Lewis Vocal Band yasohoye amashusho y’indirimbo ibwira abantu kwiringira Imana no mu bikomeye

Yanditswe na Ishimwe Israel
Kuya 22 Werurwe 2021 saa 08:46
Yasuwe :
0 0

Itsinda rizamukanye imbaduko mu muziki wo kuramya no guhimbaza Imana, Lewis Vocal Band, ryasohoye indirimbo "Ndakwiringiye" ryakoze mu buryo bwa "Live", ikaba ari indirimbo isubizamo abantu ibyiringiro ibabwira kwiringira Imana no mu bihe bikomeye.

Indirimbo "Ndakwiringiye" irimo ubutumwa bwo kubwira abantu ko no mu bihe bikomeye, inzira zose zifunze n’inshuti zananiwe, bakwiriye guhora biringira Imana kuko ari yo idahemuka.

Umuyobozi wa Lewis Vocal Band, Tuyiramye Protogène, yabwiye IGIHE ko basohoye iyi ndirimbo by’umwihariko muri ibi bihe Isi yugarijwe n’icyorezo cya Coronavirus cyahungabanyije ibintu byinshi mu mibereho ya benshi kugira ngo abantu bongere kwibuka ko Imana itahindutse.

Yagize ati "Ni indirimbo ikoze mu buryo bw’isengesho umuntu wese yasenga abwira Imana ko akiyiringiye n’ubwo ibibazo byaba byinshi bite."

"Turashaka kwibutsa abantu ko n’ubwo Isi iri mu bihe bitoroshye, benshi bahuye n’ibibazo ntibakwiye kwiheba cyangwa ngo bumve ko byarangiye, bakwiye kugirira Imana icyizere bakagumya kuyiringira kuko yo itajya ihemuka."

Tuyiramye yakomeje avuga ko uretse iyi ndirimbo hari n’izindi zikiri gutunganywa muri studio bitegura kuzasohora mu minsi iri imbere nazo zatunganyijwe mu buryo bwa "Live" ari amajwi ndetse n’amashusho.

Lewis Vocal Band ni itsinda rigizwe ahanini n’urubyiruko rubarizwa mu Itorero ADEPR, bahuriye ku kuba bakuriye mu ishuri ry’icyumweru (Sunday school).

Yashinzwe mu 2014 itangijwe n’abasore batatu bishyize hamwe bashaka gukora umuziki wa acappella, nyuma itsinda rigenda ryaguka hiyongeramo n’abandi ndetse n’imikorere irahinduka, kugeza mu 2018 ubwo bavuga ko ari bwo basa n’aho ari bwo binjiye mu ruhando byeruye.

Intego y’iri tsinda nk’uko Tuyiramye yabitangaje ngo ni ukwamamaza ubutumwa bwiza hafi na kure ndetse no kurushaho kuba icyitegererezo bigatuma n’abagiye bava ku Mana bahindukira bakayigarukira.

Bashishikariye gukomeza kubwira urundi rubyiruko kuva mu byaha rukizera Umwami Yesu n’abakiri bato bagakomeza gukurira mu murongo wo kubaha Imana ndetse impano zabo bakazikoresha ku bw’Ubwami bw’Imana.

Tuyiramye yasabye abantu gukomeza kubashyigikira kuko hari ibikorwa byinshi bitegura gukomeza gukora mu bihe biri imbere, birimo gusohora n’izindi ndirimbo zirimo iziri gutunganywa muri studio kuri ubu.

Lewis Vocal Band yasohoye amashusho y’indirimbo ibwira abantu kwiringira Imana no mu bikomeye
Umuyobozi wa Lewis Vocal Band, Tuyiramye Protogène, yavuze ko basohoye indirimbo mu bihe Isi yugarijwe na Coronavirus yahungabanyije byinshi mu mibereho ya benshi kugira ngo abantu bongere kwibuka ko Imana itahindutse
Lewis Vocal Band yashinzwe mu 2014 ifite intego yo kubwiriza ubutumwa bwiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .