Korali Yesu Araje yo mu Badiventisiti yasohoye ’Ubusabusa’, indirimbo isaba abantu kutiremereza

Yanditswe na Ishimwe Israel
Kuya 8 Ugushyingo 2020 saa 04:27
Yasuwe :
0 0

Korali Yesu Araje yo mu Itorero ry’Abadiventisiti b’Umunsi wa Karindwi yashyize hanze amashusho y’indirimbo nshya yise ‘Ubusabusa’ ikubiyemo ubutumwa bwigisha abantu kwicisha bugufi.

Iyi ndirimbo yubakitse mu buryo bwerekana ko umuntu kuva mu kuremwa kwe yakuwe mu busabusa.

Hari aho abaririmbyi ba Korali Yesu Araje bagira bati “Niba waragize amahirwe yo kureba mu byuma bipima imikurire y’umwana mbere yuko agera ku Isi, abo turibo ni abo ngabo; umuntu ni ubusabusa ariko ubwo busabusa Imana ibwitaho ikaremera amagufa mu nda y’umubyeyi igihe cyagera umuntu akagera ku Isi, nguko uko naje nguko uko waje Imana irahambaye.’’

Umuyobozi wa Korali Yesu Araje, Muhayimana Elisa Claude [Elsa Cluz], yabwiye IGIHE ko iyi ndirimbo yanditswe hashingiwe ku buhamya bw’umuryango we.

Yagize ati “Iyi ndirimbo nayanditse ku munsi wa mbere mperekeje umufasha wanjye kwa muganga. Narebye mu byuma by’abazungu bipima umwana ukiri mu nda y’umubyeyi bintera ubwoba ndavuga nti nk’uyu azavuka usange abaye umuntu mukuru, nagira amahirwe yo guhirwa n’ubuzima ajye yumva byose byaravuye mu bushake, ubwenge n’ubuhanga bwe kandi njyewe ubwanjye naramwiboneye akiri urusoro.’’

Yakomeje ati “Byatumye ntinya Imana mpita mvuga nti ubu ibyamamare byose tubona mu ngeri zitandukanye byanyuze muri iriya nzira? Niko kwandika indirimbo ariko ikigenderewe ari ugutinya no kubaha ubwenge n’ubuhanga by’Imana.’’

Elsa Cruz yavuze ko ubutumwa buri mu ndirimbo butagamije gupfobya umuntu waremwe n’Imana ahubwo ikigenderewe ni ukwigisha abantu kwicisha bugufi no gutangarira ubwenge n’ubuhanga by’Imana.

Korali Yesu Araje yihaye intego yo gusohora indirimbo buri kwezi. Iyitwa ‘Ubusabusa’ yasohowe nyuma ya “Ndacyari njyewe’’ yagiye hanze muri Nzeri.

Yagize ati “Imana yatugiriye icyizere iduha umugisha wayo, ubu dufite album iri gutunganyirizwa muri Studio ya The Sounds (Camarade&Bob Pro) ndetse uko indirimbo izajya isohoka Karenzo ni we ufite amasezerano yo kuyitunganyiriza amashusho buri kwezi, abakunzi bacu ntibazatubura ahubwo bakomeze badusengere.’’

Indirimbo ‘‘Ubusabusa’ ni imwe mu zigize album ya gatandatu iyi korali iri gukoraho muri Studio ya The Sound imenyerewe gukoreramo abaririmbyi b’ingeri zose.

Korali Yesu Araje imaze imyaka igera kuri irindwi ivuga ubutumwa bunyuze mu ndirimbo.

Iyi korali yatangijwe n’abasore batatu gusa kugeza ubu umwe ni we uyisigayemo. Yatangiye ari itsinda (group) ribarizwa ku Gisozi. Nyuma yo gucika intege kw’amatsinda mu Badiventisiti, abayigize bayihinduye Korali, kuri ubu ibarizwa ku Itorero rya LMS Kamukina (Kacyiru Merdien).

Korali Yesu Araje ubu igizwe n’umusore umwe witwa Sekanyana Samuel n’abagabo batatu barimo Elisa Claude Muhayimana [Elsa Cluz], Nsengimana Amiel na Mudagani Pilote.

Korali Yesu Araje ifite indirimbo zirenga 150 zirimo n’izandikwa zigenewe ibikorwa bitandukanye zigahita zirangira ntizongere gukoreshwa. Izigera kuri 56 ni zo zanyujijwe muri studio, aho zikubiye mu mizingo itanu y’indirimbo z’amajwi n’ine y’amashusho.

-  Reba hano indirimbo “Ubusabusa’’

Korali Yesu Araje yo mu Badiventisiti yasohoye 'Ubusabusa', indirimbo isaba abantu kutiremereza
Aba baririmbyi bazwiho kugira amajwi aryoheye ugutwi
Korali Yesu Araje imaze imyaka igera kuri irindwi ivuga ubutumwa bunyuze mu ndirimbo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .