuziririmba neza.

Kuri ubu Ntoyimana yatangiye gahunda yo kuririmba izi ndirimbo kugira ngo abantu bose n’abakirisitu by’umwihariko bazimenye, cyane cyane izitaragiye zimenyekana.

Yavuze ko kandi afite n’intego y’uko zamenyekana zikajya zikunda gukoreshwa mu nsengero kenshi.

Ati “Ikindi ni uko indi ntego yo gukora izi ndirimbo ari ukugira ngo zijye zikoreshwa mu nsengero kuko zifitemo amagambo meza n’ihishurirwa, bigendanye n’igihe zakorewe.”

Ntoyimana afite gahunda y’uko abazamwegera bashaka kumenya izi ndirimbo yazibigisha ndetse agakomeza no kuzicisha ku zindi mbuga aho abantu bumvira umuziki bakajya bazisangaho bakazumva.

Indirimbo Ntoyimana Ananias azajya akora, zizajya zisangwa ku rubuga rwe rwa YouTube, rwitwa “Ntoyimana Ananias”, ari naho iyi ndirimbo ya mbere yakoze igaragara. Uyu musaza utuye i Gihundwe mu Karere ka Rusizi ateganya no kuzifashisha izindi mbuga zinyuzwaho umuziki mu gufasha abantu koroherwa no kuzibona.

-  Reba indirimbo ya mbere ya Ntoyimana Ananias

Ntoyimana Ananias waririmbye muri Korali Bethania yinjiranye mu muziki impano ya Noheli
Ntoyimana Ananias ari kumwe n'abamufashije gucuranga indirimbo ye nshya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .